CAB. VI

1As ayns ny laghyn shen tra va earroo ny credjuee er nyn mishaghey, hug ny Grecianee stiagh plaiynt noi ny Hebrewyn, son dy row ny mraane-treoghe oc faagit magh gyn ayrn jeh’n ghiastyllys gagh-laa. 2Eisht deïe yn daa ostyl yeig er slane sheshaght ny credjuee dy cheilley, as dooyrt ad, Cha vel eh resoonagh shinyn dy aagail goo Yee, dy hirveish buird. 3Shen-y-fa, vraaraghyn, jeeagh-jee magh ny mast’ eu hene, son shiaght deiney dy ghoo mie, lane jeh’n Spyrryd Noo as jeh creenaght, dooinyn dy choyrt yn currym shoh orroo. 4Agh nee shinyn tannaghtyn kinjagh dy hirveish ayns padjer as preacheil y goo. 5As by-haittin lesh y cheshaght y raa shoh: as reih ad Steaon, dooinney va lane dy chredjue as jeh’n Spyrryd Noo, as Philip as Prochorus, as Nicanor, as Timon, as Parmenas, as Nicolas proselyte veih Antioch. 6Ad shoh hoie ad kiongoyrt rish ny ostyllyn: as tra v’ad er ghoaill padjer, hug ad nyn laueyn orroo. 7As ren goo Yee bishaghey; as daase earroo ny credjuee ny smoo as ny smoo ayns Jerusalem; as haink sheshaght vooar jeh ny saggyrtyn dy ve biallagh gys y chredjue. 8As va Steaon lane dy ghrayse as dy phooar, as ren eh yindyssyn mooarey as mirrilyn mastey’n pobble.

9Eisht dirree shiartanse jeh yn synagogue ta enmyssit ny Libertinee, as jeh ny Cyrenianee, as Alexandrianee, as jeusyn jeh Cilicia as Asia, pleadeil rish Steaon. 10As cha row ad abyl shassoo magh noi yn chreenaght as y spyrryd v’eshyn loayrt lesh. 11Eisht daill ad deiney dy ghra, Ta shin er chlashtyn eh shoh loayrt goan mollaghtagh noi Moses as noi Jee. 12As ghreinnee ad y pobble, as y chanstyr, as ny scrudeyryn, as haink ad as haare ad eh, as hug ad lhieu eh fenish y choonceil, 13As hoie ad seose feanishyn foalsey, ren gra, Ta’n dooinney shoh kinjagh loayrt goan mollaghtagh noi yn ynnyd casherick shoh as y leigh. 14Son ta shin er chlashtyn eh gra, dy jean Yeesey shoh dy Nazareth yn ynnyd shoh y stroie, as ny oardaghyn y chaghlaa ren Moses y livrey dooin. 15As yeeagh ooilley ny va ayns y choonceil dy gyere er, as honnick ad yn eddin echey myr dy beagh eh eddin ainle.