CAB. II

1Shoh myr ta’n Chiarn dy ghra, Son three ard-pheccaghyn Voab, as son kiare cha jyndaa-ym ersooyl e cherraghey: er-yn-oyr dy losht eh craueyn ree Edom gys eayl. 2Agh ver-ym aile er Moab, as nee eh stroie plaaseyn Kerioth, as yiow Moab baase lesh irree-magh, lesh yllaghey, as lesh sheean y trumpet. 3As giare-yms jeh yn briw veih yn vean echey, as marr-ym ooilley ny princeyn echey mârish, ta’n Chiarn dy ghra.

4Shoh myr ta’n Chiarn dy ghra, Son three ard-pheccaghyn Yudah, as son kiare cha jyndaa-ym ersooyl e cherraghey: er-yn-oyr dy ren ad beg y hoiaghey jeh leigh yn Chiarn, as nagh vel ad er vreayll e annaghyn, as hug nyn mreagyn ad er-shaghryn, as deiyr nyn ayraghyn da’n aght cheddin. 5Agh ver-ym aile er Judah, as nee eh stroie plaaseyn Yerusalem.

6Shoh myr ta’n Chiarn dy ghra, Son three ard-pheccaghyn Israel, as son kiare cha jyndaa-ym ersooyl e cherraghey: er-yn-oyr dy chreck ad cooish yn vooinjer chairal son argid, as yn ymmyrchagh son piyr vraag. 7Ta shêgin er stampey sheese king ny boghtyn gys joan y thallooin: agh cassey cooish yn ôney: as bee ec dooinney as e ayr dy yannoo rish yn un ven, gys oltooan my ennym’s casherick. 8As t’ad-hene lhie sheese er eaddagh gioaldee, liorish dagh altar, as t’ad giu, ayns thie yn jee-jalloo oc, y feeyn ocsyn t’ad-hene er gheyrey.

9Ny-yeih stroie mee yn Amorite kiongoyrt roo, va’n yrjid echey myr yrjid ny cedaryn, as v’eh lajer myr y darragh, ny-yeih hug mee naardey e vess veih heose, as ny fraueyn echey veih heese. 10Myrgeddin hug mee lhiam shiu seose veih thalloo Egypt, as leeid mee shiu da-eed bleïn trooid yn aasagh, dy ghoaill diu hene thalloo yn Amorite. 11As hrog mee seose ny mee eu son phadeyryn, as ny deiney aegey eu son Nazariteyn. Nagh vel eh eer myr shoh, O shiuish chloan Israel? ta’n Chiarn dy ghra. 12Agh hug shiu er ny Nazariteyn giu feeyn, as hug shiu ny phadeyryn fo harey, gra, Ny jean-jee phadeyrys. 13Cur-my-ner lhie-yms trome erriu myr cart laadit lesh bunneeyn. 14Cha bee sauchys cour ny coshee bieau, as cha bee bree erbee ayns troshid yn er lajer, chamoo nee yn treanagh eh-hene y livrey: 15Chamoo nee eshyn shassoo ta loaghtey yn vhow, ny yn coshee gastey sauail eh-hene, chamoo nee yn markiaght livrey eh-hene. 16As nee yn dooinney dunnal mastey ny treanee chea ersooyl rooisht er y laa shen, ta’n Chiarn dy ghra.