CAB. IV

1Shiuish vainshteryn, cur-jee da nyn sharvaantyn shen ny ta cairagh as cooie, toiggal dy vel eu hene myrgeddin mainshter ayns niau. 2Jean-jee tannaghtyn ayns padjer, as bee-jee dooishtagh ’sy chooid cheddin lesh toyrt-booise; 3Marish shoh, goaill padjer myrgeddin er nyn son ainyn, dy jinnagh Jee fosley dooin dorrys dy ghlare vreeoil, dy loayrt folliaght Chreest, er y hon ta mish myrgeddin ayns geulaghyn: 4Dy voddym fockley magh eh, myr lhisin loayrt. 5Jean-jee gymmyrkey shiu hene dy tastagh ny-vud ocsyn ta mooie, jannoo yn chooid smoo jeh’n traa. 6Lhig da’n ghlare eu dy kinjagh ve jeant blaystal lesh y sollan dy ghrayse, dy vod fys y ve eu cre’n ansoor ver shiu da dy chooilley ghooinney. 7Nee Tychicus ooilley my stayd y hoilshaghey diu, ta ny vraar graihagh, as shirveishagh firrinagh, as sheshey sharvaant ayns y Chiarn: 8Eshyn ta mee er chur hiuish son yn eer oyr cheddin, dy voddagh eh geddyn toiggal jeh’n stayd euish, as ny creeaghyn euish y gherjaghey: 9Marish Onesimus braar firrinagh as graihagh, ta fer j’iu hene. Ver adsyn coontey diu jeh dy chooilley red ta jeant ayns shoh. 10Ta Aristarchus my heshey-pryssoonagh dy vannaghey diu, as Marcus mac shayrey Barnabas (mychione echey hooar shiu currym; my hig eh hiu jean-jee mooar jeh) 11As Jesus, ta enmyssit Justus, ta jeh’n ghiarey-chymmylt. Ad shoh ny-lomarcan my cho-labreeyn gys reeriaght Yee, ta er ny ve gerjagh dooys. 12Ta Epaphras, fer j’iu hene, sharvaant Chreest, dy vannaghey diu, dy kinjagh gleck dy jeean er nyn son eu ayns padjeryn, dy vod shiu shassoo dy shickyr as slane fondagh ayns ooilley aigney Yee. 13Son ta mee gymmyrkey feanish da, dy vel graih feer jeean echey er nyn son euish, as er nyn son ocsyn ta ayns Laodicea, as adsyn ta ayns Hierapolis. 14Ta Luke yn er-lhee graihagh, as Demas dy vannaghey diu. 15Bea as slaynt gys ny braaraghyn ta ayns Laodicea, as gys Nymphas, as gys y chaglym Creestee ta ayns e hie. 16As tra vees y screeuyn shoh lhaiht ny mast’ eu, jeeagh-jee dy bee eh myrgeddin er ny lhaih ayns keeill ny Laodiceanee: as dy jean shiuish myrgeddin lhaih yn screeuyn veih Laodicea. 17As abbyr-jee rish Archippus, Jeeagh dy jean oo cooilleeney yn oik casherick shen t’ou er gheddyn ayns y Chiarn. 18My vea as slaynt hiu fo my laue hene Paul. Cooinee-jee er my gheulaghyn. Grayse dy row mêriu. Amen.