CAB. XXIV

1Tra ta dooinney er phoosey ben, as my te myr shen nagh my-haittin lesh ee, er-yn-oyr dy vel eh er gheddyn neu-ghlennid ennagh aynjee: eisht lhig da screeuyn-scarree ’yannoo, as y choyrt jee eh ny laue, as chyndaa ee magh ass e hie. 2As tra t’ee scarrey rish e hie, foddee ee goll, as ve son ben da dooinney elley. 3As mannagh my-haittin lesh y dooinney s’jerree ee, as eh dy choyrt screeuyn-scarree jee ayns e laue, as chyndaa ee ass e hie, ny my yiow’n dooinney s’jerree baase, ghow ee son ben; 4Cha vod e chied dooinney, hug ee ersooyl, goaill ee reesht dy ve son ben da, lurg j’ee ve fo yn lhiettal shoh: son ta shen eajee kiongoyrt rish y Chiarn, as cha dayrn oo peccah er y cheer, ta’n Chiarn dty Yee dy choyrt dhyt son eiraght.

5Tra ta dooinney noa-poost, cha jed eh magh gys y chaggey, chamoo vees currym erbee er ny choyrt er: agh bee eh seyr ec y thie son un vleïn, as nee eh gerjaghey e ven t’eh er ghoaill.

6Cha jig lesh dooinney erbee dy ghoaill yn chlagh-wyllin s’inshilley ny syrjey ayns gioal; son t’eh goaill gioal er bioys dooinney.

7My vees dooinney er ny gheddyn dy gheid veg jeh e vraaraghyn cloan Israel, as jannoo marchantys jeh, ny creck eh; eisht bee’n maarliagh shen er ny choyrt gy-baase, as ver oo yn olk ersooyl veih ny mast’ eu.

8Gow tastey, ayns doghan dy louraanys, dy jean oo dy kiaralagh lurg ooilley ny nee ny saggyrtyn ny Leviteyn gynsaghey dhyt: myr hug mish currym orroosyn, myr shen nee shiu dy kiaralagh y chooilleeney. 9Cooinee cre ren y Chiarn rish Miriam er y raad, lurg diu v’er jeet ass Egypt.

10Tra t’ou geeasagh nhee erbee da dty vraar, cha jed oo stiagh ayns e hie, dy ghoaill e yioal. 11Nee oo shassoo cheu-mooie, as ver y dooinney da t’ou er n’yeeasagh lesh magh y gioal hood. 12As my vees y dooinney boght, cha jeu dy chadley as e yioal ayd. 13Er dy chooilley aght livreyee oo huggey e yioal reesht ec lhie ny greiney, dy vod eh cadley ayns e eaddagh hene, as oo y vannaghey: as bee shoh er ny choyrt gys dty lieh son cairys fenish y Chiarn dty Yee.

14Cha jean oo tranlaase er sharvaant faillagh ta boght as ymmyrchagh, edyr eh dy ve jeh dty vraaraghyn, ny jeh dty yoarreeyn, t’ayns dty heer, er cheu-sthie jeh dty yiattyn. 15Kiart er e laa, roish lhie ny greiney, ver oo e aill da, son dy nee boght eh, as e chree soit er: er-aggle dy jean eh gaccan dt’oï gys y Chiarn, as dy bee eh peccah dhyt. 16Cha bee ny ayraghyn er ny choyrt gy-baase son y chloan; chamoo vees cloan er nyn goyrt gy-baase son ny ayraghyn: bee dy chooilley ghooinney er ny choyrt gy-baase son e pheccah hene.

17Cha jean oo cassey briwnys y joarree ny’n lhiannoo gyn ayr, chamoo nee oo garmad ben-treoghe y ghoaill son gioal. 18Agh nee oo cooinaghtyn dy r’ou hene fo bondiaght ayns Egypt, as dy ren y Chiarn dty Yee livrey oo veih shen: shen-y-fa ta mee dy dty harey dy yannoo yn red shoh. 19Tra t’ou buinn dty hroar ayns dty vagher, as my t’ou er yarrood bunney er y vagher, cha jed oo reesht dy chur lhiat eh: bee eh son y joarree, son y lhiannoo gyn ayr, as y ven-treoghe: dy vod y Chiarn dty Yee uss y vannaghey ayns ooilley obbraghyn dty laueyn. 20Tra t’ou craa dty villey-olive, cha jed oo yn nah cheayrt harrish ny banglaneyn: bee eh cour y joarree, y lhiannoo gyn ayr, as y ven-treoghe. 21Tra t’ou chaglym messyn dty gharey-feeyney cha jean oo chymsagh ad dy bollagh: bee eh son y joarree, y lhiannoo gyn ayr, as y ven-treoghe. 22As nee oo cooinaghtyn dy r’ou hene fo bondiaght ayns cheer Egypt: shen-y-fa ta mee coyrt currym ort dy yannoo myr shoh.