CAB. XI

1Shen-y-fa ver oo graih da’n Chiarn dty Yee, as nee oo freayll e churrym, e lattyssyn, e vriwnyssyn, as e annaghyn dy kinjagh. 2As toig-jee yn laa jiu: son cha vel mee loayrt rish y chloan eu nagh vel er hoiggal, as nagh vel er vakin smaght y Chiarn nyn Yee, e phooar, e laue niartal, as e roih sheeynt magh, 3As e virrilyn, as ny obbraghyn ren eh ayns mean Egypt, rish Pharaoh ree Egypt, as rish ooilley e heer, 4As cre ren eh rish sheshaght-caggee Egypt, rish nyn gabbil, as nyn fainee, kys hug eh er ushtaghyn yn Aarkey Jiarg dy heet dy cheilley orroo, myr v’ad er nyn eiyrt’s, as kys ta’n Chiarn er stroie ad gys y laa jiu. 5As cre ren eh riu hene ayns yn aasagh, derrey haink shiu gys yn ynnyd shoh, 6As cre ren eh rish Dathan as Abiram, mec Eliab, mac Reuben; kys doshil y thalloo e beeal; as sluggey seose ad hene, as nyn lught-thie, as nyn gabbaneyn, as ooilley nyn gooid-seihlt, ayns mean Israel. 7Agh ta ny sooillyn eu er vakin ooilley ny obbraghyn mooarey, ta’n Chiarn er n’yannoo. 8Nee shiu, er-y-fa shen, freayll ooilley ny annaghyn ta mee dy harey diu yn laa jiu, dy vod shiu ve dunnal, as goll stiagh dy ghoaill possession jeh’n cheer, huggey ta shiu er y raad dy gheddyn eiraght ayn: 9As dy vod ny laghyn eu ve beayn ayns y cheer vreear y Chiarn dy choyrt da nyn ayraghyn, as da nyn sluight, cheer ta palchey ayns bainney as mill.

10Son cha vel y cheer, ta kiarit son y chummal ayd’s, myr thalloo Egypt, voish ta shiu er jeet magh, raad chuirr oo dty rass, as hyndaa oo yn ushtey er lesh dty chass, myr garey dy lossreeyn: 11Agh ta’n cheer ta shiu ry-hoi cummal ayn, ny heer dy chroink as coanyn, er ny ooraghey lesh fliaghey yn aer: 12Cheer, ta fo reih kiarail dty Yee; ta sooillyn yn Chiarn dty Yee harrish, veih toshiaght eer gys jerrey ny bleeaney.

13As hig eh gy-kione, my ver shiu tastey imneagh da ny annaghyn ta mee dy harey diu yn laa jiu, dy choyrt graih da’n Chiarn nyn Yee, as dy hirveish eh lesh ooilley nyn gree, as ooilley nyn annym; 14Dy der-yms da’n thalloo eu fliaghey cooie ny imbaghyn, toshiaght as jerrey ny bleeaney, dy vod oo chaglym stiagh dty arroo, feeyn, as ooil. 15As ver-ym faiyr ayns dty vagheryn, da dty vaase, dy vod oo gee as ve jeant magh. 16Bee-jee er nyn dwoaie, nagh bee shiu fo molteyrys cree, dy chur shiu er-shaghryn lurg jeeghyn joarree, dy hirveish ad, as dy choyrt ooashley daue: 17As eisht dy bee corree yn Chiarn er ny vrasnaghey nyn ’oï, as dy jean eh dooney seose yn aer veih coyrt fliaghey, as nagh dymmyrk y thalloo e mess, as myr shen dy jed shiu naardey ayns traa gerrit ’sy cheer vie shen, ta’n Chiarn dy choyrt diu.

18Stoyr-jee seose, er-y-fa shen, ad shoh my ghoan ayns nyn gree as nyn annym, as jean ad y chiangley son cowrey er dty laue, as son imraa eddyr dty hooillyn. 19As nee shiu gynsaghey ad da nyn gloan, loayrt jeu, tra t’ou ayns dty hie, as tra t’ou shooyl er y raad, tra t’ou goll dy lhie, as tra t’ou girree. 20As nee oo scrieu ad er essynyn dty ghorrys, as er dty yiattyn: 21Dy vod ny laghyn eu hene, as laghyn nyn gloan ve beayn ’sy cheer, vreear y Chiarn dy choyrt da dty ayraghyn, choud as vees y seihll er-mayrn.

22Son my nee shiu dy kiaralagh ooilley ny currymyn shoh, ta mish dy harey diu, dy chooilleeney ad, dy choyrt graih da’n Chiarn nyn Yee, dy immeeaght ayns ooilley e raaidyn, as dy lhiantyn huggey; 23Nee’n Chiarn eisht geiyrt magh reue ooilley ny ashoonee shoh, as ver eh diuish son eiraght ashoonyn ny smoo, as ny s’niartal na shiu hene. 24Lhieuish vees dy chooilley ynnyd ver shiu boyn nyn goshey er: veih’n aasagh, as Lebanon, veih’n awin, awin Euphrates, choud as yn aarkey sodjey magh, vees nyn gagliagh. 25Cha jarg dooinney erbee shassoo reue, son ver y Chiarn nyn Yee yn aggle atchimagh reueish, er dy chooilley heer ver shiu nyn gass er, myr t’eh er ghra riu.

26Gow-jee tastey, ta mee cur reue yn laa jiu bannaght as mollaght: 27Bannaght, my ver shiu biallys da saraghyn y Chiarn nyn Yee, ta mee yn laa jiu dy choyrt er nyn gurrym: 28As mollaght, mannagh der shiu biallys da saraghyn y Chiarn nyn Yee, agh chyndaa dy lhiattee veih’n raad ta mee sarey diu yn laa jiu, dy eiyrt er jeeghyn joarree nagh nione diu. 29As shoh myr vees eh, erreish da’n Chiarn dty Yee v’er choyrt lesh stiagh oo gys y cheer ta kiarit son dty eiraght, dy der oo yn bannaght er cronk Gerizim, as yn mollaght er cronk Ebal. 30Nagh vel ad shoh er y cheu elley dy Yordan, lesh lhie ny greïney, ayns cheer ny Canaaniteyn, ta cummal ’sy cheer-rea, jeeragh er Gilgal, rish coanyn Voreh? 31Son hed shiu harrish Jordan dy ghoaill possession jeh’n cheer, ta’n Chiarn y Jee euish dy choyrt diu, as bee eh son eiraght diu, as nee shiu cummal ayn. 32As bee-jee imneagh dy chooilleeney ooilley ny slattyssyn ta mish dy hoiaghey reue yn laa jiu.