CAB. XII

1As ec y traa shen, shassee Michael seose, yn ard-phrince, ta ass lieh cloan dty phobble, as hig traa seaghnagh, lheid as nagh row rieau neayr va ashoon, gys yn eer traa cheddin: as ec y traa shen bee dty phobble er ny livrey, dagh unnane vees ry-gheddyn scruit ayns y lioar. 2As nee ymmodee jeusyn, ta cadley ayns joan ny hooirey, doostey, paart gys bea dy bragh farraghtyn, as paart gys nearey as oltooan dy bragh farraghtyn. 3As nee adsyn ta creeney soilshean casley rish sollyssid yn aer, ad adsyn ta chyndaa ymmodee gys cairys, myr ny rollageyn, son dy bragh as dy bragh. 4Agh uss, O Ghaniel, jeigh seose ny goan, as seal y lioar, eer gys traa yn jerrey: nee ymmodee roie noon as noal, as bee tushtey er ny vishaghey.

5Eisht yeeagh mish Daniel, as cur-my-ner va jees elley nyn shassoo, fer er y cheu shoh jeh broogh ny hawin, as fer er y cheu elley jeh broogh ny hawin. 6As dooyrt fer jeu rish y dooinney va coamrit ayns aanrit, va er ushtaghyn ny hawin, Caïd vees eh gys jerrey ny yindyssyn shoh? 7As cheayll mee yn dooinney coamrit ayns aanrit, va er ushtaghyn ny hawin, tra chum eh seose e laue yesh, as e laue hoshtal gys niau, as loo eh liorishyn ta bio son dy bragh, dy bee eh son traa, traaghyn, as lieh traa, as tra vees eh dy slane bollagh er chooilleeney scaalhean pooar y phobble casherick, bee ooilley ny reddyn shoh jeant mie. 8As cheayll mee, agh cha hoig mee: eisht dooyrt mee, O my hiarn, cre vees jerrey ny reddyn shoh? 9As dooyrt eh, Immee royd, Ghaniel: son ta ny goan jeight seose, as sealit, gys traa yn jerrey. 10Bee ymmodee er ny ghlenney, as jeant gial, as er ny phrowal; agh ver ny drogh-yantee rish olk; as cha jean veg jeh ny mee-chrauee toiggal, agh bee yn vooinjer chreeney toiggalagh. 11As veih yn traa, dy bee yn oural-laaoil er ny ghoaill ersooyl, as yn eajeeys dy hraartys er ny hoiaghey seose, bee thousane daa cheead as kiare-feed as jeih dy laghyn. 12Bannit ta eshyn ta farkiaght as ta cheet gys y thousane three cheead as y wheiggoo-yeig as feedoo laa. 13As immee uss royd, derrey vees y jerrey: son bee oo ec fea, as shassoo ayns dty chronney ec jerrey ny laghyn.