CAB. XXIII

1Cha bee eunuch, ny fer ta spoiyt, goit stiagh mastey pobble y Chiarn. 2Cha bee fer oainjyragh goit stiagh mastey pobble y Chiarn: eer gys e jeihoo heeloghe, cha bee eh goit stiagh mastey pobble y Chiarn. 3Cha bee Ammonite ny Moabite goit stiagh gys pobble y Chiarn; eer gys y jeihoo heeloghe cha bee ad goit stiagh gys cairys pobble y Chiarn son dy bragh. 4Son nagh daink ad nyn guail er y raad lesh arran as ushtey, tra haink shiu magh ass Egypt, as son dy ren ad failley dt’oï Balaam mac Beor jeh Pethor ayns Mesopotamia, dy ghwee mollaght ort. 5Ny-yeih, cha jinnagh y Chiarn dty Yee geaishtagh rish Balaam: agh ren y Chiarn dty Yee chyndaa yn mollaght gys bannaght ort, son dy bynney lesh y Chiarn dty Yee oo. 6Cha jean oo shirrey yn shee oc ny’n foays oc ’chur er y hoshiaght ooilley laghyn dty vea, son dy bragh.

7Cha der oo dwoaie da Edomite, son dty vraar eh: cha der oo dwoaie da Egyptian, son dy r’ou hene dty yoarree ayns y cheer echey. 8Bee’n chloan hig jeusyn, er nyn ghoaill stiagh gys chaglym-cooidjagh y Chiarn ayns nyn trass heeloghe.

9Tra ta’n cheshaght-caggee goll magh noi dty noidyn, eisht freill oo hene veih dy chooilley ghrogh red.

10My ta dooinney erbee ny mast’ eu nagh vel glen, kyndagh rish neu-ghlennid ta taghyrt er ’syn oie, eisht hed eh magh ass y champ, cha jig eh er cheu-sthie jeh’n champ. 11Agh tra te lesh yn astyr, nee eh niee eh hene lesh ushtey: as tra ta’n ghrian ny lhie, hig eh reesht stiagh ’sy champ.

12Bee boayl ayd myrgeddin cheu-mooie jeh’n champ, huggey hed oo magh. 13As bee spaag ayd er dty lorg, as tra hed oo gys thalloo, nee oo cleiy lesh, as chyndaa dy choodaghey shen haink voïd. 14Son ta’n Chiarn dty Yee gimmeeaght ayns mean dty champ, dy livrey oo, as dy chur dty noidyn fo-chosh royd: shen-y-fa vees dty champ casherick, nagh vaik eh red erbee neu-ghlen aynyd, as chyndaa ersooyl voïd.

15Cha jean oo livrey seose da e vainshtyr yn sharvaant joarree, ta er chosney voish dewilys e vainshtyr hood’s. 16Nee eh cummal mayrt, eer ny mast’ eu, ’syn ynnyd nee eh reih, ayns unnane erbee dy naillish jeh dty ard-valjyn: cha jean oo tranlaase er.

17Cha bee streebagh jeh inneenyn Israel, ny Sodomite jeh mec Israel.

18Cha der oo lhiat faill streebagh, ny price cretoor neu-ghlen stiagh ayns thie yn Chiarn dty Yee, son breearrey erbee: son t’ad ny-neesht eajee gys y Chiarn dty Yee.

19Cha drog oo use jeh dty vraar, use argid, ny use beaghey, ny use ass nhee erbee ta eeasit magh. 20Da joarree foddee oo geeasagh er use, agh jeh dty vraar cha drog oo use, dy vod y Chiarn dty Yee oo y vannaghey ayns ooilley ny t’ou cur dty laue huggey, ayns y cheer raad t’ou goll dy chummal ayn.

21Tra t’ou jannoo breearrey gys y Chiarn dty Yee, ny lhig shaghey dy eeck eh: son nee yn Chiarn dty Yee son shickyrys kiangley ort eh: as veagh eh ny peccah dhyt. 22Agh mannagh jean oo breearrey, cha bee eh peccah dhyt. 23Shen ny t’er n’gholl magh ass dty veillyn nee oo freayll as cooilleeney, eer chebbal-arryltagh, rere myr t’ou er vreearrey gys y Chiarn dty Yee, as t’ou er n’yialdyn lesh dty veeal.

24Tra hed oo stiagh ayns garey-feeyney dty naboo, foddee oo gee cooid dty vian jeh ny smeyr-feeyney lurg dt’aigney hene, agh ayns dty haagh cha der oo veg. 25Tra hig oo ayns magher arroo dty naboo, foddee oo jeeassyn y phluckey lesh dty laue: agh cha der oo corran fo arroo dty naboo.