CAB. I

1Shoh ny goan, loayr Moses rish ooilley Israel, er y cheu shoh dy Yordan, ayns yn aasagh, ayns y thalloo-rea er-gerrey da’n Aarkey Jiarg, eddyr Paran, as Tophel, as Laban, as Hazeroth, as Dizahab. 2(Ta jurnah un laa jeig, veih Horeb raad cronk Seir, gys Kadesh-barnea,) 3As haink eh gy-kione, ’sy da-eedoo vleïn, ’syn un vee yeig, er y chied laa jeh’n vee, dy loayr Moses rish cloan Israel, cordail rish ooilley ny va’n Chiarn er choyrt roish son sarey daue. 4Erreish da ver stroie Sihon ree ny Amoriteyn, va e chummal ayns Heshbon, as Og ree Vashan, va e chummal ec Ashtaroth ayns Edrei. 5Er y cheu shoh dy Yordan, ayns cheer Voab, ghow Moses toshiaght dy ockley magh yn leigh shoh, gra, 6Ren y Chiarn y Jee ain loayrt rooin ayns Horeb gra, Ta shiu er chummal foddey dy liooar ’sy clieau shoh: 7Chyndaa-jee, as gow-jee nyn yurnah, as immee-jee, gys cheer-ard ny Amoriteyn, as gys ooilley ny ynnydyn t’er-gerrey da, ’sy thalloo-rea, ayns ny croink, as ’sy choan, as ayns y jiass, as rish oirr ny marrey, gys cheer ny Canaaniteyn, as gys Lebanon, gys yn awin mooar shen, awin Euphrates. 8Cur-my-ner, Ta mee er choyrt y cheer kiongoyrt riu: immee-jee stiagh, as gow-jee yn cheer, vreear y Chiarn da nyn ayraghyn, Abraham, Isaac, as Jacob, dy choyrt dauesyn, as da nyn sluight nyn yeï.

9As loayr mee riuish ec y traa shen, gra, Cha vel mish er son reill shiu my-lomarcan: 10Ta’n Chiarn nyn Yee er vishaghey shiu, as cur-my-ner, ta shiu yn laa jiu, myr rollageyn yn aer ayns earroo. 11(Dy der Jee nyn ayraghyn diuish dy ve thousane keayrt smoo na ta shiu, as dy bannee eh shiu myr yiall eh diu). 12Kys oddym’s my-lomarcan gymmyrkey ny cooishyn, yn errey, as yn anvea eu? 13Reih shiu deiney creeney as tushtagh, as jeh goo mie mastey ny tribeyn eu, as nee’m ad nyn fir-reill harrishdiu. 14As dreggyr shiu mee, as dooyrt shiu, Te mie er nyn son, ny t’ou dy ghra. 15Er shen ghow mee ard-gheiney ny tribeyn eu, deiney creeney, as dy ghoo mie, dy reill harrishdiu, captanyn er thousaneyn, as captanyn er keeadyn, as captanyn er jeih as da-eed, as captanyn er jeih, as offishearyn mastey ny tribeyn. 16As hug mee currym da ny briwnyn eu ec y traa shen, gra, Cur-jee clashtyn da ny cooishyn ta eddyr nyn mraaraghyn, as cur-jee briwnys cairagh, eddyr dy chooilley ghooinney as e vraar, as y joarree ta ny mast’ eu. 17Cha jean shiu soiaghey jeh persoonyn ayns briwnys, agh ver shiu clashtyn da’n voght chammah’s da’n verchagh; cha bee shiu ayns aggle roish eddin dooinney, son lesh Jee ta’n briwnys: as y chooish ta ro ghoillee diu, cur-jee roym’s eh, as neem’s clashtyn eh. 18As hug mee ayns currym diu ec y traa shen dy chooilley nhee, va erriu dy yannoo.

