CAB. I

1Ayns y trass vleïn jeh reill Yehoiakim ree Yudah, haink Nebuchadnezzar ree Vabylon gys Jerusalem, dy chaggey n’oï. 2As hug y Chiarn Jehoiakim ree Yudah fo’n laue echey, marish paart jeh siyn casherick thie Yee ad shoh hug eh lesh gys cheer Shinar, gys thie e Yee, as hug eh ny siyn ayns thie-tashtee e Yee.

3As loayr y ree rish Ashpenaz yn ard-eunuch, dy ghoaill huggey shiartanse dy chloan Israel, jeh’n sluight reeoil, as jeh ny princeyn; 4Cloan, nagh row assee erbee orroo, agh aalin as arryltagh gys creenaght, as aggindagh gys tushtey, as dy ghoaill ynsaghey, ny lheid’s va feeu dy hassoo ayns plaase y ree, as daue dy choyrt ynsaghey as glare ny Caldeanee. 5As doardee yn ree daue beaghey gagh-laa jeh boayrd y ree, as jeh’n feeyn v’eh hene dy iu: myr shen dy reir ad three bleeaney, as shen harrish, v’ad dy hassoo kiongoyrt rish y ree. 6Nish ny mast’ oc shoh va, jeh cloan Yudah, Daniel, Hananiah, Mishael as Azariah: 7Dauesyn hug yn ard-eunuch enmyn: son hug eh er Daniel yn ennym Belteshazzar, as er Hananiah, Shadrach, as er Mishael, Meshach, as er Azariah, Abed-nego.

8Agh va Daniel kiarit ayns e chree, nagh jinnagh eh neu-ghlen jeh hene, lesh lhongey veih boayrd y ree, ny lesh y feeyn diu eh: shen-y-fa, ghuee eh er yn ard-eunuch, nagh beagh eh êginit dy leodaghey eh-hene. 9Nish hug Jee er Daniel dy ve ayns foayr as slane aigney-mie rish yn ard-eunuch. 10As dooyrt yn ard-eunuch rish Daniel, Ta mee ayns aggle roish my hiarn y ree, ta er phointeil diu nyn mee as nyn yough: son my hee-ys eh yn eddin euish, as neeal smessey orroo na er nyn goasanyn: eisht ver shiu mee ayns gaue my ching roish y ree. 11Eisht dooyrt Daniel rish Melzar, fo’n churrym echeysyn va’n ard-eunuch er choyrt Daniel, Hananiah, Mishael, as Azariah, 12Prow dty harvaantyn, guee-ym ort, jeih laa, as lhig dooin beaghey er messyn y thallooin, as giu ushtey. 13Eisht gow uss baght jeh ny eddinyn ain, as eddin ny scollagyn ta gee cooid-ronney veih boayrd y ree; as myr t’ou fakin, dell rish dty harvaantyn. 14Myr shen lhig eh lhieu ’sy chooish shoh, as phrow eh ad jeih laa. 15As ec kione ny jeih laa va ny eddinyn oc jeeaghyn ny s’aalin as ny s’ruishagh ayns feill na ooilley ny scollagyn, va gee jeh’n chooid-ronney reeoil. 16Er shoh ghow Melzar ersooyl yn cronney shen dy vee, as y feeyn va kiarit daue; as hug eh daue mess hallooinagh.

17Agh er son ny kiare scollagyn shoh, hug Jee daue tushtey as schleï ayns dy chooilley ynsaghey as creenaght: as va fysseree ec Daniel ayns dy chooilley cheint dy ashlishyn as dreamallyn. 18Nish ec kione ny laghyn shen va’n ree er ghoardrail dy chur lesh stiagh ad, eisht hug yn ard-eunuch lesh stiagh ad fenish Nebuchadnezzar. 19As ren y ree taggloo roo, as nyn mast’ oc ooilley cha row fer ry-gheddyn casley rish Daniel, Hananiah, Mishael as Azariah: shen-y-fa hass ad kiongoyrt rish y ree. 20As ayns dy chooilley chooish dy chreenaght as toiggal, va’n ree briaght jeu, hooar eh ad jeih keayrtyn share na ooilley ny deiney-creeney as rollageydee v’ayns ooilley e reeriaght. 21As shoh myr va Daniel, eer derrey’n chied vleïn jeh ree Cyrus.