CAB. VIII

1As va aigney Saul lhieu ayns y choyrt eh gy-baase. As ec y traa shen va tranlaase er ny yannoo er yn agglish va ec Jerusalem; as v’ad ooilley er nyn skeayley magh trooid cheeraghyn Yudea as Samaria, cheu-mooie jeh ny ostyllyn. 2As hrog deiney crauee lhieu Steaon dy oanluckey eh, as ren ad dobberan hrimshagh harrish. 3Agh ren Saul cragh jeh’n agglish, goll stiagh ayns thieyn, as sleodey magh deiney as mraane, as dyn dilgey ad ayns pryssoon. 4Shen-y-fa hie yn vooinjer v’er nyn skeayley magh, trooid ymmodee ardjyn, preacheil y goo. 5Agh hie Philip sheese gys ard-valley Samaria, as ren eh Creest y phreacheil daue. 6As hug yn pobble geill lesh un aigney da’n goo va Philip dy loayrt, clashtyn as fakin ny mirrilyn v’eh dy yannoo. 7Son va Spyrrydyn neu-ghlen, geamagh lesh ard-choraa, cheet magh ass ymmodee va seaghnit lhieu: as va ymmodee va’n palsee orroo, as va baccagh er ny lheihys. 8As va boggey mooar ayns yn ard-valley shen. 9Agh va dooinney dy row enmyssit Simon, va er chliaghtey obbeeys ’syn ard-valley cheddin, as er chur shaghrynys er pobble Samaria, boggyssagh jeh hene dy ve ny ard-ghooinney ennagh. 10Da shoh v’ad ooilley cur tastey, beg as mooar, gra, Yn dooinney shoh pooar vooar Yee. 11As da shoh v’ad arrymagh, er-y-fa dy row eh ry-foddey er chur shaghrynys orroo lesh yn obbeeys echey. 12Agh tra v’ad er chredjal Philip, preacheil ny reddyn va bentyn rish reeriaght Yee, as ennym Yeesey Creest, v’ad er nyn mashtey chammah deiney as mraane. 13As va Simon hene er hyndaa gys y chredjue: as tra v’eh er ny vashtey, duirree eh marish Philip, goaill yindys, as cur tastey da ny mirrilyn as ny cowraghyn v’er nyn obbraghey. 14Nish tra va ny ostyllyn va ec Jerusalem er chlashtyn dy row Samaria er ghoaill goo Yee, hug ad huc Peddyr as Ean. 15As tra v’ad er jeet neose, ghuee ad er nyn son dy voddagh ad y Spyrryd Noo y gheddyn. 16(Son cha row eh foast er duittym er veg jeu: agh v’ad ynrycan er nyn mashtey ayns ennym y Chiarn Yeesey.) 17Eisht hug ad nyn laueyn orroo, as hooar ad y Spyrryd Noo. 18As tra honnick Simon dy row yn Spyrryd Noo er ny choyrt liorish goll-fo-laue ny hostyllyn, heb eh daue argid, 19Gra, Cur-jee dooys neesht yn phooar shoh, quoi-erbee ver-ym my laueyn er, dy vod eh yn Spyrryd Noo y gheddyn. 20Agh dooyrt Peddyr rish, Lhig da dty argid as oo hene cherraghtyn cooidjagh, er-yn-oyr dy vel oo er smooinaghtyn dy vod gioot Yee ve kionnit lesh argid. 21Cha vel aart ny paart ayd ’sy chirveish shoh: son cha vel dty chree ynrick ayns shilley Yee. 22Gow arrys er-y-fa shen jeh dty olkys, as guee gys Jee, hoiggal dy vod smooinaghtyn dty chree v’er ny leih dhyt. 23Son hee-ym dy vel oo ayns y ghall dy herriuid, as yn gheuley dy vee-chraueeaght. 24Eisht dreggyr Simon, as dooyrt eh, Guee-jee shiuish gys y Chiarn er my hon, nagh jig veg jeh ny reddyn ta shiuish er loayrt, orrym. 25As tra v’ad er n’ymmyrkey feanish as er phreacheil goo yn Chiarn, hie ad reesht gys Jerusalem, as ren ad y sushtal y phreacheil ayns ymmodee jeh baljyn ny Samaritanee. 26As loayr ainle y Chiarn rish Philip, gra, Trog ort, as immee my-yiass, gys y raad goll sheese veih Jerusalem gys Gaza, trooid yn aasagh. 27As hrog eh er, as jimmee eh: as cur-my-ner dooinney jeh Ethiopia, ny eunuch, as ayns ard-oik fo Candace ben-reïn ny Ethiopianee, fo’n churrym echey va ooilley ny tashtaghyn eck, va er jeet gys Jerusalem dy ooashlaghey Jee, 28As myr v’eh er y raad thie, ny hoie ayns e ainagh, as lhaih Esaias yn phadeyr. 29Eisht dooyrt y Spyrryd rish Philip, Immee er-gerrey as jean sheshaght rish yn ainagh shoh. 30As roie Philip huggey, as cheayll eh eh lhaih yn phadeyr Esaias, as dooyrt eh, Vel oo toiggal cre t’ou dy lhaih? 31As dooyrt eh, Kys oddym, mannagh bee fer ennagh aym dy chur roym? as ghuee eh er Philip eh dy heet seose, as dy hoie mârish. 32Yn ayrn jeh’n scriptyr v’eh dy lhaih, she shoh ve, V’eh er ny leeideil myr keyrrey gys y skynn, as myr yn eayn balloo roish e lommyrtagh, myr shen cha doshil eshyn e veeal: 33Kyndagh rish e injillid va e vriwnys er ny chassey: as quoi oddys fockley-magh e ghooghys [flaunyssagh]? son va e vioys goit ersooyl veih’n thalloo. 34As dansoor yn eunuch, as dooyrt eh rish Philip, Guee-ym ort, quoi jeh ta’n phadeyr loayrt shoh, nee jeh hene, ny jeh dooinney ennagh elley? 35Eisht doshil Philip e veeal, as ghow eh toshiaght ec y scriptyr cheddin, as ren eh Yeesey y phreacheil da. 36As myr v’ad goll er y raad, haink ad gys ushtey dy row: as dooyrt yn eunuch, Jeeagh, shoh ushtey; cre ta dy my lhiettal’s dy ve bashtit? 37As dooyrt Philip, My t’ou credjal lesh ooilley dty chree, foddee oo. As dreggyr eshyn as dooyrt eh, Ta mee credjal dy nee Yeesey Creest mac Yee. 38As doardee eh da’n ainagh shassoo: as hie ad ny-neesht sheese ayns yn ushtey, chammah Philip as yn eunuch; as vasht eh eh. 39As tra v’ad er jeet seose ass yn ushtey, hrog Spyrryd y Chiarn lesh Philip ersooyl nagh vaik yn eunuch eh arragh: as hie eh er y raad goaill boggey. 40Agh va Philip er ny gheddyn ec Azotus, as goll er e hoshiaght ren eh yn sushtal y phreacheil ayns ooilley ny ard-valjyn, derrey haink eh gys Cesarea.