CAB. XIII

1My nee phadeyr [foalsey] ny branlaader ashlishyn troggal ny mast’ eu, as jannoo faishnys jeh cowrey ny yindys ennagh, 2As y cowrey ny yn yindys loayr eh jeh dy haghyrt, as dy jir eh rhyt, Lhig dooin geiyrt da jeeghyn elley (nagh bione dhyt) as lhig dooin shirveish ad. 3Cha n’eaisht oo rish goan y phadeyr, ny’n branlaader cheddin: son ta’n Chiarn nyn Yee dy nyn browal, dy hoilshaghey vel graih eu er y Chiarn nyn Yee lesh ooilley nyn gree as lesh ooilley nyn annym. 4Nee shiu tannaghtyn dy eiyrt er y Chiarn nyn Yee; as aggle y ghoaill roish, as freayll e annaghyn, as ve biallagh da e choraa, as nee shiu shirveish eh, as lhiantyn huggey. 5As bee yn phadeyr ny’n dreamyder shen er ny choyrt gy-baase (son dy vel eh er loayrt dy hyndaa shiu ersooyl veih’n Chiarn nyn Yee, hug lesh shiu magh ass cheer Egypt, as deayshil shiu veih thie ny bondiaght, dy chur oo er-shaghryn jeh’n raad hug y Chiarn dty Yee sarey dhyt dy immeeaght ayn) myr shoh ver oo yn olk ersooyl veih ny mast’ eu.

6My nee dty vraar mac dty vayrey, ny dty vac, ny dty inneen, ny ben dty oghrish, ny dty charrey, ta myr dty annym hene, miolaghey oo dy follit, gra, Lhig dooin goll, as shirveish jeeghyn joarree (nagh row enney edyr ayd hene, ny ec dty ayraghyn orroo) 7Ta shen, jeeghyn y pobble ta mygeayrt-y-miu, er-gerrey dhyt, ny foddey voïd, veih’n derrey chione, eer gys y chione elley jeh’n theihll: 8Cha jed oo mârish, ny geaishtagh rish; chamoo vees chymmey ec dty hooill er, chamoo nee oo sparail eh, chamoo nee oo keiltyn eh: 9Agh ver oo, son shickyrys, dy baase eh; dty laue hene vees hoshiaght er, dy choyrt eh gy-baase, as eisht laue ooilley yn pobble. 10As nee oo eh y chlaghey gy-baase lesh claghyn: son dy vel eh shirrey dy hayrn oo ersooyl veih’n Chiarn dty Yee, hug lesh oo magh ass cheer Egypt, ass thie ny bondiaght. 11As clinnee ooilley Israel jeh, as bee aggle orroo, as cha jean ad arragh lheid y peccah shoh, ny mast’ eu.

12My chlinnys oo imraa ayns veg jeh dty ard-valjyn, ta’n Chiarn dty Yee er choyrt dhyt dy chummal ayn, gra, 13Ta lheid ny deiney shen, cloan Velial, er n’gholl magh veih ny mast’ eu, as er hayrn ersooyl cummaltee yn ard-valley oc, gra, Lhig dooin goll, as shirveish jeeghyn elley (nagh bione diu) 14Nee oo eisht briaght, as geddyn magh as feysht dy kiaralagh; as cur-my-ner, my ta’n chooish firrinagh, as dy vel eh, son shickyrys, myr shen, as dy fondagh er ny phrowal, dy vel lheid y peccah eajee jeant ny mast’ eu: 15Nee oo chelleeragh cummaltee yn ard-valley shen y woalley lesh foyr y chliwe, stroie oo eh dy bollagh, as ooilley ny t’ayn, as y maase echey, lesh foyr y chliwe. 16As nee oo chaglym ooilley yn spooilley echey ayns mean e traid, as loshtee oo yn ard-valley lesh aile, as ooilley’n spooilley echey dy slane bollagh, gys ooashley yn Chiarn dty Yee: as bee eh ny holtan son dy bragh, cha bee eh troggit arragh. 17As cha keill oo veg jeh’n red custey: dy vod y Chiarn dty Yee chyndaa veih dewilys e chorree, as soilshaghey myghin dhyt, as chymmey v’echey ort, as bishaghey oo, myr vreear eh da dty ayraghyn; 18Tra nee oo geaishtagh rish coraa’n Chiarn dty Yee; dy reayll ooilley ny annaghyn echey, ta mish dy harey dhyt yn laa jiu, dy yannoo shen ny ta cairagh ayns shilley yn Chiarn dty Yee.