CAB. XII

1Ad shoh ny slattyssyn as ny briwnyssyn, vees shiu imneagh dy chooilleeney ayns y cheer ta’n Chiarn Jee dty ayraghyn ry-hoi coyrt dhyt, dy ghoaill possession jeh, ooilley ny laghyn vees shiu bio er y thalloo. 2Ver shiu dy bollagh naardey dy chooilley ynnyd, raad ren ny ashoonyn, vees eu son eiraght, shirveish ny jeeghyn ocsyn, er ny sleityn ard, as er ny croink, as fo dy chooilley villey glass. 3As nee shiu lhieggal ny altaryn oc, as brishey ny pillaryn, as lostey ny keylljyn oc lesh aile, as nee shiu giarey sheese jallooyn grainnit ny jeeghyn oc, as nyn enmyn y stroie ass yn ynnyd shen. 4Cha nee er yn aght shoh nee shiu shirveish y Chiarn y Jee eu. 5Agh gys yn ynnyd, nee’n Chiarn nyn Yee y reih ass ooilley ny tribeyn eu, dy chur e ennym ayn, eer ayns e ynnyd-vaghee hene nee shiu shirrey, as gys shen nee shiu cheet: 6As gys shen ver shiu lhieu ny ourallyn-losht, as ny chebballyn, as ny jagheenyn eu, as ourallyn-troggit-seose nyn laue, as ny breearraghyn, as ny ourallyn-arryltagh eu, as y chied ingan jeh ny shellooyn, as ny shioltaneyn eu. 7As ayns shen nee shiu gee kiongoyrt rish y Chiarn y Jee eu, as nee shiu boggey ’ghoaill ayns ooilley ny ta shiu coyrt nyn laue huggey, shiu hene as y vooinjer eu, lesh shen ta’n Chiarn dty Yee er dty vannaghey. 8Cha jean shiu ayns shen, myr ta shin nish dy yannoo ayns shoh, dy chooilley ghooinney myr saillish hene. 9Son cha vel shiu foast er jeet gys y boayl dy aash, as gys yn eiraght ta’n Chiarn nyn Yee ry-hoi coyrt diu. 10Agh tra hed shiu harrish Jordan, as cummal ’sy cheer ta’n Chiarn nyn Yee dy choyrt diu son eiraght, as tra ver eh fea diu veih ooilley nyn noidyn er dy chooilley heu: myr shen dy bee shiu cummal ayns sauchys: 11Shen y raad vees ynnyd nee yn Chiarn nyn Yee y reih, dy choyrt e ennym ayn, gys shen ver shiu lhieu ooilley ny ta mee dy harey diu, ny ourallyn-losht eu, ny chebballyn, ny jagheenyn, as oural-troggit-seose nyn laue, as y reih jeh dy chooilley vreearrey-arryltagh, ta shiu dy yannoo gys y Chiarn. 12As nee shiu boggey ’ghoaill kiongoyrt rish y Chiarn nyn Yee, shiu hene, as nyn mec, as nyn inneenyn, nyn fir-vooinjerey, as nyn inneenyn-veyl, as y Levite t’er cheu-sthie jeh dty yiattyn; er-yn-oyr nagh vel echeysyn ayrn ny eiraght erbee mêriu. 13Cur twoaie dhyt hene nagh jeb oo dty ourallyn-losht ayns dy chooilley ynnyd t’ou dy akin. 14Agh ayns yn ynnyd, nee’n Chiarn dty Yee y reih ayns unnane jeh dty hribeyn, ayns shen nee oo chebbal dty ourallyn-losht, as ayns shen nee oo ooilley ny ta mee dy dty harey. 15Ny-yeih, foddee oo marroo as gee feill ayns ooilley dty yiattyn, cre-erbee ta dty chree dy yeearree, cordail rish y vannaght ta’n Chiarn dty Yee er choyrt dhyt: foddee chammah yn neu-ghlen as y ghlen gee jeh, myr jeh feill feïeys erbee. 16Agh yn uill cha jean shiu gee; nee shiu deayrtey eh er y thalloo myr ushtey.

