CAB. XVI

1Cur tastey da’n vee Abib, as freill y chaisht gys y Chiarn dty Yee: son ayns y vee Abib hug y Chiarn dty Yee lesh uss magh ass Egypt er yn oie. 2Nee oo er-y-fa shen yn eayn-caisht y ouralley gys y Chiarn dty Yee, jeh’n chioltane as y chelloo, ’syn ynnyd nee’n Chiarn y reih dy chur e ennym ayn. 3Cha jean oo gee arran soor lesh: rish shiaght laa nee oo gee arran gyn soorit lesh, eer yn arran dy heaghyn: (son haink oo magh ass cheer Egypt ayns siyr) dy vod oo cooinaghtyn er y laa haink oo magh ass thalloo Egypt, ooilley laghyn dty vea. 4As cha bee arran soor ry-akin ayd ayns ooilley dty ardjyn rish shiaght laa, chamoo vees veg jeh’n eill, t’ou er hebbal er y chied laa syn astyr, er-mayrn fud-ny-hoie derrey’n voghrey. 5Cha marr oo yn eayn-caisht er cheu-sthie jeh veg jeh dty yiattyn, ta’n Chiarn dty Yee dy choyrt dhyt. 6Agh ’syn ynnyd nee’n Chiarn dty Yee y reih dy chur e ennym ayn, shen y raad nee oo yn eayn-caisht y varroo, ’syn astyr ec lhie ny greïney, mysh y traa haink oo magh ass Egypt. 7As nee oo roastey, as gee eh ’syn ynnyd nee’n Chiarn dty Yee y reih: as nee oo chyndaa ’sy voghrey, as goll royd gys dty chabbaneyn. 8Rish shey laa nee oo gee arran gyn soorit, as er y chiaghtoo laa vees chaglym casherick gys y Chiarn dty Yee: cha jean oo obbyr erbee er.

9Shiaght shiaghtinyn nee oo coontey dhyt hene: gow toshiaght dy choontey ny shiaghtinyn veih’n traa t’ou goaill toshiaght dy choyrt y chorran fo’n arroo. 10As nee oo freayll feailley ny shiaghtinyn gys y Chiarn dty Yee, lesh keesh dy oural-arryltagh dty laue, nee oo y choyrt da’n Chiarn dty Yee, rere myr ta’n Chiarn dty Yee dy dty vannaghey. 11As nee oo boggey ’ghoaill kiongoyrt rish y Chiarn dty Yee, uss, as dty vac, as dty inneen, as dty er-mooinjerey, ad dty inney-veyl, as y Levite t’er cheu-sthie jeh dty yiattyn, as y joarree, as y lhiannoo gyn ayr, as y ven-treoghe ta ny mast’ eu, ’syn ynnyd nee’n Chiarn dty Yee y reih dy choyrt e ennym ayn. 12As nee oo cooinaghtyn dy r’ou hene fo bondiaght ayns Egypt: as ver oo tastey dy chooilleeney ooilley ny slattyssyn shoh.

13Nee oo freayll feailley ny cabbaneyn shiaght laa, erreish dhyt v’er haglym stiagh yn arroo as y feeyn ayd. 14As nee oo boggey y ghoaill ayns dty laghyn feailley, uss as dty vac, as dty inneen, as dt’er-mooinjerey, as dt’inney-veyl, as y Levite, as y joarree, as y lhiannoo gyn ayr, as y ven-treoghe, t’er cheu-sthie jeh dty yiattyn. 15Rish shiaght laa nee oo freayll feailley casherick gys y Chiarn dty Yee, ’syn ynnyd nee’n Chiarn y reih; er-yn-oyr dy jean y Chiarn dty Yee uss y vannaghey ayns ooilley dty vishaghey, as ayns ooilley obbraghyn dty laueyn, shen-y-fa nee oo dy jarroo goaill boggey.

16Three keayrtyn ’sy vleïn hig ooilley ny fyrrynee ayd kionfenish y Chiarn dty Yee, ’syn ynnyd nee eh reih: er feailley yn arran-millish, er feailley ny shiaghtinyn, as er feailley ny cabbaneyn: as cha jig ad lhome-lauee fenish y Chiarn. 17Ver dy chooilley ghooinney rere e fort, rere y bannaght ta’n Chiarn dty Yee er choyrt dhyt.

18Briwnyn as fir-oik nee oo y phointeil dhyt hene ayns ooilley dty yiattyn, ta’n Chiarn dty Yee dy choyrt dhyt trooid magh dty hribeyn: as nee adsyn briwnys kiart y hirveish er y pobble. 19Cha jean oo briwnys y chassey; cha jean oo soiaghey jeh persoonyn, chamoo nee oo gioot y ghoaill: son ta gioot dolley sooillyn y vooinjer creeney, as cassey cooishyn y sleih cairagh. 20Er eer chairys nee oo dy slane geiyrt, dy vod oo ve beayn, as geddyn eiraght ’sy cheer ta’n Chiarn dty Yee dy choyrt dhyt.

21Cha jean oo soiaghey keyll dy viljyn erbee er-gerrey da altar yn Chiarn dty Yee, nee oo y yannoo dhyt hene. 22Chamoo ver oo seose jalloo erbee, red ta feoh ec y Chiarn dty Yee er.