CAB. III

1My ta shiuish eisht er n’irree marish Creest, shir-jee ny reddyn shen ta er-nyn-skyn, raad ta Creest ny hoie er laue yesh Yee. 2Soie-jee nyn aignaghyn er reddyn flaunyssagh, as cha nee er reddyn thallooinagh: 3Son ta shiu marroo, as ta’n vea eu follit marish Creest ayns Jee. 4Tra vees Creest, ta’n vea ain, er ny hoilshaghey, eisht nee shiuish neesht cheet kionfenish mârishyn ayns gloyr. 5Smaghtee-jee er-y-fa shen ny oltyn thallooinagh eu; maarderys, neu-ghlennid, yeearree neu-chooie, drogh vian, as saynt seihltagh, ta dy chur ammys da jallooyn: 6Kyndagh rish ny reddyn shoh ta jymmoose Yee cheet er y chloan dy vee-viallys. 7Ayndoo hug shiu myrgeddin raad diu hene ayns y traa t’er n’gholl shaghey, tra ren shiu baghey ny-vud oc. 8Agh nish cur-jee shiuish myrgeddin veue ooilley ny reddyn shoh; corree, jymmoose, goanlys, goan mollaghtagh, glare neu-ghlen ass nyn meeal. 9Ny jean-jee breg ry-cheilley, fakin dy vel shiu er chur j’iu yn chenn ghooinney marish e obbraghyn; 10As dy vel shiu er chur erriu yn dooinney noa, ta er ny yannoo ass-y-noa ayns tushtey, lurg y co-chaslys echeysyn ren eshyn y chroo. 11Mârishyn cha vel edyr Greek ny Hew, giarey-chymmylt ny an-ghiarey-chymmylt, Barbarian, Scythian, sharvaant ny seyr: agh ta Creest ooilley, as ayns ooilley. 12Cur-jee erriu er-y-fa shen (myr cloan reiht Yee, casherick as graihagh) meeaghyn dy vyghin, kenjallys, injillid-aigney, meenid, surranse-foddey; 13Gymmyrkey yn derrey yeh lesh y jeh elley, as leih da ’cheilley, my ta dooinney erbee as streeu echey rish fer elley; dy jarroo myr ta Creest er leih diuish, myr shen myrgeddin jean-jee shiuish leih dauesyn. 14As erskyn ooilley ny reddyn shoh, cur-jee erriu graih, ta’n eer kiangley dy oays firrinagh. 15As lhig da shee Yee reill ayns ny creeaghyn eu, huggey myrgeddin ta shiu er nyn eam ayns un chorp; as bee-jee booisal. 16Lhig da goo Chreest tannaghtyn ayndiu dy palchey ayns dy chooilley chreenaght; gynsaghey as coyrlaghey yn derrey yeh yn jeh elley ayns psalmyn, as arraneyn-moyllee as spyrrydoil, goaill arrane lesh grayse ayns nyn greeaghyn gys y Chiarn. 17As cre-erbee ta shiu gra ny jannoo, jean-jee ooilley ayns ennym y Chiarn Yeesey, coyrt booise da Jee dy jarroo yn Ayr ny hrooidsyn. 18Shiuish vraane-poost, jean-jee shiu hene y injillaghey gys ny deiney-poost eu hene, myr te cooie ayns y Chiarn. 19Gheiney-poost, cur-jee graih da ny mraane eu, as ny bee-jee sharroo nyn ’oï oc. 20Chloan, cur-jee biallys da nyn ayr as nyn moir ayns dy chooilley nhee: son ta shoh booisal da’n Chiarn. 21Ayraghyn, ny jean-jee nyn gloan y vrasnaghey, er-aggle dy gaill ad nyn gree. 22Harvaantyn, bee-jee biallagh ayns dy chooilley nhee da nyn mainshteryn seihltagh; cha nee lesh shirveish-sooilley, myr dy wooiys deiney, agh ayns firrinys cree, goaill aggle roish Jee: 23As cre-erbee ta shiu dy yannoo, jean-jee eh dy creeoil, myr da’n Chiarn, as cha nee da deiney; 24Toiggal dy nee veih’n Chiarn yiow shiu yn leagh dy eiraght: son ta shiu shirveish yn Chiarn Creest. 25Agh eshyn ta jannoo aggair, bee eh cooilleenit son yn aggair t’eh er n’yannoo: as cha vel Jee jannoo soiagh jeh persoonyn.