CAB. IV

1As myr v’ad loayrt rish y pobble, haink ny saggyrtyn, as captan y chiamble, as ny Sadduceeyn orroo, 2As ayns jiarg-chorree roo son dy row ad gynsaghey yn pobble, as preacheil trooid Yeesey yn irree-seose-reesht veih ny merriu. 3As lhie ad nyn laueyn orroo, as hug ad ad ayns pryssoon derrey laa-ny-vairagh: son nish va’n fastyr er. 4Ny-yeih ren ymmodee jeusyn credjal v’er chlashtyn y goo; as va earrooyn ny deiney mysh queig thousaneyn.

5As haink eh gy-kione laa-ny-vairagh, dy row ny fir-reill oc, as y chanstyr, as ny scrudeyryn, 6As Annas yn ard-saggyrt, as Caiaphas, as Ean, as Alexander, as whilleen as va jeh kynney yn ard-saggyrt, er nyn jaglym cooidjagh ec Jerusalem. 7As tra v’ad er chur orroo shassoo stiagh, dênee ad jeu, Liorish cre’n phooar ny cre’n ennym ta shiu er n’yannoo shoh? 8Eisht va Peddyr lhieent lesh y Spyrryd Noo, as dooyrt eh roo, Shiuish reiltee yn phobble, as shanstyr Israel, 9My ta shinyn yn laa jiu er nyn veysht mychione yn obbyr vie va jeant er y baccagh, as liorish cre’n saase v’eh er ny laanaghey; 10Lhig da fys y ve euish ooilley, as ec ooilley pobble Israel, dy nee liorish ennym Yeesey Creest dy Nazareth, ren shiuish y chrossey, eh ren Jee y hroggal veih ny merriu, dy jarroo liorishyn ta’n dooinney shoh ta ny hassoo kiongoyrt riu er n’gheddyn slane couyr. 11Shoh yn chlagh ren ny masoonee y vee-lowal, t’er jeet dy ve yn ard-chlagh chorneilagh. 12Chamoo ta saualtys ayns fer erbee elley: son cha vel ennym erbee elley fo niau er ny choyrt mastey deiney liorish oddys mayd saualtys y chosney.

13Nish tra hug ad my-ner dunnallys Pheddyr as Ean, as hoig ad nagh row ad agh deiney boght gyn-ynsagh, va yindys orroo, as hooar ad magh neesht dy row ad jeh fir-eiyrtee Yeesey. 14As fakin y dooinney v’er ny laanaghey ny hassoo mâroo, cha row fockle oc dy ghra n’oï. 15Agh tra v’ad er n’oardaghey ad dy gholl dy lhiattee ass y whuaiyl, hug ad nyn goyrle dy cheilley, 16Gra, Cre nee mayd rish ny deiney shoh? son dy vel dy jarroo mirril feer chronnal er ve jeant lioroo, ta fys ec ooilley cummaltee Yerusalem, as cha vod mainyn goll n’oï: 17Agh dy lhiettal shoh veih skeayley magh ny-sodjey mastey yn pobble, lhig dooin baggyrt dy gyere orroo, nagh loayr ad maghey shoh rish dooinney erbee ayns yn ennym shoh. 18As deïe ad orroo, as hug ad fo harey ad gyn dy loayrt edyr, ny dy ynsaghey ayns ennym Yeesey. 19Agh dreggyr Peddyr as Ean, as dooyrt ad roo, My te cairagh ayns shilley Yee dooinyn dy ve ny s’biallee diuish na da Jee, foddee shiu hene briwnys. 20Son cha vod shinyn agh loayrt shen ny ta shin er vakin as er chlashtyn. 21Myr shen lesh baggyrt sodjey orroo, lhig ad y raad daue, tra nagh daink lhieu nyn gerraghey ad, kyndagh rish y pobble: son va dy chooilley ghooinney gloyraghey Jee son ny v’ad er n’yannoo. 22Son va’n dooinney erskyn da-eed bleïn dy eash, er va’n mirril shoh dy lheihys er ny yannoo.

23As erreish da’n raad ve lhiggit daue, hie ad gys nyn sheshaght hene, as hug ad coontey daue jeh ooilley ny va ny ard-saggyrtyn as y chanstyr er ghra. 24As tra cheayll ad shen, hrog ad seose nyn goraa gys Jee lesh un aigney, as dooyrt ad, Hiarn, uss yn Jee t’er chroo niau as thalloo, as y faarkey, as ooilley ny t’ayndoo; 25Ta liorish beeal dty harvaant David er ghra, Cre’n-fa va ny Ashoonee cha elgyssagh, as y pobble goaill ayns laue nheeghyn fardalagh? 26Hass reeaghyn y thallooin seose, as va ny fir-reill er nyn jaglym cooidjagh noi yn Chiarn as noi e Chreest. 27Son ayns firrinys noi dty lhiannoo casherick Yeesey, t’ou er ny ooilaghey, va chammah Herod as Pontius Pilate marish ny Ashoonee as pobble Israel er nyn jaglym cooidjagh, 28Dy yannoo cre-erbee va dty laue as dty choyrle kiarit ro-laue dy yannoo. 29As nish, Hiarn, cur-my-ner nyn maggyrt: as giall da dty harvaantyn, dy vod ad lesh slane dunnallys dty ghoo y ockley magh, 30Liorish sheeyney magh dty laue dy lheihys: as dy vod cowraghyn as yindyssyn v’er nyn yannoo liorish ennym dty lhiannoo casherick Yeesey.

31As erreish daue v’er ghoaill padjer, chrie yn boayl raad v’ad er nyn jaglym cooidjagh; as v’ad ooilley lhieent lesh y Spyrryd Noo, as loayr ad goo Yee lesh dunnallys. 32As va’n earroo jeusyn ren credjal jeh’n un chree as yn un annym; chamoo dooyrt fer jeu, dy by-liesh hene va nhee erbee jeh e chooid-seihlt, agh va dy chooilley nhee oc ayns co-pharteeas cadjin. 33As lesh pooar vreeoil dymmyrk ny ostyllyn feanish jeh irree-seose-reesht y Chiarn Yeesey: as s’mooar y ghrayse v’orroo ooilley. 34Chamoo va laccal er unnane erbee nyn mast’ oc; son whilleen as va thieyn, ny thalloo oc, v’ad dyn greck ad, as cur lhieu feeagh yn chooid v’ad er chreck, 35As dyn goyrt eh sheese ec cassyn ny hostyllyn as va rheynn er ny yannoo er dy chooilley ghooinney cordail rish e eme. 36As Joses, va liorish ny ostyllyn sliennooit Barnabas (ta shen dy ghra ’sy ghlare ainyn, Mac ny gerjee) va ny Levite, as jeh cheer Cyprus, 37Ren yn thalloo v’echey y chreck, as hug eh lesh yn argid, as lhie eh sheese eh ec cassyn ny hostyllyn.