CAB. VII

1Myr shoh ta’n Chiarn Jee er hoilshaghey dooys, as cur-my-ner, ren eh kiaddey ny locustyn ayns toshiaght cur magh yn vaare s’jerree, as cur-my-ner, she yn baare s’jerree ve lurg fouyr yn ree. 2As haink eh gy-kione, erreish daue v’er stroie faiyr y thallooin, eisht dooyrt mee, O Hiarn Yee, leih dooin, ta mee guee ort; quoi nee Jacob y niartaghey? son t’eh faase. 3Er shoh va’n Chiarn myghinagh; Cha bee eh myr shen, dooyrt y Chiarn.

4Shoh myr ta’n Chiarn Jee er hoilshaghey dooys, as cur-my-ner ta’n Chiarn Jee er chur eam dy cherraghey lesh aile, as stroie eh yn diunid vooar, as hug eh naardey ayrn [jeh’n thalloo]. 5Eisht dooyrt mee, O Hiarn Yee, lhaggee dty laue, ta mee guee ort; quoi nee Jacob y niartaghey? son t’eh faase. 6Er shoh va’n Chiarn reesht myghinagh. Chamoo hig shoh erriu, ta’n Chiarn Jee dy ghra.

7Myr shoh hoilshee eh dooys: as cur-my-ner, hass y Chiarn er voalley, va troggit lesh line-level, as y line ny laue. 8As dooyrt y Chiarn rhym’s, Amos, cre t’ou fakin? As dooyrt mee, Line-level, Eisht dooyrt y Chiarn, Cur-my-ner, neem’s soiaghey line-level ayns mean my phobble Israel: cha jean-yms shaghney yn olk voue ny-sodjey. 9As bee ard-ynnydyn Isaac nyn draartys, as bee thieyn-sheaynt Israel er ny chur naardey; as nee’m brishey magh noi thie Yeroboam lesh y chliwe.

10Eisht hug Amaziah saggyrt Veth-el fys gys Jeroboam ree Israel, gra, Ta Amos er ghoaill coyrle follit dt’oï, ayns mean thie Israel: ver eh shoh yn thalloo bun-ry-skyn lesh ooilley e ghoan. 11Son myr shoh ta Amos gra, Yiow Jeroboam baase lesh y chliwe, as bee Israel son shickyrys er ny leeideil ersooyl nyn gappee, ass y cheer oc hene. 12Va Amaziah myrgeddin er ghra rish Amos, O uss fakyder, immee, cosne royd gys cheer Yudah, as fow dty veaghey ayns shen, as shen y raad jean phadeyrys. 13Agh ny jean phadeyrys arragh ec Beth-el: son ayns shen ta cabbal y ree, as y cooyrt reeoil.

14Eisht dreggyr Amos, as dooyrt eh rish Amaziah, Cha nee phadeyr va mish, chamoo va mee mac phadeyr: agh va mee my vochilley, as beaghey er figgyn feïe yn sycamore. 15As ghow yn Chiarn mee, myr deiyr mee er y chioltane, as dooyrt y Chiarn rhym, Immee, jean phadeyrys da my phobble Israel.

16Nish er-y-fa shen, eaisht uss rish goo yn Chiarn: t’ou gra, Ny jean phadeyrys noi Israel, as ny lhig fockle voïd noi thie Isaac. 17Shen-y-fa, shoh myr ta’n Chiarn dy ghra, Bee dty ven ny strumpag ’syn ard-valley, as nee dty vec as dty inneenyn tuittym lesh y chliwe, as bee dty halloo er ny rheynn lesh line: as yiow uss baase ayns cheer joarree, as hed Israel son shickyrys ayns cappeeys, ass y cheer oc hene.