CAB. II

1As ayns y nah vleïn jeh reill Nebuchadnezzar, honnick Nebuchadnezzar ashlish ayns e ghreamallyn, hug sneih er e spyrryd, as hie e chadley voish. 2Eisht doardee yn ree dy eamagh er ny deiney-creeney, as ny rollageydee, as ny fir-ysseree, as ny Caldeanee, dy hoilshaghey da’n ree e ghreamallyn: myr shen haink ad, as hass ad fenish y ree. 3As dooyrt y ree roo, Va dreamal aym, as va my spyrryd seaghnit dy gheddyn magh yn dreamal. 4Eisht loayr ny Caldeanee rish y ree ayns Syriack, Dy voddey beayn dhyt’s, O ree: insh da dty harvaantyn y dreamal, as soilshee mayd dhyt cre t’er ny hoiggal liorish. 5Dreggyr y ree, as dooyrt eh rish ny Caldeanee, Ta’n red er n’gholl voym: mannagh jean shiu soilshaghey dou yn dreamal as bun y choyrt er, bee shiu er ny yiarey ayns peeshyn, as ny thieyn eu jeant ny horran. 6Agh my nee shiu yn dreamal y hoilshaghey dou, as cre t’er ny hoiggal liorish, yiow shiu voym giootyn, as leagh, as ooashley vooar: er-y-fa shen jeeagh-jee dou yn dreamal, as cre t’er ny hoiggal liorish. 7Dreggyr ad reesht, as dooyrt ad, Lhig da’n ree ginsh da e harvaantyn yn dreamal; as ver mayd bun er yn ashlish. 8Dansoor y ree, as dooyrt eh, Ta fys aym son shickyrys, dy vel shiu shirrey cosney traa, er-yn-oyr dy vel shiu fakin dy vel y red er n’gholl voym. 9Agh mannagh jean shiu soilshaghey dou yn dreamal, cha vel ayn agh yn un vriwnys nyn gour: son ta shiu er chiaddey goan breagagh as molteyragh dy loayrt kiongoyrt rhym, derrey vees y traa ceaghlit: shen-y-fa insh-jee dou yn ashlish, as eisht bee fys aym dy vod shiu bun y choyrt er. 10As dreggyr ny Caldeanee fenish y ree, as dooyrt ad, Cha vel dooinney er yn ooir, oddys soilshaghey cooish y ree: shen-y-fa cha vel ree erbee, ny reejerey, ny fer-reill erbee, ta er hirrey lheid ny reddyn veih dooinney-creeney erbee, ny rollageydagh, ny Caldean. 11As te red neu-chadjin ta’n ree dy hirrey, as cha vel fer erbee elley oddys soilshaghey shoh fenish y ree, er-lhimmey jeh ny flaunyssee hene, nagh vel y cummal oc marish deiney. 12Er shoh va’n ree jiarg-chorree, as eer er-finnue, as hug eh magh sarey dy stroie ooilley deiney-creeney Vabylon. 13As hie yn sarey magh son stroie ny deiney-creeney; as v’ad shirrey son Daniel as e heshaghyn dy stroie ad.

14Eisht dreggyr Daniel, lesh coyrle as creenaght, rish Arioch ard-arreyder y ree, va er n’gholl magh dy varroo deiney-creeney Vabylon. 15Dreggyr eh, as dooyrt eh rish Arioch captan y ree, Cre’n-fa ta’n order cha siyragh veih’n ree? Eisht hoilshee Arioch yn chooish da Daniel. 16Eisht hie Daniel stiagh, as yeearree eh er y ree dy chur traa da, as dy jinnagh eh soilshaghey da’n ree bun yn ashlish. 17Eisht hie Daniel gys e hie, as hoilshee eh yn chooish da Hananiah, Mishael as Azariah e heshaghyn: 18Ad dy yeearree myghinyn er Jee ny flaunys mychione y folliaght shoh; nagh jinnagh Daniel as e heshaghyn cherraghtyn, marish y chooid elley jeh deiney-creeney Vabylon.

19Eisht va’n folliaght er ny hoilshaghey da Daniel ayns ashlish ’syn oie: eisht vannee Daniel Jee ny flaunys. 20Dreggyr Daniel as dooyrt eh, Bannit dy row ennym Yee son dy bragh as dy bragh, son leshyn ta creenaght as niart. 21As t’eh caghlaa ny traaghyn as ny imbaghyn, t’eh scughey reeaghyn as soiaghey seose reeaghyn, t’eh coyrt creenaght dauesyn ta creeney, as tushtey dauesyn ta toiggal tushtey. 22T’eh soilshaghey magh ny nheeghyn dowin as follit, t’eh toiggal cre ta ’sy dorraghys, as mârishyn ta’n soilshey cummal. 23Ta mee cur booise dhyt’s, as dy dty voylley, O uss Yee my ayraghyn, ta er choyrt dou creenaght as niart, as nish er hoilshaghey dou shen va shin dy yeearree ort: son t’ou nish er hoilshaghey dooin cooish y ree.