19As tra daag shin Horeb, hie shin trooid ooilley’n faasagh mooar as atchimagh shen, honnick shiu er raad cheer-ard ny Amoriteyn, myr hug y Chiarn nyn Yee sarey dooin: as haink shin gys Kadesh-barnea. 20As dooyrt mee riu, Ta shiu er roshtyn gys cheer-ard ny Amoriteyn, ta’n Chiarn nyn Yee kiarail dooin. 21Cur-my-ner, ta’n Chiarn dty Yee er choyrt y cheer kiongoyrt rhyt; immee seose, as gow eh, myr ta’n Chiarn Jee dty ayraghyn er ghra rhyt: ny bee aggle ort, chamoo lhig dty chree voïd. 22As haink shiu hym’s dy chooilley vac dooinney jiu, as dooyrt shiu, Ver mayd deiney roïn, dy ghoaill baght jeh’n cheer, as ver ad shoh lhieu fys hooin, cre’n raad share dooin goll seose, as cre ny ard-valjyn hem mayd n’oï. 23As my-haittin lhiam dy mie yn raa shoh: as ghow mee daa ghooinney jeig jiu, fer ass tribe. 24As hyndaa ad, as hie ad roue seose y clieau, as haink ad gys coan Eshcol, as ghow ad baght mie jeh. 25As ghow ad jeh messyn y cheerey, as hug ad lhieu ad neose hooinyn, as dinsh ad dooin, as dooyrt ad, Cheer mie eh, ta’n Chiarn nyn Yee dy choyrt dooin. 26Ny-yeih, cha ragh shiu seose, agh dirree shiu magh noi sarey’n Chiarn y Jee eu. 27As va shiu anveagh ayns nyn gabbaneyn, as dooyrt shiu, Son dy row dwoaie ec y Chiarn orrin, hug eh lesh shin magh ass cheer Egypt, dy livrey shin gys laue ny Amoriteyn, dy stroie shin. 28Cre’n-fa hem mayd seose? ta nyn mraaraghyn er choyrt shin ass cree, gra, Ta’n sleih ny s’troshey, as ny s’thollee na shinyn; ta ny ard-valjyn oc mooar as voallit seose gys niau, as ta shin, marish shoh, er vakin ayn mec Anak. 29Eisht dooyrt mee riu, Ny bee-jee ayns atchim, ny aggle erbee roue. 30Nee’n Chiarn y Jee eu, ta goll reue, caggey er nyn son, cordail rish ooilley ny ren eh ayns nyn lieh, ayns Egypt, kiongoyrt rish ny sooillyn eu: 31As ayns yn aasagh, raad honnick oo, dy ren yn Chiarn dty Yee gymmyrkey lhiat, myr ta dooinney gymmyrkey lesh e vac, ayns ooilley’n raad hie shiu, derrey haink shiu gys yn ynnyd shoh. 32Ny-yeih ayns shoh hene, cha ren shiu credjal y Chiarn nyn Yee, 33Hie reue er y raad, dy reih magh ynnyd diu son campal, ayns aile ’syn oie, dy hoilshaghey diu cre’n raad va shiu dy ghoaill, as ayns bodjal ’sy laa. 34As cheayll y Chiarn coraa nyn goan, as v’eh jymmoosagh, as vreear eh, gra, 35Dy jarroo firrinagh, cha jean unnane jeh deiney yn drogh heeloghe shoh fakin y cheer mie shen, yiall mee dy choyrt da nyn ayraghyn; 36Er-lhimmey jeh Caleb mac Jephunneh, nee eshyn fakin eh, as dasyn ver-yms y cheer t’eh er huill er, as da e chloan, er-yn-oyr, dy vel eshyn dy slane er n’eiyrt er y Chiarn. 37Myrgeddin va’n Chiarn corree rhym’s, kyndagh riuish, gra, As uss neesht, cha jed oo stiagh gys y cheer cheddin. 38Agh Joshua mac Nun, ta dty hirveishagh, hed eshyn stiagh ayn. Cur dty choyrle vie da: son eshyn ver eh da Israel son eiraght. 39Myrgeddin, yn vooinjer veggey eu, dooyrt shiu veagh son spooilley, as nyn gloan, nagh row toiggal oc ’sy laa shen jeh mie as sie, hed adsyn stiagh ayn, dauesyn ver-yms eh, as gowee ad possession jeh. 40Agh er nyn son euish, chyndaa-jee, as gow-jee nyn yurnah gys yn aasagh, er raad yn Aarkey Jiarg. 41Eisht dreggyr shiu as dooyrt shiu rhym’s, Ta shin er n’yannoo peccah noi’n Chiarn, hem mayd seose, as nee mayd caggey, cordail rish ooilley ny ta’n Chiarn nyn Yee er harey dooin. As tra va shiu dy chooilley ghooinney jiu er choamrey eh hene lesh e ghreïnyn-caggee, va shiu aarloo dy gholl seose y clieau. 42As dooyrt y Chiarn rhym’s, Abbyr roo, Ny gow-jee seose, chamoo jean-jee caggey, son cha vel mee ny mast’ eu; er-aggle dy bee shiu er nyn yiarey sheese roish nyn noidyn. 43Er shoh, loayr mee riu, as cha jinnagh shiu clashtyn, agh vrish shiu magh dy mee-viallagh noi sarey’n Chiarn, as hie shiu dy daaney, er nyn gione hene, seose y clieau. 44As haink ny Amoriteyn, va cummal ’sy clieau shen, magh nyn ’oï, as ren ad shiu y ghah myr shellanyn, as stroie ad shiu veih Seir, eer gys Hormah. 45As ren shiu chyndaa, as dobberan kiongoyrt rish y Chiarn; agh cha n’eaishtagh y Chiarn rish nyn goraa, ny geill ’chur diu. 46Er shoh, chum shiu ayns Kadesh ymmodee laghyn, cordail rish y traa va shiu ayn roïe.