CAB. XIV

1Shiuish cloan y Chiarn nyn Yee: cha jean shiu giarey shiu hene, ny meaylid erbee y yannoo erskyn nyn sooillyn son ny merriu. 2Son pobble casherick oo gys y Chiarn dty Yee, as ta’n Chiarn er ghoaill oo son pobble reiht da hene, erskyn dy chooilley ashoon t’er y thalloo.

3Cha jean oo gee red neu-ghlen erbee. 4Shoh ny beiyn nee shiu gee: yn dow, yn keyrrey, as y goayr, 5Yn feeaih jeh dagh cheint, yn goayr feïe, as y pygarg, yn dow feïe, as y chamois, 6As dy chooilley vaagh ta rheynn yn yngyn, as skeilt-chassagh, as caigney-cheeilley mastey beiyn: shen nee shiu gee. 7Ny-yeih, ad shoh cha jean shiu gee, jeusyn ta caigney-cheeilley, ny jeusyn ta rheynn yn yngyn skeilt; lheid as y camel, as y mwaagh, as y conning, ga t’ad caigney-cheeilley, agh cha vel ad rheynn yn yngyn: shen-y-fa t’ad neu-ghlen diu. 8As y vuc, ga dy vel eh rheynn yn yngyn, ny-yeih cha vel eh caigney-cheeilley: te neu-ghlen diuish: jeh’n eill oc cha jean shiu gee, as rish y chorp marroo oc cha jean shiu bentyn.

9Ad shoh nee shiu gee jeh ooilley ny t’ayns ny ushtaghyn: dy chooilley eeast skianagh as scaailagh nee shiu gee: 10As cre-erbee nagh vel skianagh as scaailagh, cha jean shiu gee; te neu-ghlen diu.

11Jeh ooilley ny eeanlee glen nee shiu gee. 12Agh shoh adsyn nagh jean shiu gee: yn urley, as yn ossifrage, as yn ospray, 13As yn shawk, as y shyrragh, as y vulture lurg e cheint, 14As dy chooilley feeagh lurg e cheint. 15As yn hullad, as y shawk-oie, as y chooag, as dagh shawk lurg e cheint, 16Yn hullad beg, as yn hullad mooar, as yn ollay, 17As y pelican, as yn eagle sloo, as y feeagh marrey, 18As y stork, as y coar-ny-hastan lurg e cheint, as yn earkan, as y chraitnag. 19As dy chooilley red snauee ta getlagh, te neu-ghlen diu: cha bee ad er nyn ee. 20Agh jeh dy chooilley eean glen foddee shiu gee. 21Cha jean shiu gee red erbee ta geddyn baase jeh hene: shen ver shiu da’n joarree t’er cheu-sthie jeh dty yiattyn, dy yannoo ymmyd jeh, ny foddee oo creck eh rish joarree: son t’ou uss dty phobble casherick da’n Chiarn dty Yee. Cha jean oo broie yn mannan ayns bainney e vayrey. 22Ver oo jaghee firrinagh jeh ooilley bishaghey dty rass, ta’n magher gymmyrkey magh dy chooilley vleïn. 23As nee oo gee kiongoyrt rish y Chiarn dty Yee, ’syn ynnyd nee eh reih dy chur e ennym ayn, yn jaghee jeh dty arroo, jeh dty feeyn, as jeh dty ooil, as y chied ingan jeh dty hellooyn, as dty hioltaneyn: dy vod oo gynsaghey dy ghoaill aggle dy kinjagh roish y Chiarn dty Yee. 24As my s’liauyr lhiat y raad, as yn errey ro hrome dhyt, ny my vees yn ynnyd, nee’n Chiarn dty Yee ’reih dy chur e ennym ayn, roud voïd, tra ta’n Chiarn er dty vannaghey: 25Nee oo eisht argid jeh, as nee oo kiangley seose yn argid ayns dty laue, as hed oo gys yn ynnyd nee yn Chiarn dty Yee ’reih. 26As nee oo baarail yn argid er cre-erbee dy nailt, er dew, ny er kirree, ny er feeyn, ny er jough lajer, ny cre-erbee ta aigney ayd er: as ayns shen nee oo gee eh kiongoyrt rish y Chiarn dty Yee, as nee oo boggey ’ghoaill, oo hene as lught dty hie. 27As y Levite t’er cheu-sthie jeh dty yiattyn, cha jean oo treigeil eh: son nagh vel ayrn ny eiraght echey mayrt.

28As ec kione three bleeaney nee oo soiaghey magh slane jaghee dty hroar bleeaney, as shen y choyrt dy lhiattee cheu-sthie jeh dty yiattyn. 29As hig y Levite (son nagh vel ayrn ny eiraght echey mayrt) as y joarree, as y lhiannoo gyn ayr, as y ven-treoghe, t’er cheu-sthie jeh dty yiattyn, as nee ad gee, as bee ad jeant magh: dy vod yn Chiarn dty Yee oo y vannaghey ayns dy chooilley obbyr t’ou cur dty laue huggey.