CAB. VIII

1Ayns y trass vleïn jeh reill ree Belshazzar, haink ashlish orrym, eer orrym’s Daniel, lurg shen haink orrym ec y toshiaght. 2As honnick mee ayns ashlish (as haink eh gy-kione, myr honnick mee, dy row mee ec Shushan ayns y phlaase, ta ayns cheer Elam) as er-lhiam pene ’syn ashlish, dy row mee liorish awin Ulai. 3Eisht hrog mee seose my hooillyn as yeeagh mee, as cur-my-ner, va nyn shassoo liorish yn awin, rea as daa eairk er, as va’n daa eairk ard: agh va’n derrey yeh ny syrjey na’n jeh elley, as yn eairk b’yrjey s’jerree haink seose. 4Honnick mee yn rea puttey lesh y sheear, as lesh y twoaie, as lesh y jiass; myr shen nagh by-loys da beisht erbee shassoo roish; chamoo va fer ayn oddagh livrey veih e laue, agh ren eh lurg e aigney hene, as daase eh pooaral. 5As myr va mee smooinaghtyn, cur-my-ner, haink goayr-yrryn veih’n neear, er feaï-ny-cruinney, as s’coan venn eh rish y thalloo: as va eairk chronnal ec y ghoayr, eddyr e hooillyn. 6As haink eh gys y rea lesh y daa eairk, honnick mee ny hassoo er broogh ny hawin, as roie eh er ayns eulys e phooar. 7As honnick mee eh tayrn chion er y rea, as v’eh er ny vrasnaghey lesh sproght n’oï, as woaill eh yn rea, as vrish eh e ghaa eairk, as cha row fort ayns y rea dy hassoo roish, agh lhieg eh er y thalloo eh, as stamp eh er, as cha row fer oddagh yn rea y livrey ass e laue. 8Shen-y-fa haink y ghoayr-yrryn dy ve feer niartal, as tra v’eh lajer, va’n eairk vooar er ny vrishey, as ’syn ynnyd haink seose kiare eairkyn cronnal, lesh ny kiare geayghyn yn aer. 9As magh ass unnane jeu, haink eairk veg, daase feer vooar, lesh y jiass, as lesh y shiar, as lesh y cheer eunyssagh. 10As daase eh mooar, eer corrym rish sheshaght-caggee niau, as cheau eh sheese paart jeh’n cheshaght-chaggee, as jeh ny rollageyn gys y thalloo, as stamp eh orroo. 11Dy jarroo ren eh soiaghey seose eh-hene dy ve eer corrym rish prince y cheshaght-chaggee, as liorishyn va’n oural-laaoil er ny ghoaill ersooyl, as ynnyd e hiamble casherick er ny lhieggal. 12As va pooar-caggee er ny choyrt da noi yn oural-laaoil, kyndagh rish drogh-yannoo, as cheau eh sheese yn ynrickys gys y thalloo, as hie eh er e hoshiaght, as haink eh lesh.

13Eisht cheayll mee noo loayrt, as dooyrt noo dy row rish yn noo shen ren loayrt: Caïd nee yn ashlish farraghtyn, yn oural-laaoil ve goit ersooyl, as loght yn traartys tannaghtyn, as yn ynnyd casherick, as e heshaght dy ve stampit fo-chosh? 14As dooyrt eh rhym, Derrey daa housane as three cheead laa; eisht bee yn ynnyd casherick er ny ghlenney.

15As haink eh gy-kione, tra va mish, eer mish Daniel er vakin yn ashlish, as er hirrey bun er, eisht cur-my-ner, hass kiongoyrt rhym myr co-chaslys dooinney. 16As cheayll mee coraa dooinney eddyr brooinyn Ulai, gyllagh, as gra, Ghabriel, cur er y dooinney shoh dy hoiggal yn ashlish. 17Eisht haink eh er-gerrey da’n boayl raad va mee my hassoo: as tra haink eh, va mee fo atchim, as huitt mee er my eddin: agh dooyrt eh rhym, Gow toiggal, uss vac y dooinney: son ayns traa cooie bee jerrey er yn ashlish. 18Nish myr v’eh loayrt rhym, va mee ayns cadley trome, lesh my eddin gys y thalloo: agh venn eh rhym, as hrog eh mee er my chassyn. 19As dooyrt eh, Cur-my-ner, soilshee-ym dhyt, cre hig gy-kione ec jerrey yn jymmoose: son ec y traa pointit vees y jerrey er. 20Yn rea, honnick oo lesh daa eairk, t’ad reeaghyn Vedia as Phersia. 21As ta’n goayr geyshteenagh ree Ghrecia, as yn eairk vooar, ta eddyr e hooillyn, ta’n chied ree. 22Nish lurg da shen ve brisht; as dy daink seose ny ynnyd kiare elley, nee kiare reeriaghtyn troggal seose ass yn ashoon shen, agh cha nee ayns y phooar echeysyn. 23As ayns traa jerrinagh yn reeriaght oc, tra vees slane towse ny drogh-yantee jeant magh, nee ree dy eddin elgyssagh, as toiggal folliaghtyn, shassoo seose. 24As bee yn pooar echey niartal, agh cha nee liorish e phooar hene; as nee eh stroie ayns aght yindyssagh, as hed eh er e hoshiaght, as hig eh lesh, as ver eh naardey yn vooinjer niartal, as y pobble casherick. 25As trooid e chialgeyrys, ver eh er croutyn bishaghey ny laue: as nee eh lane y hoiaghey jeh hene ayns [mooaralys] e chree, as ec e chah nee eh ymmodee y stroie: nee eh shassoo seose myrgeddin noi yn prince dy phrinceyn, agh bee eh er ny vrishey fegooish laue. 26As ta ashlish yn astyr as y voghrey, va inshit, firrinagh: shen-y-fa jeigh seose yn ashlish, son bee eh gys ymmodee laghyn. 27As huitt mish Daniel my-neealloo, as va mee ching son earish: lurg shen hrog mee orrym, as hie mee mysh cooishyn y ree, as va mee ayns yindys dowin ec yn ashlish, agh va shoh gyn-yss da fer erbee.