17Cha n’ee oo er cheu-sthie jeh dty yiattyn jaghee dty arroo, ny dty feeyn, ny dty ooil, ny yn chied ingan jeh dty hellooyn, ny jeh dty hioltane, ny jeh veg jeh dty vreearraghyn t’ou er n’yannoo, ny dty ourallyn-arryltagh, ny oural-troggit-seose dty laue: 18Agh shegin dhyt ad y vaarail kiongoyrt rish y Chiarn dty Yee, ayns yn ynnyd nee’n Chiarn dty Yee y reih, oo hene, as dty vac, as dty inneen, as dty er-mooinjerey, as dty inney-veyl, as y Levite t’er cheu-sthie jeh dty yiattyn: as nee oo boggey ’ghoaill kiongoyrt rish y Chiarn dty Yee ayns ooilley ny t’ou goaill ayns laue. 19Bee er dty hwoaie, nagh dreig oo yn Levite, choud as vees oo bio er y thalloo.

20Tra nee yn Chiarn dty Yee dty chagliagh y heeyney magh, myr yiall eh dhyt, as dy jir oo, Nee’m gee feill (son dy vel dty aigney dy ee feill) foddee oo gee keint erbee dy eill ta aigney ayd er. 21My vees yn ynnyd ta’n Chiarn dty Yee er reih dy choyrt e ennym ayn, roud voïd; eisht nee oo marroo jeh dty helloo as dty hioltane, ta’n Chiarn er choyrt dhyt, myr ta mee er dty harey, as nee oo gee ec dty hie hene, cre-erbee ta dty aigney cur mian da. 22Myr ta feill feïeys erbee er ny ee, nee uss myrgeddin gee eh: nee yn neu-ghlen as y ghlen gee jeh co-laik. 23Agh jeeagh nagh n’ee oo yn uill; son ta’n uill yn vioys, as cha jean oo gee yn vioys marish yn eill. 24Cha jean oo gee eh; nee oo deayrtey eh er y thalloo myr ushtey. 25Cha jean oo gee eh, dy vod oo hene ve maynrey as dty chloan dty yeï, tra nee oo shen ny ta cairagh ayns shilley’n Chiarn. 26Agh dty reddyn casherick, as dty vreearraghyn, nee oo goaill, as cur lhiat gys yn ynnyd, nee’n Chiarn y reih: 27As nee oo chebbal dty ourallyn-losht, yn eill as yn uill, er altar yn Chiarn dty Yee: as bee fuill dty ourallyn er ny gheayrtey magh er altar y Chiarn dty Yee: as nee oo gee yn eill. 28Cur tastey, as eaisht rish ooilley ny goan shoh ta mee dy harey dhyt, dy vod oo hene as dty chloan dty lurg ve maynrey son dy bragh, tra t’ou jannoo shen ny ta mie as cairagh ayns shilley yn Chiarn dty Yee.

29Tra nee yn Chiarn dty Yee giarey jeh ny ashoonyn t’ou dy ghoaill ayns possession, as tra vees eiraght as cummal ayd ’sy cheer oc: 30Cur twoaie dhyt hene, nagh bee oo cleaynit dy eiyrt er ny cliaghtaghyn oc, lurg daue v’er nyn stroie, as nagh brie oo lurg ny jeeghyn oc, gra, Cre’n aght ren ny ashoonyn shoh ny jeeghyn oc y hirveish? neem’s eer myrgeddin. 31Cha nee myr shoh nee oo rish y Chiarn dty Yee: son dy chooilley pheccah dwoaiagh as feohdoil gys y Chiarn, t’adsyn er n’yannoo gys ny jeeghyn oc: son eer nyn mec as inneenyn t’ad er lostey ’syn aile, gys ny jeeghyn oc. 32Cre-erbee ta mee dy harey diu, gow-jee tastey dy yannoo eh: cha der shiu veg huggey, ny veg y ghoaill veih.