CAB. XX

1Tra t’ou goll magh dy chaggey noi dty noidyn, as fakin cabbil, as fainee, as sleih ny shlee ayns earroo na oo hene, ny gow aggle roue: son ta’n Chiarn dty Yee mayrt, hug lesh uss magh ass cheer Egypt. 2As hig eh gy-kione, tra ta shiu er dayrn er-gerrey gys y chaggey, dy shass y saggyrt magh, as loayree eh rish y pobble 3As jir eh roo, Eaisht, O Israel, ta shiu tayrn yn laa jiu er-gerrey gys caggey noi nyn noidyn; ny caill-jee nyn gree, ny gow-jee aggle, as ny bee-jee er-creau, ny fo atchim erbee kyndagh roo: 4Son ta’n Chiarn nyn Yee eshyn ta goll mêriu, dy chaggey er nyn son noi nyn noidyn, dy hauail shiu. 5As nee ny leeideilee fockley magh ayns clashtyn y cheshaght, gra, Quoi’n dooinney t’er hroggal thie noa, as nagh vel er chasherickey eh? Lhig da goll dy chummal gys e hie, er-aggle dy duitt eh ’sy chaggey, as dooinney elley dy ghoaill soylley jeh. 6As dooinney erbee t’er hoiaghey garey-feeyney, as nagh vel foast er n’ee jeh, lhig dasyn neesht, chyndaa gys e hie, er-aggle dy bee eh er ny varroo ’sy chaggey, as dooinney elley dy ghoaill soylley jeh. 7As dooinney erbee ta nasht rish ben, as nagh vel foast er phoosey ee, lhig dasyn goll roish gys e hie, nagh bee eh er ny varroo ’sy chaggey, as dy gow dooinney elley ee. 8As nee ny leeideilee loayrt ny-sodjey rish y cheshaght, as jir ad, Dooinney erbee ta aggle er, as lhag-chreeagh, lhig da goll roish gys e hie, nagh lhaggee eh cree e vraaraghyn, myr y cree echey hene. 9As tra vees ny leeideilee erreish loayrt rish y cheshaght, dy jean ad soiaghey captanyn er ny sheshaghtyn, dy leeideil y pobble.

10Tra hig oo er-gerrey da ard-valley dy chaggey n’oï, eisht nee oo chebbal shee da. 11As my ver eh ansoor sheeoil dhyt, as cur fosley dhyt, eisht bee ooilley’n pobble ta ry-gheddyn ayn fo keesh dhyt, as bee ad fo dty reill. 12As mannagh jean eh shee rhyt, agh shassoo magh ayns caggey dt’oï, nee oo eisht eh y chruinnaghey stiagh. 13As tra ta’n Chiarn dty Yee er livrey eh gys dty laue, nee oo bwoalley dy chooilley ghooinney t’ayn lesh foyr y chliwe. 14Agh ny mraane, as y chloan, as y maase, as ooilley ny t’ayns yn ard-valley, eer ooilley yn spooilley echey, nee oo goaill dhyt hene: as freayll dty chour hene spooilley dty noidyn, ta’n Chiarn dty Yee er choyrt dhyt. 15Myr shoh nee oo rish ooilley ny ard-valjyn ta feer foddey voïd, nagh vel jeh ard-valjyn ny ashoonyn shoh. 16Agh jeh ard-valjyn y pobble shoh, ta’n Chiarn dty Yee dy choyrt dhyt son eiraght, cha jean oo sauail bio cretoor dy vel ennal ayn: 17Agh nee oo dy bollagh stroie ad, ta shen, ny Hittiteyn, as ny Amoriteyn, ny Canaaniteyn, as ny Perizziteyn, ny Hiviteyn, as ny Jebusiteyn, myr ta’n Chiarn dty Yee er dty harey: 18Nagh n’ynsee ad oo dy yannoo lurg ooilley ny cliaghtaghyn eajee oc, t’ad er n’yannoo gys ny jeeghyn oc hene, as shiu myr shoh dy yannoo peccah noi’n Chiarn y Jee eu. 19Tra vees oo cruinnaghey ard-valley ry-foddey dy hraa, ayns caggey n’oï dy ghoaill eh, cha jean oo stroie ny biljyn echey, ny giarey ad sheese lesh teigh: son foddee oo gee jeu, as cha jean oo giarey ad sheese, dy yannoo ymmyd jeu ’sy chaggey, son ta billey’n vagher shirveish beaghey da dooinney. 20Agh ny biljyn ta fys ayd nagh vel son beaghey, ad shoh foddee oo stroie as lhieggal; as nee oo troggal bulwarkyn noi’n ard-valley ta caggey rhyt, derrey vees eh er ny stroie.