CAB. III

1Eaisht-jee rish goo yn vriwnys shoh, ta yn Chiarn er loayrt nyn ’oï, O chloan Israel, noi yn slane lught-thie shen, hug mee lhiam seose veih thalloo Egypt, gra, 2Shiuish ny-lomarcan ta mee er reih jeh ooilley kynneeyn y thallooin: shen-y-fa nee’m shiu y cherraghey son ooilley nyn mee-chraueeaght. 3Vod jees shooyl cooidjagh ayns mee-choardail? 4Jean lion buirroogh ayns y cheyll, tra nagh vel eh er hayrtyn e chragh? jean lion aeg gullyrnee veih yn ooig, mannagh vel eh er n’ghoaill monney? 5Vod ushag ve goit ayns ribbey er y vagher, raad nagh vel sniem soit er y hon? jean fer troggal seose ribbey veih yn thalloo, mannagh vel red ennagh goit ayn? 6Bee trumpet er ny heidey ayns yn ard-valley, as gyn y pobble ve agglit? bee seaghyn ayn, as nagh nee yn Chiarn t’er n’yannoo eh? 7Dy firrinagh, cha jean y Chiarn Jee nhee erbee, nagh vel eh soilshaghey yn folliaght da e harvaantyn ny phadeyryn. 8Ta’n lion er vuirroogh, quoi nagh gow aggle? ta’n Chiarn Jee er loayrt, quoi nagh jean phadeyrys?

9Cur-jee magh eam ayns cashtallyn Ashdod, as ayns ny thieyn reeoil ayns cheer Egypt, as abbyr-jee, Chaggle-jee shiu hene er sleityn Samaria: as cur-jee my-ner yn anvea seaghnagh t’ayn, as adsyn ta fo tranlaase ayn. 10Son cha vel geill oc da cairys, ta’n Chiarn dy ghra; quoi ta stoyral seose berchys ayns nyn blaaseyn liorish tranlaase as roosteyrys. 11Shen-y-fa, shoh myr ta’n Chiarn Jee dy ghra, Ver y noid, ta cruinnaghey stiagh dty heer, dty niart fo-chosh, as bee dty phlaaseyn er ny spooilley. 12Shoh myr ta’n Chiarn dy ghra, Myr ta’n bochilley goaill ass beeal yn lion daa chass, ny peesh dy chleaysh; myr shen vees cloan Israel, ta cummal ayns Samaria as Damascus, er ny livrey myr veih corneil lhiabbagh, ny cooill lhiaght. 13Eaisht-jee as feanish-jee ayns thie Yacob, ta’n Chiarn Jee dy ghra, Jee ny flaunyssee. 14Er y laa dy goym’s kerraghey er Israel son e ghrogh-yannoo, dy jean-yms myrgeddin kerraghey y ghoaill er altaryn Veth-el, as bee eairkyn yn altar er ny yiarey jeh, as tuittee ad gys y thalloo. 15As bwoaill-yms yn thie-geuree marish yn thie-souree, as nee ny thieyn-ivory goll naardey, as nee ny thieyn mooarey cherraghtyn, ta’n Chiarn dy ghra.