24Shen-y-fa hie Daniel stiagh gys Arioch, va’n ree er phointeil dy stroie deiney-creeney Vabylon; hie eh, as shoh myr dooyrt eh rish, Ny stroie uss nish deiney-creeney Vabylon: cur lhiat mish stiagh fenish y ree, as soilshee-yms da’n ree bun y chooish. 25Eisht hug Arioch lesh Daniel stiagh dy tappee kionfenish y ree, as shoh myr dooyrt eh rish, Ta mee er gheddyn dooinney jeh cloan cappeeys Yudah nee soilshaghey da’n ree bun yn ashlish. 26Dreggyr y ree, as dooyrt eh rish Daniel, va enmyssit Belteshazzar, Vel uss son soilshaghey dooys yn dreamal, as dy choyrt bun er? 27Dansoor Daniel fenish y ree, as dooyrt eh, Yn folliaght ta’n ree er yeearree, cha vod ny deiney-creeney, ny rollageydee, ny fallogyssee, ny ny fir-ysseree soilshaghey da’n ree: 28Agh ta Jee ayns niau, ta soilshaghey folliaghtyn, as t’eh coyrt toiggal da’n ree Nebuchadnezzar, cre vees ayns ny laghyn jerrinagh. Yn dreamal ayd’s, as ashlishyn dty chione, er dty lhiabbee, v’ad shoh; 29(Er dty hon’s, O ree, haink smooinaghtyn dowin ayns dty chree er dty lhiabbee, cre va kiarit dy heet gy-kione ayns ny earishyn ny lurg shoh; as ta eshyn, ta soilshaghey folliaghtyn, coyrt dhyt’s toiggal cre ta kiarit dy heet: 30Agh er my hon’s, cha vel y folliaght shoh er ny hoilshaghey dooys, son veg y chreenaght dy vel aym’s erskyn dooinney erbee elley dy vel bio, agh er y choontey ocsyn, nee soilshaghey da’n ree bun yn ashlish, as dy choyrt dhyt’s toiggal ayns smooinaghtyn dty chree).

31Honnick uss, O ree, as hug oo my-ner jalloo mooar; va’n jalloo mooar shoh, as erskyn-towse sollys, ny hassoo kiongoyrt rhyt, as va’n cummey echey atchimagh. 32Va kione y jalloo shoh jeh glen airh, e chleeau as e roihaghyn dy argid, e volg as e lheaystyn dy phrash, 33Ny lurgaghyn echey dy yiarn, e chassyn ayrn jeu yiarn, as ayrn cray. 34Er-lhiat dy row clagh cleiyt fegooish laueyn, ren bwoalley yn jalloo er e chassyn, va dy yiarn as cray, as vrish ad ayns peeshyn. 35Eisht va’n yiarn, yn chray, yn phrash, yn argid, as yn airh brisht ayns peeshyn dy cheilley, as v’ad casley rish coau yn laare-vooie-souree, as heeb yn gheay lesh ersooyl ad, nagh row ynnyd erbee ry-gheddyn daue, as haink y chlagh, woaill y jalloo, dy ve slieau mooar, as lhieen eh yn slane seihll.

36Shoh yn dreamal; as nee mayd soilshaghey yn bun echey, fenish y ree. 37T’ou uss, O ree, dty ree dy reeaghyn, son ta Jee ny flaunys er choyrt dhyt reeriaght, pooar, as niart, as gloyr. 38As raad erbee dy vel cloan gheiney cummal, t’eh er choyrt fo dty laue, maase y vagheragh, as eeanlee yn aer, as er chur dhyt’s yn reill harrystoo ooilley: uss yn kione airhey shoh. 39As dty lurg’s hroggys reeriaght elley ny s’faase na uss, as y trass reeriaght elley dy phrash, nee reill harrish ooilley yn seihll. 40As bee yn chiarroo reeriaght lajer myr yiarn, son wheesh as dy vel yiarn brishey ayns peeshyn, as grineenaghey dy chooilley nhee; as casley rish yiarn ta brishey ad shoh ooilley, nee eh brishey ayns peeshyn as broo. 41As son wheesh as dy vaik oo ny cassyn as ny ordaagyn, ayrn dy chray yn phasheyder, as ayrn dy yiarn; bee yn reeriaght er ny rheynn, agh bee ayn niart yn yiarn, ’naght myr honnick oo yn yiarn kione y chray hallooin. 42As myr va ordaagyn ny coshey ayrn dy yiarn, as ayrn dy chray: myr shen bee yn reeriaght ayns ayrn lajer, as ayns ayrn brishlagh. 43As son wheesh as dy vaik oo yiarn kione y chray hallooin, nee ad seiy ad hene fud sluight deiney, agh cha jean ad lhiantyn dy cheilley, eer myr nagh vel yiarn taah rish cray. 44As rish lhing ny reeaghyn shoh, nee Jee ny flaunys soiaghey seose reeriaght, nagh bee dy bragh er ny stroie: as cha bee yn reeriaght faagit da pobble elley, agh brishee eh ayns peeshyn, as ver eh mow ooilley ny reeriaghtyn shoh, as nee eh shassoo son dy bragh. 45Son wheesh as dy vaik oo, dy row yn clagh cleiyt ass y clieau gyn laueyn, as dy vrish eh ayns peeshyn yn yiarn, y phrash, y chray, yn argid, as yn airh; ta’n Jee mooar er hoilshaghey da’n ree, cre hig gy-kione ny lurg shoh: as ta’n dreamal firrinagh, as y bun t’er shickyr.

46Er shoh huitt yn ree Nebuchadnezzar er e eddin, as hug eh ooashley da Daniel, as doardee eh dy beagh gioot costal, as leagh er ny hebbal da. 47Dreggyr y ree Daniel, as dooyrt eh, Ta’n Jee euish son shickyrys Jee dy yeeghyn, as Chiarn er reeaghyn, as soilsheyder folliaghtyn, fakin dy row uss son y folliaght shoh y hoilshaghey. 48Eisht ren y ree ny ghooinney ooasle jeh Daniel, as hug eh da ymmodee giootyn mooarey, as hug eh da yn reill harrish slane rheam Vabylon, as yn ard-chiannoortys harrish ooilley deiney-creeney Vabylon. 49As hir Daniel er y ree, as hoie eh Shadrach, Meshach as Abed-nego harrish cooishyn rheam Vabylon: agh va Daniel soie [ny vriw] ayns giat y ree.