CAB. II

1Eisht hyndaa shin, as ghow shin nyn yurnah veih Kadesh gys yn aasagh, rish raad yn Aarkey Jiarg, myr doardee’n Chiarn dou: as duirree shin rish ymmodee laghyn mygeayrt cronk Seir. 2As loayr y Chiarn rhym, gra, 3Ta shiu er gholl mysh y clieau shoh foddey dy liooar; chyndaa-jee my-hwoaie. 4As cur uss sarey da’n pobble, gra, Ta shiu dy gholl trooid ardjyn nyn mraaraghyn cloan Esau, ta cummal ayns Seir, as bee ad ayns aggle reue: shen-y-fa bee-jee er nyn dwoaie. 5Ny cur-jee eïe orroo; son cha der-yms diuish wheesh lheead trie jeh’n cheer oc, er-yn-oyr dy vel mee er choyrt cronk Seir da Esau son eiraght. 6Nee shiu beaghey y ’chionnaghey vouesyn lesh argid, dy vod shiu gee; as nee shiu myrgeddin ushtey ’chionnaghey voue lesh argid, dy vod shiu giu. 7Son ta’n Chiarn dty Yee er dty vannaghey, ayns ooilley obbraghyn dty laue: shione da dty immeeaght trooid yn aasagh mooar shoh: rish da-eed bleïn nish, ta’n Chiarn dty Yee er ve mayrt, cha r’ou feme nhee erbee. 8As lurg dooin v’er gholl shaghey, veih nyn mraaraghyn cloan Esau, va cummal ayns Seir, trooid raad y choan, veih Elath, as veih Ezion-gaber, ghow shin raad faasagh Voab. 9As dooyrt y Chiarn rhym’s, Faag-jee veue ny Moabiteyn, chamoo gow-jee dy chaggey roo: son cha der-yms diuish cummal ’sy cheer oc, er-yn-oyr dy vel mee er choyrt Ar da cloan Lot son eiraght. 10Ren ny Emimee cummal ayn rish earishyn foddey, pobble mooar as ymmodee, thollee myr ny Anakimee; 11Va myrgeddin ennym foawir oc, myr ny Anakimee, agh ta ny Moabiteyn genmys ad Emimee. 12Va ny Horimee myrgeddin roish nish cummal ayns Seir, agh haink cloan Esau nyn ynnyd, erreish daue v’er stroie ad roue, as er chummal ’syn ynnyd oc, myr ren Israel ayns cheer e eiraght, hug y Chiarn daue. 13Trog-jee nish erriu, dooyrt mee, as fow-jee harrish awin Zered: as hie shin harrish awin Zered. 14As va’n traa neayr’s daag shin Kadesh-barnea, derrey va shin er roshtyn harrish yn awin Zered, hoght bleeaney jeig as feed: derrey va slane sheeloghe ny deiney-caggee er lheïe ersooyl veih mastey’n cheshaght, myr va’n Chiarn er vreearrey daue. 15Son va dy jarroo laue’n Chiarn noi oc, dy stroie ad veih mastey’n cheshaght, derrey hie ad ooilley naardey.

16Myr shoh haink eh gy-kione, tra va ooilley ny deiney-caggee er duittym, as marroo veih mastey’n pobble. 17Dy loayr y Chiarn rhym’s, gra, 18T’ou dy gholl trooid Ar, harrish ardjyn Voab, yn laa jiu. 19As tra hayrnys oo er-gerrey da cloan Ammon, ny jean caggey roo, ny cur eïe orroo: son cha der-yms dhyt’s veg yn eiraght ayns thalloo cloan Ammon, er-yn-oyr dy vel mee er choyrt eh son eiraght da cloan Lot. 20(Va goo ec y cheer shen neesht son foawir, va foawir cummal ayn ’sy chenn earish, as ta ny Ammoniteyn genmys ad Zamzummim; 21Pobble mooar as ymmodee, thollee myr ny Anakimee, agh ren y Chiarn ad y stroie rhymboo, as haink ad nyn yeï, as chum ad ’syn ynnyd oc: 22Myr ren eh rish cloan Esau va cummal ayns Seir, tra stroie eh ny Horimee roue, as haink ad, as chum ad ’syn ynnyd oc, eer gys y laa jiu: 23As ny Avimee va cummal ayns Hazerim, eer gys Azzah, ren ny Caphtorim haink veih Caphtor stroie, as chum ad’syn ynnyd oc) 24Trog-jee erriu, gow-jee nyn yurnah, as immee-jee harrish yn awin Arnon: cur-my-ner, ta mee er livrey gys dty laue Sihon yn Amorite ree Heshbon, as e heer: immee er dty hoshiaght, as jean caggey rish. 25Yn laa jiu neem’s toshiaght dy choyrt yn atchim, as yn aggle jeed’s, er dy chooilley ashoon fo niau nee clashtyn goo jeed, as bee ad er-creau, as ayns angaish kyndagh rhyt.

26As hug mee chaghteryn veih faasagh Kedemoth, gys Sihon ree Heshbon, chebbal shee da, gra, 27Lhig dou goll er my hoshiaght trooid dty heer: goym y raad mooar, cha jyndaa-ym gys y laue yesh, ny gys y laue hoshtal. 28Nee oo beaghey y chreck rhym son argid, dy voddym gee: as ver oo ushtey dou son argid, dy voddym giu: cha jem ny hrooid, agh rish my chosh: 29(Myr ren cloan Esau ta cummal ayns Seir, as ny Moabiteyn ta cummal ayns Ar y yannoo rhym) derrey vee’m harrish Jordan, gys y cheer ta’n Chiarn nyn Yee dy choyrt dooin. 30Agh dob Sihon ree Heshbon raad dooin dy gholl er nyn doshiaght, son ren y Chiarn dty Yee e chree creoi, as roonagh nyn ’oï, er-chee dy livrey eh gys dty laue, myr te ry-akin jiu. 31As dooyrt y Chiarn rhym’s, Cur-my-ner, ta mee er n’yannoo toshiaght er choyrt dhyt Sihon as e heer, fo dty laue: gow er dty hoshiaght dy ghoaill eh, dy vod y cheer echey ve ayd son eiraght. 32Er shoh haink Sihon magh nyn ’oï, lesh ooilley e gheiney, dy chaggey ec Jahaz. 33As ren y Chiarn nyn Yee y livrey eh hooin, as stroie shin eh, as e vec, as ooilley e gheiney. 34As ghow shin ooilley e ard-valjyn ec y traa cheddin, as stroie shin dy bollagh ny deiney, as ny mraane, as cloan veggey dy chooilley ard-valley; cha daag shin veg er-mayrn: 35Agh yn ollagh ghow shin son spooilley dooin hene, as spooilley ny ard-valjyn ghow shin. 36Veih Aroer, ta rish oirr awin Arnon, as veih’n ard-valley ta rish yn awin, eer gys Gilead, cha row ard-valley hene ro lajer er nyn son: ren y Chiarn nyn Yee ooilley y livrey dooin. 37Agh noi cheer cloan Ammon cha daink oo, ny gys ynnyd erbee jeh’n awin Jabbok, ny gys ard-valjyn ny sleityn, ny gys ynnyd erbee dy ren y Chiarn nyn Yee nyn lhiettal.