CAB. IX

1As Saul foast fockley-magh haggyrtyn as baase noi credjuee yn Chiarn, jimmee eh gys yn ard-saggyrt, 2As hir eh veih screeunyn gys Damascus gys ny fir-reill, my yioghe eh veg jeh’n raad shen, edyr ad ve deiney ny mraane, dy chur lesh ad geulit gys Jerusalem. 3As myr v’eh er e yurnah, as tayrn er-gerrey da Damascus: doaltattym ren soilshey veih niau soilshean mygeayrt-y-mysh. 4As huitt eh gys y thalloo, as cheayll eh coraa gra rish, Saul, Saul, cre’n-fa t’ou jannoo tranlaase orrym? 5As dooyrt eh, Quoi oo, Hiarn? As dooyrt y Chiarn, Mish Yeesey t’ou jannoo tranlaase er: S’doillee dhyt brebbal noi ny jilg. 6As v’eh er-creau as fo atchim, as dooyrt eh, Hiarn, cre bailt mee dy yannoo? As dooyrt y Chiarn rish, Irree, as gow gys yn ard-valley, as bee eh inshit dhyt cre ta ort dy yannoo. 7As hass ny deiney va er nyn yurnah mârish as nyn dappey voue, son cheayll ad coraa, agh cha vaik ad dooinney erbee. 8As dirree Saul veih’n thalloo; as tra va e hooillyn er nyn vosley, cha vaik eh dooinney erbee: agh leeid ad eh er y laue, as hug ad lhieu eh gys Damascus. 9As v’eh three laa fegooish soilshey, as cha ren eh gee ny giu.

10As va dooinney dy row ec Damascus enmyssit Ananias, v’er jyndaa gys y chredjue, as rishyn dooyrt y Chiarn ayns ashlish, Ananias. As dooyrt eh, Cur-my-ner, ta mee ayns shoh, Hiarn. 11As dooyrt y Chiarn rish, Irree, as immee gys y traïd ta enmyssit y traïd Yeeragh, as jean briaght ayns thie Yudas, son fer ta enmyssit Saul jeh Tarsus: son cur-my-ner, t’eh ec padjer, 12As t’eh er vakin ayns ashlish dooinney enmyssit Ananias cheet stiagh, as cur e laue er, dy vod eh e hoilshey y gheddyn. 13Eisht dreggyr Ananias, Hiarn, ta mee er chlashtyn veih fer ny ghaa jeh’n dooinney shoh, dy mooar yn aggair t’eh er n’yannoo da dty nooghyn’s ec Jerusalem. 14As ayns shoh ta pooar echey veih ny ard-saggyrtyn, dy gheuley ooilley ny ta geamagh er dty ennym’s. 15Agh dooyrt y Chiarn rish, Immee royd: son t’eh ny haagh reiht dooys, dy ymmyrkey my ennym kiongoyrt rish ny Ashoonee, as reeaghyn, as cloan Israel. 16Son soilshee-yms da, cre ny seaghyn mooarey shegin da y hurranse son my ennym’s. 17As jimmee Ananias roish, as hie eh stiagh ayns y thie; as hug eh e laueyn er, as dooyrt eh, Vraar Saul, ta’n Chiarn (eer Yeesey honnick oo er y raad myr haink oo) er my choyrt’s, dy voddagh oo dty hoilshey y gheddyn, as ve lhieent lesh y Spyrryd Noo. 18As chelleeragh huitt veih ny sooillyn echey myr dy beagh eh scaailey; as hooar eh ec y traa cheddin e hoilshey, as dirree eh, as v’eh er ny vashtey. 19As tra v’eh er n’ghoaill beaghey, v’eh er ny niartaghey. Eisht duirree Saul shiartanse dy laghyn marish ny credjuee v’ayns Damascus. 20As chelleeragh ren eh Creest y phreacheil ayns ny kialteenyn, dy nee Mac Yee eh. 21Agh ghow ooilley ny va dy chlashtyn eh yindys mooar, as dooyrt ad, Nagh nee shoh eh va dy eiyrt gys baase adsyn va geamagh er yn ennym shoh ayns Jerusalem, as nagh daink eh er y chee shen dy chur lesh ad geulit gys ny ard-saggyrtyn? 22Agh daase Saul ny s’dunnallee dy chooilley laa, as hug eh nyn dhost ny Hewnyn va cummal ec Damascus, prowal dy nee shoh yn eer Creest firrinagh.

