CAB. XVIII

1Cha bee ec ny saggyrtyn ny Leviteyn, as slane tribe Levi, ayrn ny eiraght erbee marish Israel: nee ad beaghey er oural y Chiarn jeant lesh aile, myr nyn eiraght. 2Shen-y-fa cha bee eiraght erbee oc mastey nyn mraaraghyn: ta’n Chiarn yn eiraght oc, myr t’eh er ghra roo.

3As shoh vees cair y taggyrt veih’n pobble, vouesyn ta chebbal oural, edyr eh dy ve dow ny keyrrey: as ver ad da’n taggyrt y shlingan, as y kione, as y mynnagh. 4Yn chied-vess myrgeddin jeh dty arroo, jeh dty feeyn, as jeh dty ooil, as y chied loamrey jeh dty chirree ver oo da. 5Son ta’n Chiarn dty Yee er reih eshyn ass ooilley dty hribeyn, dy yannoo shirveish kinjagh ayns ennym y Chiarn, eh hene as e vec son dy bragh.

6As my hig Levite voish veg jeh dty yiattyn ass ooilley Israel, raad v’eh cummal, as cheet dy arryltagh gys yn ynnyd nee’n Chiarn y reih; 7Eisht nee eh shirveish ayns ennym y Chiarn e Yee, myr ta ooilley e vraaraghyn ny Leviteyn dy yannoo, ta ayns shen shassoo kiongoyrt rish y Chiarn. 8Bee’n beaghey oc co-chorrym, cheu-mooie ny ta cheet stiagh huggey liorish creck e eiraght.

9Tra vees oo er jeet gys y cheer ta’n Chiarn dty Yee er choyrt dhyt, cha n’ynsee oo dy yannoo lurg cliaghtaghyn eajee ny ashoonyn shen. 10Cha bee ry-gheddyn ny mast’ eu unnane erbee ta cur er e vac ny e inneen dy gholl trooid yn aile, ny jannoo faishnys, ny coyrt geill da traaghyn, ny fir-obbee, ny buitch, 11Ny fer-druiagh, ny fer lesh lhiannan-shee, ny fer ta jannoo oalys, ny fer ta shirrey coyrle jeh ny merriu. 12Son ta ooilley ny ta geiyrt er ny reddyn shoh feohdoil da’n Chiarn: son kyndagh rish ny cliaghtaghyn feohdoil shoh, ta’n Chiarn dty Yee dy eebyrt ad magh royd. 13Nee oo lhiantyn dy ynrick gys y Chiarn dty Yee. 14Son deaisht ny ashoonyn shoh, t’ou dy gheddyn son eiraght, roosyn ta coyrt geill da traaghyn, as rish fir-obbee: agh er dty hon’s, cha vel y Chiarn dty Yee lowal dhyt’s dy yannoo y lheid.

15Phadeyr nee’n Chiarn dty Yee troggal seose dhyt veih ny mast’ eu, jeh dty vraaraghyn, casley rhym’s, rishyn nee shiu geaishtagh. 16Cordail rish ooilley ny deearree oo er y Chiarn dty Yee ayns Horeb, ayns laa yn chaglym, gra, Ny lhig dou clashtyn reesht coraa’n Chiarn my Yee; chamoo lhig dou fakin yn aile mooar shoh arragh, nagh voym baase. 17As dooyrt y Chiarn rhym, T’ad er loayrt dy mie ayns ny t’ad er ghra. 18As Phadeyr neem’s troggal seose daue veih mastey nyn mraaraghyn, casley rhyt’s, as ver-yms my ghoan ayns e veeal, as loayree eshyn roo ooilley neem’s y harey da. 19As hig eh gy-kione, quoi-erbee nagh n’eaisht rish my ghoan nee eshyn ’loayrt ayns yn ennym aym’s, goym’s cooilleeney er. 20Agh y phadeyr ghoys er dy loayrt fockle ayns m’ennym’s, nagh vel mish er harey da dy loayrt, ny loayrys ayns ennym jeeghyn joarree, bee eer y phadeyr shen er ny stroie. 21As my jir oo ayns dty chree, Kys yiow mayd fys er y goo, nagh vel y Chiarn er loayrt? 22Tra ta phadeyr loayrt ayns ennym y Chiarn, as mannagh jig yn red gy-kione, ny ve cooilleenit, shen y red nagh vel y Chiarn er loayrt, agh ta’n phadeyr er loayrt eh dy daaney er e chione hene: cha bee aggle ort roish.