CAB. XIX

1Tra ta’n Chiarn dty Yee er yiarey jeh ny ashoonee, yn cheer oc ta’n Chiarn dty Yee dy choyrt dhyt’s, as uss dy heet nyn ynnyd, as cummal ayns ny ard-valjyn, as ayns ny thieyn oc; 2Nee oo soiaghey magh dhyt hene three ard-valjyn ayns mean dty heer, ta’n Chiarn dty Yee dy choyrt dhyt son eiraght. 3Nee oo raad-mooar y yannoo, as rheynn ardjyn dty heer (ta’n Chiarn dty Yee dy choyrt dhyt son eiraght) ayns three ayrnyn, dy vod dy chooilley varrooder cosney huc.

4As shoh cooish y varrooder, nee roie er-chea huc, dy hauail e vioys: Quoi-erbee ta marroo e naboo doaltattym, er nagh row dwoaie echey roïe: 5Myr tra ta dooinney goll gys y cheyll marish e naboo, dy yiarey sheese fuygh, as tra ta e laue coyrt builley lesh y teigh dy lhieggal y billey, as y kione dy lheim jeh’n chass, as taghyrt er e naboo, dy ve oyr e vaaish; nee eh chea gys unnane jeh ny ard-valjyn shen, as bee e vioys echey: 6Er-aggle dy jed y cooilleeneyder-folley er-eiyrt y varrooder, ayns chiass e chorree, as berraghtyn er, kyndagh rish lhiurid y raad, as eh y varroo, ga nagh row eh toilchin baase, myr nagh row eh ayns goanlys rish roish shen. 7Shen-y-fa ta mee dy dty harey gra, Ver oo er-lheh dhyt hene three ard-valjyn. 8As my nee yn Chiarn dty Yee sheeyney magh dty ardjyn (myr t’eh er vreearrey da dty ayraghyn) as cur dhyt ooilley’n cheer yiall eh da dty ayraghyn; 9(My nee oo freayll ooilley ny saraghyn shoh, as jannoo ny ta mee dy harey dhyt jiu, dy choyrt graih da’n Chiarn dty Yee, as dy immeeaght dy kinjagh ayns e raaidyn) eisht ver oo gys ny three ard-valjyn shoh, three ard-valjyn elley. 10Nagh bee fuill neu-chyndagh er ny gheayrtey ’sy cheer ta’n Chiarn dty Yee dy choyrt dhyt son eiraght, myr shoh nagh bee loght fuill ort.

11Agh my ta dooinney erbee ayns noidys rish e naboo, as lhie cooyl-chlea er e hon, as girree seose n’oï, as bwoalley eh gy-baase, as cosney gys unnane jeh ny ard-valjyn shoh: 12Eisht ver shanstyr e ard-valley er dy ve er ny choyrt lesh veih shen, as nee ad eh y livrey seose gys laue y chooilleeneyder-folley dy v’er ny choyrt gy-baase. 13Cha bee chymmey ec dty hooill er, agh ver oo ersooyl loght fuill neu-chyndagh veih Israel, dy vod eh ve mie mayrt.

14Cha jean oo scughey cagliagh dty naboo, ren adsyn jeh’n chenn earish y hoiaghey seose ayns shen ny vees ayd’s son eiraght, ’sy cheer ta’n Chiarn dty Yee dy choyrt dhyt’s son dty chummal.

15Cha jean un feanish shassoo mie noi dooinney, son loght erbee, ny peccah erbee t’eh er n’yannoo, cre-erbee eh: agh er prowal daa eanish, ny er prowal three feanishyn, bee’n chooish er ny reaghey.

16My nee feanish foalsey girree seose noi dooinney erbee, as loo yn aggair n’oï: 17Eisht nee’n daa ghooinney, ta’n streeu eddyr ad, shassoo kionfenish y Chiarn, kiongoyrt rish ny saggyrtyn, as ny briwnyn vees ayns ny laghyn shen. 18As nee ny briwnyn feysht dy kiaralagh: as cur-my-ner my she feanish foalsey eh, as dy vel eh er ghoaill loo oaiagh noi e vraar: 19Eisht nee shiu rishyn, myr chiare eshyn dy v’er n’yannoo rish e vraar: myr shoh ver oo ersooyl yn olk veih ny mast’ eu. 20Dy vod feallagh elley clashtyn, as aggle y ghoaill, as nagh gow ad orroo maghey shoh dy yannoo lheid yn olk ny-vud eu. 21As cha bee chymmey ec dty hooill er, agh hed bioys son bioys, sooill son sooill, feeackle son feeackle, laue son laue, cass son cass.