CAB. XVII

1Cha jean oo ouralley gys y Chiarn dty Yee dow erbee, ny keyrrey, er ta lheamys ny lieh-chiartys erbee: son ta shen dwoaiagh da’n Chiarn dty Yee. 2My vees ry-gheddyn ny mast’ eu, cheu-sthie jeh veg jeh dty yiattyn, ta’n Chiarn dty Yee dy choyrt dhyt, dooinney ny ben ta er n’obbraghey olk ayns shilley’n Chiarn dty Yee ayns brishey e chonaant, 3As t’er n’gholl as er hirveish jeeghyn joarree, as er choyrt ooashley daue, edyr da’n ghrian, ny da’n eayst, ny da veg jeh pooaraghyn sollys yn aer, shoh ta mish er lhiettal; 4As shoh ve inshit dhyt, as t’ou er chlashtyn jeh, as er vriaght dy kiaralagh, as cur-my-ner, dy vel eh firrinagh, as shickyr, dy vel lheid y peccah eajee jeant ayns Israel: 5Eisht ver oo lhiat magh yn dooinney ny’n ven shen (t’er n’yannoo yn drogh obbyr shoh) gys dty yiattyn, eer yn dooinney ny’n ven cheddin: as nee oo claghey dy baase ad lesh claghyn. 6Liorish prowal daa eanish, ny three feanishyn, vees eshyn ta toilchin baase er ny choyrt gy-baase. 7Bee laueyn ny feanishyn hoshiaght er, dy choyrt gy-baase eh, as eisht laueyn y slane pobble: myr shoh ver oo ersooyl yn olk veih ny mast’ eu.

8My hig cooish-leigh royd doillee dy ve er ny vriwnys, eddyr fuill as fuill, eddyr shuit as shuit, eddyr builley as builley, as nagh vod ve er ny reaghey liorish ny briwnyn, raad t’ou cummal: nee oo eisht troggal ort, as goll seose gys yn ynnyd nee’n Chiarn dty Yee y reih; 9As hig oo gys ny saggyrtyn ny Leviteyn, as gys y vriw vees ayns ny laghyn shen, son coyrle; as nee adsyn soilshaghey dhyt cre’n vriwnys dy choyrt. 10As nee oo cordail rish y vriwnys nee adsyn jeh’n ynnyd shen (nee’n Chiarn y reih) soilshaghey dhyt, as gow tastey dy yannoo rere myr ver adsyn royd: 11Cordail rish oardagh yn leigh nee adsyn gynsagh dhyt, as cordail rish y vriwnys ver ad royd, shen myr nee oo: cha jean oo leaystey veih’n vriwnys oc, gys y laue yesh, ny gys y laue chiare. 12As y dooinney nee er e chione hene, as nagh n’eaisht rish y taggyrt (ta shassoo dy yannoo shirveish ayns shen kiongoyrt rish y Chiarn dty Yee) ny rish y vriw, bee’n dooinney shen er ny choyrt gy-baase: as ver oo yn olk ersooyl veih Israel. 13As nee ooilley yn pobble clashtyn, as bee aggle orroo, as cha jean ad arragh dy mee-viallagh. 14Tra vees oo er jeet gys y cheer ta’n Chiarn dty Yee dy choyrt dhyt, as tra vees oo ayns possession jeh, as cummal ayn, as oo dy ghra, Soie-ym seose ree harrym, myr t’ec ooilley ny ashoonyn ta mygeayrt-y-moom: 15Nee oo ynrycan eshyn y hoiaghey seose dy ve ree harryd nee yn Chiarn dty Yee y reih; fer mastey dty vraaraghyn ver oo seose son ree harryd: cha der oo seose joarree harryd, nagh vel dty vraar. 16Agh cha jean eh bishaghey cabbil da hene, ny cur er y pobble dy hyndaa gys Egypt ry-hoi bishaghey cabbil: son wheesh as dy vel y Chiarn er ghra riu, Cha jed shiu arragh back y raad cheddin. 17Chamoo nee eh bishaghey mraane da hene, nagh bee e chree chyndaït ersooyl: chamoo nee eh dy mooar bishaghey da hene argid as airh. 18As erreish da ve soit er stoyl-reeoil e reeriaght, nee eh scrieu da hene copy jeh’n leigh shoh ayns lioar, veih shen ny ta kiongoyrt rish ny saggyrtyn ny Leviteyn. 19As bee eh mârish, as nee eh lhaih ayn ooilley laghyn e vea: dy vod eh gynsaghey dy ghoaill aggle roish y Chiarn e Yee, dy reayll ooilley goan y leigh shoh, as ny slattyssyn shoh, dy chooilleeney ad: 20Nagh bee e chree troggit seose erskyn e vraaraghyn, as nagh jean ad lhoobey veih sarey’n Chiarn, gys y laue yesh ny gys y laue hoshtal: dy vod e laghyn ve beayn ayns e reeriaght; eh hene, as e chloan ayns mean Israel.