CAB. V

1Eaisht-jee rish yn goo shoh, ta mee goaill seose noi eu, eer dobberan hene, O hie Israel. 2Ta moidyn Israel er duittym, cha n’irree ee arragh: t’ee treigit er e thalloo hene, cha vel unnane dy hroggal seose ee. 3Son shoh myr ta’n Chiarn Jee dy ghra, Jeh yn ard-valley hie magh ny housane, cha bee faagit agh keead, as jeh shen hie magh keead, cha bee faagit agh jeih da thie Israel.

4Son shoh myr ta’n Chiarn dy ghra rish thie Israel, Shir-jee hym’s, as bee shiu bio. 5As ny shir-jee gys Beth-el, chamoo gow-jee stiagh ayns Gilgal, as ny immee-jee gys Beer-sheba: son hed Gilgal son shickyrys ayns cappeeys, as hed Beth-el naardey. 6Shir-jee gys y Chiarn, as bee shiu bio, er-aggle dy brish eh magh myr aile ayns thie Yoseph, as stroie eh, as nagh bee unnane erbee dy vooghey eh ayns Beth-el. 7Shiuish ta chyndaa briwnys gys ullymar, as jiooldey rish cairys ayns y theihll, 8Shir-jee huggeysyn ta jannoo ny shiaght rollageyn, as Orion, as chyndaa scadoo yn vaaish gys soilshey yn voghrey, as yn laa gys dorraghys yn oie: ta geamagh er ushtaghyn ny marrey, as deayrtey magh ad er eaghtyr ny hooirey, yn Chiarn yn ennym echey: 9Ta niartaghey yn tranlaasit noi yn tranlaasagh: myr shen dy jig yn tranlaasit noi yn chashtal. 10T’ad cur feoh dasyn, ta cur oghsan ’sy yiat, as dwoaie oc ersyn, ta loayrt dy ynrick. 11Son wheesh, er-y-fa shen, as dy vel shiu stampey fo-chosh yn voght, as goaill voish erraghyn dy churnaght; ta shiu er droggal thieyn dy chlaghyn cummit, agh cha jean shiu cummal ayndoo: ta shiu er hoiaghey magh garaghyn-feeyney eunyssagh, agh cha n’iu shiu jeh’n feeyn oc. 12Son shione dooys nyn ymmodee loghtyn as earroo nyn ard-pheccaghyn: t’ad seaghney yn vooinjer chairal, t’ad goaill leagh, as cassey cooish chairal y voght ’sy yiat. 13Shen-y-fa bee yn dooinney creeney ny host ayns lheid y traa, son s’olk yn traa te. 14Eiyr-jee er y vie, as cha nee er drogh raaidyn, dy vod shiu ve beayn: as myr shen bee yn Chiarn, Jee ny flaunyssee, mêriu, myr ta shiu er yeearree. 15Bee-jee dwoaiagh er yn olk, as aggindagh er y vie, as jean-jee briwnys y niartaghey ayns y yiat: foddee dy bee yn Chiarn Jee ny flaunyssee, graysoil da fooilliagh Yoseph. 16Shen-y-fa, myr shoh ta’n Chiarn, Jee ny flaunyssee, yn Chiarn dy ghra, Bee dobberan ayns ooilley ny straïdyn, as nee ad gra ayns ooilley ny raaidyn mooarey, Ah treih, treih: as nee ad geamagh er yn eirinnagh gys dobberan, as ny bardoonee schleioil gys keayney. 17As ayns dy chooilley gharey-feeyney vees coe: son hem dty hrooid’s, ta’n Chiarn dy ghra. 18Smerg diuish ta geearree laa yn Chiarn! cre’n vondeish te diu? ta laa yn Chiarn dorraghys, as cha nee soilshey. 19Myr dooinney ta chea veih lion, as meeiteil muc-awin: ny goll stiagh gys e hie, as lhie e laue er y voalley, as ard-nieu dy lhottey eh. 20Nagh bee laa yn Chiarn dorraghys, as cha nee soilshey? eer dorraghys hene, gyn failleish dy hoilshey?

21Ta ny laghyn feailley eu dwoaiagh as feohdagh dou, chamoo goym taitnys ayns bree nyn jaglym casherick. 22Ga dy vel shiu chebbal dooys ourallyn-losht, as nyn ourallyn-arran, cha jean-ym goaill roo: chamoo neem’s soiaghey jeh ourallyn-shee nyn maase roauyrey. 23Ersooyl voym lesh kiaull dty arraneyn, son cha n’eaisht-ym rish bingys dty violyn. 24Agh lhig da briwnys roie sheese myr ushtaghyn, as cairys myr thooilley niartal. 25Vel shiu er hebbal dooys ourallyn as chebballyn ’syn aasagh, son da-eed bleïn, O hie Israel? 26Agh ta shiu er n’ymmyrkey cabbane nyn Moloch as Chiun, ny jallooyn eu, rollage yn jee eu, ren shiu diu hene. 27Shen-y-fa, ver-ym erriu goll ayns cappeeys er cheu elley jeh Damascus, ta’n Chiarn dy ghra, ta’n ennym echey, Jee ny flaunyssee.