CAB. XXII

1Cha vaik oo dow ny keyrrey dty vraarey goll er-shaghryn, as chyndaa dty hooill voue, nee oo er dy chooilley haase cur lhiat ad reesht gys dty vraar. 2As mannagh vel dty vraar er-gerrey dhyt, ny mannagh nione dhyt eh, eisht ver oo lhiat eh gys dty hie hene, as bee eh mayrt, derrey nee dty vraar briaght ny lurg, as livreyee oo eh da reesht. 3Er yn aght cheddin nee oo rish e assyl, as myrgeddin nee oo rish e choamrey, as rish dy chooilley chooid cailjey va lesh dty vraar, t’eshyn er choayl, as uss er gheddyn, nee oo myrgeddin: cha jean oo keiltyn oo hene.

4Cha jean oo fakin assyl ny dow dty vraarey ny lhie ’sy raad-vooar, as chyndaa ersooyl voue; nee oo, son shickyrys, cooney dy hroggal ad.

5Cha vel ben dy cheau coamrey dooinney; chamoo ta dooinney dy ve coamrit myr ben: son ta ooilley ny ta jannoo y lheid dwoaiagh da’n Chiarn dty Yee.

6My hagh’rys oo er y raad er edd ushag, ayns billey erbee, ny er y thalloo, my she eïn ny oohyn t’ayn, as y chenn ushag ny hoie er ny heïn, ny er ny oohyn, cha jean oo goaill yn chenn ushag marish ny heïn. 7Agh nee oo dy shickyr lhiggey’n raad da’n chenn ushag, as nee oo goaill ny heïn, dy vod eh ve mie mayrt, as dy vod dty laghyn’ve beayn.

8Tra t’ou troggal thie noa, eisht nee oo voalley rish oirr mooie y chione, nagh dayrn oo fuill er dty hie, my nee dooinney erbee tuittym jeh.

9Cha jean oo dty gharey-feeyney y chuirr lesh caghlaaghyn rass kione-y-cheilley; nagh bee dty rass t’ou er chuirr, as mess dty gharey-feeyney neu-follan.

10Cha jean oo traaue lesh dow as assyl cooidjagh. 11Cha jean oo ceau coamrey jeh caghlaaghyn sorch, lheid as linsey-woolsey. 12Nee oo dhyt hene fringeyn er kiare skianyn y gharmad t’ou dy cheau.

13My nee dooinney erbee poosey ben, as cummal mâree, as dwoaie ’chur jee, 14As cur oyr son taggloo n’oïee, as cur lesh drogh ghoo urree, as gra, Ghow mee yn ven shoh, as tra haink shin cooidjagh, cha dooar mee ee ny moidyn: 15Er shoh nee ayr as moir y ven aeg goaill, as cur lhieu magh cowraghyn e moidynys, fenish shanstyr yn ard-valley ’sy whaiyl. 16As jir ayr y ven aeg rish y chanstyr, Hug mee my inneen da’n dooinney shoh son ben, as ta dwoaie echey urree, 17As cur-my-ner, t’eh er choyrt drogh ghoo jee, gra, Cha dooar mee dty inneen ny moidyn, as ny-yeih jeeagh-jee shoh cowraghyn moidynys my inneen: as nee ad skeayley’n aanrit kiongoyrt rish shanstyr yn ard-valley. 18As nee shanstyr yn ard-valley shen, yn dooinney shen y ghoaill, as kerraghey choyrt er. 19As bee eh oolit ayns keead shekel dy argid, as ver ad shen da ayr y ven aeg, son dy vel eh er choyrt drogh ennym da moidyn ayns Israel; as bee ee son ben da, cha vod eh cur ee ersooyl choud as s’bio eh. 20Agh my te firrinagh, as nagh bee cowraghyn moidynys ry-gheddyn ayns lieh yn ven aeg. 21Eisht ver ad lhieu magh yn ven aeg gys dorrys thie e ayrey, as nee deiney’n ard-valley eck claghey gy-baase ee: son dy vel ee er n’yannoo ommijys ayns Israel, ayns jannoo streebeeys ayns thie e ayrey: myr shoh ver oo ersooyl olk veih ny mast’ eu.

22My vees dooinney goit ny lhie marish ben-phoost, eisht bee ad ny-neesht er nyn goyrt gy-baase, chammah yn dooinney, ren lhie marish y ven, as y ven hene: myr shoh ver oo olk ersooyl voish Israel.

23My vees ben aeg ta ny moidyn nasht rish sheshey, as my nee dooinney goaill ee ’syn ard-valley, as lhie mâree: 24Eisht ver shiu lhieu ad nyn-neesht magh gys giat yn ard-valley shen, as claghey ad gy-baase; yn ven aeg son nagh dyllee ee magh, myr v’ee ’syn ard-valley: as y dooinney, son dy vel eh er n’injillaghey ben e naboo: myr shoh ver oo ersooyl yn olk veih ny mast’ eu.

25Agh my yiow dooinney ayns y vagher ben aeg nasht, as goaill ee er-êgin as lhie mâree, eisht she’n dooinney ny-lomarcan, ren lhie mâree, vees er ny choyrt gy-baase. 26Agh rish y ven aeg cha jean oo veg; cha vel y ven aeg er n’yannoo peccah erbee ta toilchin baase: son yn aght cheddin as ta dooinney girree noi e naboo, as marroo eh, eer myr shen ta’n chooish shoh. 27Son hooar eh ee ’sy vagher, as dyllee’n ven aeg, as cha row unnane erbee dy hauail ee.

28My yiow dooinney ben aeg ta ny moidyn, nagh vel nasht, as goaill greme urree, as lhie mâree, as shoh dy ve prowit: 29Eisht eeckee yn dooinney ren lhie mâree, jeih shekelyn as da-eed dy argid da ayr y ven aeg, as bee ee son ben da, er-yn-oyr dy vel eh er n’injillaghey ee, cha vod eh scarrey r’ee ooilley laghyn e vea.

30Cha jean dooinney goaill huggey ben e ayrey, dy hayrn scammylt er e ayr.