23As lurg ymmodee laghyn, hug ny Hewnyn nyn goyrle dy cheilley dy varroo eh: 24Agh hooar Saul fys dy row ad lhie cooyl-chlea er e hon, as freayll arrey ec ny giattyn oie as laa dy varroo eh. 25Eisht ghow ny credjuee eh ayns yn oie, as lhig ad eh sheese rish y voalley ayns baskad. 26As tra va Saul er jeet gys Jerusalem baillish eh-hene y lhiantyn gys sheshaght ny credjuee, agh v’ad ooilley ayns aggle roish, as chamoo ghow ad rish dy nee credjuagh v’eh. 27Agh ghow Barnabas eh, as hug eh lesh eh gys ny ostyllyn, as hoilshee eh daue, kys v’eh er vakin y Chiarn er y raad, as dy row eh er loayrt rish, as kys v’eh er phreacheil dy dunnal as dy foshlit ec Damascus ayns ennym Yeesey. 28As v’eh mâroo kinjagh cheet stiagh as goll magh ec Jerusalem. 29As loayr eh lesh dunnallys ayns ennym y Chiarn Yeesey, as ren eh pleadeil rish ny Grecianee: agh ghow adsyn ayns laue dy varroo eh. 30Agh tra hoig ny braaraghyn shoh, hug ad lhieu eh sheese gys Cesarea, as hug ad eh er e hoshiaght gys Tarsus. 31Eisht myr va fea ec ny kialteenyn trooid ooilley Judea, as Galilee, as Samaria, v’ad er nyn niartaghey ’sy chredjue; as gimmeeaght ayns aggle y Chiarn, as ayns gerjagh yn Spyrryd Noo, v’ad er nyn mishaghey.

32As haink eh gy-kione tra va Peddyr goll er e hoshiaght trooid ooilley ny ardjyn mygeayrt, dy daink eh neose myrgeddin gys ny nooghyn va baghey ec Lydda. 33As ayns shen hooar eh dooinney dy row va enmyssit Eneas, v’er chummal e lhiabbee rish hoght bleeaney, ayns y phalsee. 34As dooyrt Peddyr rish, Eneas, ta Yeesey Creest dy dty lheihys: irree, as jean dty lhiabbee. As dirree eh chelleeragh. 35As honnick ooilley cummaltee Lydda as Saron eh, as hyndaa ad gys y Chiarn.

36Nish va ec Joppa ben dy row jeh’n chredjue, yiarragh ad Tabitha r’ee, er aght elley Dorcas: va’n ven shoh berchagh ayns obbraghyn mie as giastyllys gys ny boghtyn. 37As haink eh gy-kione ayns ny laghyn shen, dy row ee ching, as dy dooar ee baase: as tra v’ad er niee ee, hug ad ee ny lhie ’syn ard-shamyr. 38As son wheesh as dy row Lydda er-gerrey da Joppa, as dy row ny credjuee er chlashtyn dy row Peddyr ayns shen, hug ad huggey daa ghooinney, guee er eh dy heet huc ayns dy chooilley hiyr. 39Eisht hrog Peddyr er, as hie eh mâroo. Tra v’eh er jeet, hug ad lhieu eh seose ’syn ard-shamyr: as hass ooilley ny mraane-treoghe mygeayrt-y-mysh keayney, as jeeaghyn da ny cooatyn as ny garmadyn va Dorcas er n’yannoo, choud as v’ee er-mayrn mâroo. 40Agh hug Peddyr ad ooilley magh, as ghlioon eh sheese, as ghow eh padjer, as hyndaa eh gys y chorp, as dooyrt eh, Tabitha, irree seose. As doshil ee e sooillyn: as tra honnick ee Peddyr, hoie ee seose. 41As ghow eh ee er y laue, as hrog eh seose ee: as tra v’eh er n’eamagh er ny nooghyn as ny mraane-treoghe, ren eh soiaghey ee kiongoyrt roo bio. 42As va shoh er ny hoilshaghey magh trooid ooilley Joppa; as ren ymmodee credjal ayns y Chiarn. 43As haink eh gy-kione, dy duirree eh ymmodee laghyn ayns Joppa marish tanner dy row va enmyssit Simon.