CAB. VII

1Ayns y chied vleïn jeh Belshazzar ree Vabylon, va dreamal ec Daniel, ashlishyn e chione er e lhiabbee: eisht scrieu eh yn dreamal, as hoilshee eh bun y chooish. 2Loayr Daniel as dooyrt eh, Honnick mee ayns m’ashlish ’syn oie, as cur-my-ner, va ny kiare geayghyn yn aer, as ad streeu er yn aarkey vooar. 3As haink kiare beishtyn mooar seose veih yn aarkey, nagh row goll ry-cheilley. 4Va’n chied er jeu goll-rish lion, lesh skianyn urley: as yeeagh mee, derrey va ny skianyn spolgit jeh, lhieu v’eh troggit seose veih yn thalloo, as v’eh currit ny hassoo er e chassyn, myr dooinney, as va cree dooinney er ny choyrt da. 5As cur-my-ner beisht elley, yn nah er, goll-rish muc-awin, as hrog eh eh-hene seose er y derrey heu, lesh three asnaghyn ny veeal, eddyr e eeacklyn: as dooyrt ad myr shoh rish, Trog ort, ee dty haie feill. 6Lurg shoh yeeagh mee, as cur-my-ner fer elley goll-rish leopard, lesh kiare skianyn eeanlee er e ghreeym, va er y veisht myrgeddin kiare king; as va reiltys er ny choyrt da. 7Lurg shoh honnick mee ayns ashlishyn ny hoie, as cur-my-ner yn chiarroo veisht, agglagh as atchimagh, as erskyn-towse lajer: lesh feeacklyn mooar yiarn: stroie eh, as vrish eh ayns peeshyn, as stamp eh yn chooid elley lesh e chassyn, as cha row eh goll-rish veg jeh ny beishtyn va roish, as va jeih eairkyn er. 8Ghow mee tastey jeh ny eairkyn, as cur-my-ner, haink seose ny-vud oc eairk yiare elley, as roishyn va three jeh ny chied eairkyn er ny phluckey seose rish ny fraueyn: as cur-my-ner, ayns yn eairk shoh va sooillyn goll-rish sooillyn dooinney, as beeal boggyssagh reddyn mooarey.

9Yeeagh mee derrey va ny stuill-reeoil soit, as dy ren y chenn-ayr dy laghyn soie, va e gharmad gial myr sniaghtey, as folt e chione myr ollan ghlen: va’n stoyl-reeoil echeysyn myr y lossey aile, as e whueeylyn goll-rish yn aile ta lostey. 10Ren strooan aileagh lhieeney, as haink eh magh veih kiongoyrt rish: va thousaneyn dy housaneyn shirveish er, as jeih thousane keayrtyn jeih thousaneyn shassoo kiongoyrt rish: va’n vriwnys soit, as ny lioaryn foshlit. 11Yeeagh mee eisht, kyndagh rish coraa ny goan mooarey va’n eairk dy loayrt: yeeagh mee eer derrey va’n veisht er ny varroo, as e chorp stroit, as er ny choyrt da’n aile loshtee. 12Agh er son y chooid elley jeh ny beishtyn, va’n reiltys er ny ghoaill voue: ny-yeih va bea sodjey currit daue, son imbagh as son traa. 13Honnick mee ayns ashlishyn ny hoie, as cur-my-ner, haink fer goll-rish mac y dooinney, lesh bodjallyn yn aer, as haink eh gys y chenn-ayr dy laghyn, as hug ad lhieu eh er-gerrey kiongoyrt rish. 14As va er ny choyrt da reiltys, as gloyr, as reeriaght, dy jinnagh dy chooilley phobble, ashoonyn, as glaraghyn eshyn y hirveish: ta e reiltys reiltys dy bragh farraghtyn, nagh jean cherraghtyn, as e reeriaght shen nagh bee er ny stroie.

15Va mish Daniel seaghnit ayns my spyrryd, cheu-sthie jeh my chorp, as va ashlishyn my chione dy my voirey. 16Haink mee er-gerrey gys fer jeusyn va ny hassoo liorym, as dênee mee jeh, mychione ynrickys ooilley shoh: eisht dinsh eh dou, as hoilshee eh dou bun ny cooishyn. 17Ny kiare beishtyn mooarey shoh, t’ad kiare reeaghyn, nee troggal ass y thalloo. 18Agh gowee nooghyn yn er smoo syrjey yn reeriaght, as bee eh oc ayns nyn gummal son dy bragh, eer son dy bragh as dy bragh. 19Eisht va mee booiagh firrinys y gheddyn jeh’n chiarroo veisht nagh row goll-rish veg jeh’n vooinjer elley, erskyn-towse atchimagh, lesh feeacklyn dy yiarn, as e yngnyn dy phrash, va stroie, brishey ayns peeshyn, as stampey yn vooinjer elley lesh e chassyn. 20As jeh ny jeih eairkyn va ayns e chione, as jeh’n eairk elley haink seose, as roish ren three jeu, tuittym, jeh’n eer eairk shen, lesh sooillyn, as beeal va boggyssagh reddyn mooarey, lesh shilley s’daaney na e heshaghyn. 21Yeeagh mee, as ren yn eairk cheddin caggey rish ny nooghyn, as cosney orroo. 22Derrey haink y chenn-ayr dy laghyn, as va briwnys er ny choyrt da nooghyn yn er smoo syrjey; as haink y traa, dy ghow ny nooghyn yn reeriaght ayns nyn gummal. 23Shoh myr dooyrt eh, Bee yn chiarroo veisht yn chiarroo reeriaght er y thalloo, nagh bee casley rish reeriaght erbee elley, as stroie-ys eh yn slane seihll, as nee eh stampey sheese eh, as brishey eh ayns peeshyn. 24As ny jeih eairkyn ass y reeriaght shoh, t’ad jeih reeaghyn nee troggal: as irree-ys fer elley ny lurg oc; as cha bee eh goll-rish yn chied eallagh, as ver eh fo-chosh three reeaghyn. 25As nee eh loayrt goan mollaghtagh noi yn er smoo syrjey, as ver eh mow nooghyn yn er smoo syrjey, as gowee eh er dy chaghlaa traaghyn, as leighyn; as bee ad er ny choyrt ayns y laue echey, derrey traa as traaghyn, as leih traa. 26Agh nee yn vriwnys soie, as gowee ad e reiltys veih, dy choyrt mow, as dy stroie eh gys y jerrey. 27As bee yn reeriaght as y reiltys, as mooadys y reeriaght fo ooilley niau, er ny choyrt da pobble noo yn er smoo syrjey, ta e reeriaght reeriaght dy bragh farraghtyn, as nee dy chooilley reiltys shirveish, as cur biallys da. 28Choud shoh ta jerrey yn chooish. Er my hon’s Daniel, va my smooinaghtyn dy my heaghney, as neeal my eddin er ny chaghlaa orrym, agh dreill mee yn chooish ayns my chree.