CAB. VI

1Smerg dauesyn t’ec aash ayns Zion, as coyrt nyn marrant er slieau Samaria, ta enmyssit ny ard-ashoonyn, hucsyn haink thie Israel. 2Immee-jee harrish gys Calneh, as cur-jee my-ner, as veih shen gow-jee gys Hemath mooar: eisht immee-jee sheese gys Gath ny Philistinee: vel ad shen ny share na ny reeriaghtyn shoh? ny’n chagliagh ocsyn ny s’lhea na’n chagliagh euish? 3Shiuish ta scughey yn laa seaghnagh foddey veue, as soie er stoyl-briwnys y tranlaase; 4Ta lhie er lhiabbaghyn ivory as sheeyney ad-hene er nyn lhiaghtyn, as gee ny eayin ass y chioltane, as ny lheiyee ass ny bwaneyn; 5Ta goaill arrane gys feiyr yn viol, as cummey daue hene greïnyn-kiaullee myr ren David; 6Ta giu feeyn ayns siyn costal, as dy ooilaghey ad-hene lesh ooilyn costal: agh cha vel ennaghtyn oc son seaghyn Yoseph. 7Shen-y-fa hed ad-hene ayns toshiaght yn nah chappeeys, as bee ny cuirraghyn rouanagh ocsyn er ny scughey. 8Ta’n Chiarn Jee er vreearrey liorish hene, ta’n Chiarn, Jee ny flaunyssee, gra, Ta dwoaie aym er mooaralys Yacob, as feoh aym er e chooyrtyn reeoil: shen-y-fa livrey-ym seose yn ard-valley, marish ooilley ny t’ayn. 9As hig eh gy-kione, my nee agh jeih deiney jeh’n un thie scapail, foast nee yn baase berraghtyn orroo. 10As nee carrey dooinney goaill seose eh, dy lostey yn corp, as dy chur lesh ny craueyn magh ass y thie, as nee eh gra rishyn ta ayns shamyryn sodjey stiagh y thie, Vel arragh mayrt? as jir eshyn, Cha vel: eisht jir eshyn, Bee dty host; son cha jig lhien gimraa er ennym y Chiarn. 11Son cur-my-ner, ta’n Chiarn coyrt sarey, as nee eh bwoalley yn thie ard lesh brishaghyn, as yn thie s’inshley lesh scoltaghyn.

12Vod cabbil roie harrish creggyn? ny dew traaue orroo? son ta shiu er hyndaa briwnys gys gall, as mess ny cairys gys yn aghaue. 13Shiuish ta goaill boggey ayns red gyn veg, ta gra, Nagh vel shin er n’ghoaill dooin eairkyn lesh nyn niart hene? 14Agh cur-my-ner, trog-ym seose noi eu ashoon, O hie Israel, ta’n Chiarn, Jee ny flaunyssee, dy ghra, as seaghney ad shiu veih cagliagh Hamath gys awin yn aasagh.