CAB. IX

1Honnick mee yn Chiarn ny hassoo erskyn yn altar, as dooyrt eh, Bwoaill linteyr yn dorrys, dy vod ny essynyn craa, as giare ad ooilley ’sy chione; as marr-ym yn sluight oc lesh y chliwe: eshyn ta roie er-chea jeusyn, cha gosnee eh lesh e vioys, as eshyn ta scapail jeu, cha bee eh er ny livrey. 2Ga dy gleiyagh ad gys niurin, veih shen nee my laue ad y ghoaill, as ga dy jed ad seose gys niau, veih shen ver-ym lhiam neose ad: 3As ga dy vollee ad ad-hene ayns mullagh Charmel, nee’m ronsaghey as goaill ad magh veih shen; as ga dy bee ad keillit ass my hilley ayns grunt ny marrey, shen y raad ver-ym sarey da’n ard-nieu, as nee eh ad y lhottey: 4As ga dy jed ad gys cappeeys kiongoyrt rish nyn noidyn, shen y raad ver-ym sarey da’n chliwe, as nee eh ad y varroo: as bee sooill aym orroo son olk, as cha nee son mie. 5As she yn Chiarn, Jee ny flaunyssee, ta bentyn rish y thalloo, as nee eh lheïe ersooyl, as nee ooilley ny ta baghey ayn dobberan, as nee eh gatt seose dy slane myr thooilley, as bee eh er ny vaih myr liorish awin Egypt. 6She eshyn eh ta troggal e hiamyryn ard ayns niau, as t’er chiaddey earroo [e chretooryn] er y thalloo; eshyn ta geamagh son ushtaghyn ny marrey, as deayrtey ad magh er eaghtyr y thallooin: yn Chiarn yn ennym echey. 7Nagh vel shiuish myr cloan ny Ethiopianee dooys, O chloan Israel? ta’n Chiarn dy ghra. Nagh nee mish hug lhiam seose Israel ass thalloo Egypt? as ny Philistinee veih Caphtor, as ny Syrianee veih Kir? 8Cur-my-ner, ta sooillyn y Chiarn Jee soit noi yn reeriaght peccoil, as ver-ym naardey ad er eaghtyr y thallooin; agh ny-yeih, cha jean-ym dy bollagh stroie thie Yacob, ta’n Chiarn dy ghra. 9Son cur-my-ner, ver-ym sarey, as nee’m creearey thie Israel mastey dy chooilley ashoon, myr ta arroo er ny reealley ayns creear, ny-yeih, cha bee yn grine sloo caillit er y thalloo. 10Yiow ooilley peccee my phobble baase lesh y chliwe, ta gra, Cha jean yn olk berraghtyn orrin, ny lhiettal shin.

11’Sy laa shen trog-ym seose cabbane-agglish Ghavid, ta er duittym, as slaanee-ym ny brishaghyn echey, as nee’m lhiasaghey reesht ny asseeyn t’ayn, as trog-ym eh seose myr ve ayns laghyn y chenn earish: 12Dy vod ad freayll ayns nyn gummal fooilliagh Edom, as ooilley ny ashoonee ta enmyssit orrym’s, ta’n Chiarn dy ghra, ta jannoo shoh. 13Cur-my-ner, ta ny laghyn cheet, ta’n Chiarn dy ghra, dy jean yn erroo berraghtyn er y beaynee, as y stampeyder feeyney er yn correyder; as nee ny sleityn shilley feeyn noa, as nee ooilley ny croink lheïe. 14As nee’m feaysley reesht cappeeys my phobble Israel, as nee ad troggal ny ard-valjyn ta naardey, as cummal ayndoo; as nee ad garaghyn-feeyney y hoiaghey, as giu jeh’n feeyn oc; nee ad myrgeddin garaghyn y yannoo, as gee yn mess oc. 15As nee’m soiaghey ad er y thalloo oc hene, as cha bee ad arragh er ny astyrt ass y cheer, ta mee er choyrt daue, ta’n Chiarn dty Yee dy ghra.