CAB. XXI

1My vees dooinney er ny gheddyn ny lhie marroo ’sy vagher, ayns y cheer ta’n Chiarn dty Yee coyrt dhyt son dty eiraght, as nagh vel fys quoi varr eh: 2Eisht hig dty hanstyr as dty vriwnyn magh, as nee ad towse gys ny ard-valjyn mygeayrt-y-mysh y varroo. 3As nee shanstyr yn ard-valley shen, ta by-niessey da’n dooinney marroo, colbagh y ghoaill nagh row rieau obbrit, ny er hayrn ’sy whing. 4As ver shanstyr yn ard-valley shen lhieu sheese yn cholbagh gys glione reeastaneagh, nagh vel traaueit, ny cuirt, as ver ad y kione jeh’n cholbagh ayns shen ’sy ghlione. 5As hig ny saggyrtyn mec Levi er-gerrey (son adsyn ta’n Chiarn dty Yee er reih dy hirveish da, as dy vannaghey ayns ennym y Chiarn) as liorish y vriwnys ocsyn vees dy chooilley streeu, as dy chooilley vuilley er ny reaghey. 6As nee ooilley shanstyr yn ard-valley shen by-niessey da’n varroo, niee nyn laueyn erskyn y cholbagh ta’n chione goit j’ee ’sy ghlione. 7As nee ad gra, Cha vel ny laueyn ain er gheayrtey yn uill shoh, chamoo ta ny sooillyn ain er vakin eh. 8Bee myghinagh, O Hiarn, da dty phobble Israel, t’ou er livrey, as ny cur fuill gyn-loght gys lieh dty phobble Israel. As bee’n uill er ny leih daue. 9Myr shoh ver oo ersooyl loght fuill neu-chyndagh veih ny mast’ eu, tra nee oo shen ny ta cairagh ayns shilley’n Chiarn.

10Tra t’ou goll magh dy chaggey noi dty noidyn, as ta’n Chiarn dty Yee er livrey ad gys dty laue, as t’ou er ghoaill ad nyn gappee. 11As t’ou fakin mastey ny cappeeyn ben aalin, as dy vel graih ayd urree, dy ve dty ven: 12Eisht ver oo lhiat ee gys dty hie, as nee oo baarey’n chione eck, as giarey e yngnyn. 13As ver ee coamrey e cappeeys j’ee as nee ee tannaghtyn ayns dty hie, as dobberan son e ayr as e moir slane mee, as maghey shen, nee oo goaill ee, as bee oo son dooinney jeeish, as bee ish son ben dhyt’s. 14As mannagh bee taitnys ayd aynjee, nee oo lhiggey j’ee goll raad saillee, agh cha greck oo ee edyr son argid; ny jannoo marchantys j’ee, son dy vel oo er n’injillaghey ee.

15My vees daa ven ec dooinney, as graih smoo echey er y derrey yeh na er y jeh elley, as ad ny-neesht er n’ymmyrkey cloan da, as my ta’n mac shinney lh’eeish sloo ta graih echey urree: 16Eisht tra t’eh rheynn e chooid er e vec, cha jean eh eirey jeh mac y ven bare bynney lesh, roish mac y ven elley, ta’n eirey cair. 17Agh nee eh goaill rish y mac eck’s sloo bynney lesh, dy ve yn eirey, liorish coyrt da ayrn dooble jeh ooilley ny t’echey: son toshiaght e niart eh: ta cairys eiraght echey.

18My ta mac roonagh as mee-viallagh ec dooinney, nagh der geill da coyrle e ayrey, ny coyrle e vayrey, as lurg daue v’er smaghtaghey eh, nagh der eh biallys daue: 19Nee eisht e ayr as e voir greme y ghoaill er, as ver ad lhieu eh fenish shanstyr e ard-valley, as gys giat ny quaallagh: 20As jir ad rish shanstyr e ard-valley, T’eh shoh nyn mac roonagh, as mee-viallagh, cha n’eaisht eh rish nyn goraa; t’eh ny ghlutterey as meshteyllagh. 21As nee ooilley deiney e ard-valley claghey eh dy baase: myr shen ver oo yn olk ersooyl veih ny mast’ eu, as nee ooilley Israel clashtyn as goaill aggle.

22As my ta dooinney er n’yannoo peccah ta toilchin baase, as faagit magh son baase, as eh ’ve croghit er billey: 23Cha n’aag oo e chorp fud-ny-hoie er y villey, agh nee oo, son shickyrys, eh y oanluckey yn laa cheddin (son t’eshyn t’er ny chroghey fo mollaght veih Jee) nagh bee dty heer fo loght, ta’n Chiarn dty Yee coyrt dhyt son eiraght.