CAB. I

1Ashlish Amos, va mastey bochillyn Tekoa, shen honnick eh mychione Israel rish lhing Uzziah ree Yudah, as rish lhing Yeroboam, mac Yoash ree Israel, daa vleïn roish yn craa-thallooin. 2As dooyrt eh, Nee yn Chiarn freaney veih Zion, as fockley-magh e choraa veih Jerusalem: as nee ynnydyn-vaghee ny bochillyn dobberan, as nee mullagh Charmel fioghey. 3Shoh myr ta’n Chiarn dy ghra, Son three ard-pheccaghyn Ghamascus, as son kiare cha jyndaa-ym ersooyl e cherraghey: er-yn-oyr dy vel ad er woalley Gilead lesh soostyn yiarn. 4Agh ver-ym aile er thie Hazael, nee stroie plaaseyn Ven-hadad. 5Brish-ym myrgeddin giattyn Ghamascus, as astyr-ym yn cummaltagh ass strah Aven, as eshyn ta cummal yn lorg-reill ass thie Eden: as hed pobble Syria ayns cappeeys gys Kir, ta’n Chiarn dy ghra.

6Shoh myr ta’n Chiarn dy ghra, Son three ard-pheccaghyn Ghaza, as son kiare cha jyndaa-ym ersooyl e cherraghey: er-yn-oyr dy dug ad lhieu ersooyl, yn slane cappeeys, dy livrey ad seose gys Edom. 7Agh ver-yms aile er voalley Ghaza, nee stroie ny plaaseyn echey. 8As giare-yms jeh yn cummaltagh veih Ashdod, as eshyn ta gymmyrkey yn lorg-reill veih Ashkelon, as chyndaa-ym my laue noi Ekron; as nee sluight ny Philistinee cherraghtyn, ta’n Chiarn Jee dy ghra.

9Shoh myr ta’n Chiarn dy ghra, son three ard-pheccaghyn Tyrus, as son kiare cha jyndaa-ym ersooyl e cherraghey: er-yn-oyr dy livrey ad seose yn slane cappeeys gys Edom, as nagh chooinee ad er yn conaant braaragh. 10Agh ver-ym aile er voalley Tyrus, nee stroie ny plaaseyn echey.

11Shoh myr ta’n Chiarn dy ghra, Son three ard-pheccaghyn Edom, as son kiare cha jyndaa-ym ersooyl e cherraghey: er-yn-oyr dy deiyr eh er e vraar lesh y chliwe, as dy hilg eh jeh dy chooilley erreeish, as ren e chorree freaney dy kinjagh, as dreill eh e yymmoose son dy bragh. 12Agh ver-ym aile er Teman, nee stroie plaaseyn Vozrah.

13Shoh myr ta’n Chiarn dy ghra, Son three ard-pheccaghyn cloan Ammon, as son kiare cha jyndaa-ym ersooyl e cherraghey: er-yn-oyr dy vel ad er yiarey foshlit mraane torragh Ghilead, er-chee dy heeyney magh nyn ardjyn 14As neem’s foaddey aile er voalley Rabbah, as nee eh stroie ny plaaseyn echey; lesh yllaghey er laa yn chaggey, lesh dorrin er laa yn gheay-chassee: 15As hed nyn ree ayns cappeeys, eshyn as e phrinceyn cooidjagh, ta’n Chiarn dy ghra.