CAB. V

1Ren Belshazzar y ree cuirraghyn mooarey da thousane jeh e hiarnyn, as diu eh feeyn marish y thousane. 2As tra va Belshazzar er-meshtey lesh feeyn, doardee eh dy hoiaghey roish ny siyn argid as airh, va e ayr Nebuchadnezzar er n’ghoaill ass y chiamble, va ayns Jerusalem, son y ree as e phrinceyn, e vraane-poost, as e cho-lhiabbee dy iu assdoo. 3Eisht hug ad lhieu ny siyn airh va goit ass chiamble thie Yee, va ayns Jerusalem; as diu yn ree, e phrinceyn, e vraane-poost, as e cho-lhiabbee assdoo. 4Diu ad feeyn, as hug ad moylley da ny jeeghyn-jalloo dy airh, dy argid, dy phrash, dy yiarn, dy fuygh, as dy chlagh.

5Ayns yn oor cheddin, haink meïr laue dooinney magh, as scrieu eh erskyn y chainlere, er plaister voalley plaase y ree; as honnick yn ree yn ayrn jeh’n laue va scrieu. 6Eisht va eddin y ree er ny chaghlaa, as va sneih er e aigney, myr shen dy row juntyn e veeghyn er ny lhaggaghey, as woaill e ghlioonyn noi-ry-hoi. 7Dyllee yn ree dy ard, ad dy chur lhieu stiagh ny rollageydee, ny Caldeanee, as ny fir-ysseree: as loayr y ree, as dooyrt eh rish deiney-creeney Vabylon, Quoi-erbee lhaihys yn screeu shoh, as ver dooys bun er, bee eh er ny choamrey lesh scarleod, as boandey airhey mysh e wannal, as bee eh yn trass reiltagh ’sy reeriaght. 8Eisht haink stiagh ooilley deiney-creeney yn ree, agh cha daink eh lhieu dy lhaih yn screeu, ny dy hoilshaghey da’n ree, cre v’er ny hoiggal liorish. 9Eisht va ree Belshazzar dy mooar seaghnit, as va e eddin er ny chaghlaa, as chaill e hiarnyn nyn dappey.

10Nish er coontey goan y ree as e hiarnyn, haink y ven-reïn stiagh gys thie ny cuirraghyn, as loayr y ven-reïn, as dooyrt ee, Dy voddey beayn da’n ree! ny lhig da dty smooinaghtyn oo y heaghney, chamoo lhig da dty eddin ve er ny chaghlaa. 11Ta dooinney ayns dty reeriaght, ta spyrryd ny flaunyssee noo ayn, as rish lhing dty ayrey, va soilshey, as tushtey, as creenaght casley rish creenaght ny flaunyssee ry-gheddyn aynsyn; eh ren ree Nebuchadnezzar dty ayr ny vainshtyr harrish ny deiney-creeney, ny rollageydee, ny Caldeanee, as ny fir-ysseree. 12Son wheesh as dy row er ny gheddyn ayns y Daniel cheddin, eh denmys yn ree Belteshazzar, ard-spyrryd dy chreenaght, as tushtey, as toiggal cur bun er ashlishyn, as soilshaghey, feyshtyn, as reaghey cooishyn dorraghey: nish lhig da Daniel ve sumnit, as nee eshyn soilshaghey cre t’er ny hoiggal liorish. 13Eisht hug ad lhieu Daniel stiagh fenish y ree; as loayr y ree, as dooyrt eh rish Daniel, Nee uss yn Daniel shen, ta jeh cappeeys cloan Yudah, hug y ree my ayr lesh veih Jewry? 14Ta mee er chlashtyn jeed’s, dy vel spyrryd ny flaunyssee aynyd, as dy vel soilshey, as tushtey, as ard-chreenaght ry-gheddyn aynyd’s. 15As nish ta ny deiney-creeney, ny rollageydee er ve sumnit kiongoyrt rhym, dy lhaih yn screeu shoh, as soilshaghey cre t’er ny hoiggal liorish: agh cha daink eh lhieu shoh dy hoilshaghey bun y chooish. 16As ta mee er chlashtyn my-dty-chione, dy vel oo son cur bun er ashlishyn, as reaghey cooishyn doillee; nish my oddys oo lhaih yn screeu, as soilshaghey dou cre t’er ny hoiggal liorish, bee oo er dty choamrey lesh scarleod, as boandey airhey mysh dty wannal, as bee oo yn trass reiltagh ’sy reeriaght.

17Eisht dreggyr Daniel, as dooyrt eh fenish y ree, Freill dty yiootyn dhyt hene, as as cur dty leagh da fer elley, ny-yeih, lhaih-yms yn screeu da’n ree, as soilshee-ym da cre t’er ny hoiggal liorish. 18O uss y ree, hug y Jee smoo syrjey da Nebuchadnezzar dty ayr reeriaght, as ooashley reeoil, as gloyr, as onnor. 19As er coontey yn ard-ooashley hug eh da, va dy chooilley phobble, ashoonyn as glaraghyn er-creau, as ayns aggle kiongoyrt rish: adsyn baillish, varr eh, as adsyn baillish, dreill eh bio, as adsyn baillish, hoie eh seose, as adsyn baillish, hug eh sheese. 20Agh tra va e chree er n’att lesh moyrn, as e aigney er ny chreoghey ayns mooaralys, v’eh currit neose veih e stoyl-reeoil, as ghow ad e ghloyr voish: 21As v’eh eebrit magh veih cloan gheiney; as haink e chree dy ve myr cree baagh, as va e chummal mârish ny assylyn oaldey: ren eh gyndyr er faiyr myr ny dew, as va e chorp fluigh lesh druight yn aer; derrey hooar eh toiggal, dy vel y Jee smoo syrjey reill ayns reeriaght deiney, as dy vel eh soiaghey harrish quoi-erbee saillish hene. 22As cha vel uss e vac, O Velshazzar, er n’injillaghey dty chree, ga dy row fys ayd’s er ooilley shoh; 23Agh t’ou er n’irree-magh noi Chiarn ny flaunyssee, as t’ad er choyrt lhieu siyn [casherick] e hiamble kiongoyrt rhyt, as t’ou uss, as dty hiarnyn, as dty vraane, as dty cho-lhiabbee er n’iu feeyn assdoo: as t’ou er choyrt moylley da ny jeeghyn-jalloo dy argid, as airh, dy phrash, yiarn, fuygh as clagh, nagh vel fakin, ny clashtyn, ny toiggal: as y Jee shen, ayns y laue echey ta dty ennal, as ’syn enish echeysyn ta ooilley dty raaidyn, cha vel oo er ghloyraghey. 24Eisht va’n ayrn shen jeh’n laue currit magh veihsyn, as va’n screeu shoh jeant.

25As shoh yn screeu va jeant, MENE MENE, TEKEL UPHARSIN. 26Shoh bun y chooish; MENE, ta Jee er ghoaill earroo dty reeriaght, as er choyrt kione er. 27TEKEL, t’ou er ny howse ayns ny meihaghyn, as er dty gheddyn eddrym. 28PERES, ta dty reeriaght er ny rheynn, as er ny choyrt da ny Medeyn as ny Persianee. 29Eisht doardee Belshazzar, dy beagh Daniel er ny choamrey lesh scarleod, as dy chur boandey airhey mysh e wannal, as dy ockley magh order my-e-chione, Dy beagh eh yn trass reiltagh ayns y reeriaght.

30’Syn oie cheddin va Belshazzar ree ny Caldeanee er ny varroo. 31As haink Darius yn Median gys yn reeriaght, tra v’eh three-feed bleïn as jees.