CAB. VIII

1Shoh myr ta’n Chiarn Jee er hoilshaghey dooys, as cur-my-ner, baskad dy vessyn-souree. 2As dooyrt eh, Amos, cre t’ou fakin? As dooyrt mee, Baskad dy vessyn-souree. Eisht dooyrt y Chiarn rhym’s, Ta’n jerrey er jeet er my phobble Israel, cha lhiggym shaghey ny-sodjey. 3As bee kiaulleeaght y chiamble er ny hyndaa gys yllaghey, ’sy laa shen, ta’n Chiarn Jee dy ghra; bee ymmodee kirp marroo ayns dy chooilley voayl, tilgee ad magh ad dy follit.

4Eaisht-jee rish shoh, O shiuish ta sluggey seose ny ymmyrchee, as dy feer cur naardey boghtyn y thallooin, 5Gra, Cuin vees [feailley] yn eayst-noa harrish, dy vod mayd arroo y chreck? as y doonaght ec kione, dy gholl dy vargey lesh curnaght, jannoo yn ephah beg, as yn shekel mooar, as caghlaa ny meihaghyn ayns molteyrys? 6Dy vod mayd kionnaghey ny boghtyn son argid, as ny ymmyrchee son piyr vraag; dy jarroo as creck jerrey yn churnaght? 7Ta’n Chiarn er vreearrey liorish ooashley Yacob, Son shickyrys cha jarrood-ym dy bragh veg jeh ny obbraghyn oc. 8Nagh bee yn thalloo er-creau son shoh? as dy chooilley unnane dobberan ta cummal ayn? as nee eh gatt seose dy slane myr thooilley; as bee eh lhieent harrish, as er ny vaih myr liorish awin Egypt. 9As hig eh gy-kione ’sy laa shen, ta’n Chiarn Jee dy ghra, dy der-ym er y ghrian dy lhie ec y vun-laa, as nee’m y thalloo dorraghey ’sy laa hollys. 10As chyndaa-ym ny feaillaghyn eu gys dobberan, as ooilley ny arraneyn eu gys keayney, as ver-ym aanrit-sack er dy chooilley ghreeym, as meaylid er dy chooilley chione: as ver-ym er dy ve myr yn dobberan son ynrycan mac, as yn jerrey echey myr laa doogh.

11Cur-my-ner, ta ny laghyn cheet, ta’n Chiarn Jee dy ghra, dy der-ym genney ’sy cheer, cha nee genney arran ny laccal ushtey, agh genney clashtyn goan y Chiarn. 12As nee ad rouail veih keayn gy keayn, as veih yn twoaie eer gys y shiar, roie-ee ad noon as noal dy hirrey goo yn Chiarn, as cha vow ad eh. 13’Sy laa shen nee ny moidynyn aalin, as ny deiney aegey goll neeal lesh paays. 14Adsyn ta breearrey liorish peccah Samaria, as gra, Ta dty Yee’s bio, O Dan, as ta bioys ayns jee-jalloo Veer-sheba; dy feer, nee ad tuittym, as cha n’irree ad dy bragh arragh.