CAB. XXV

1My vees streeu eddyr deiney, as dy der ad lhieu yn chooish fenish ny briwnyn, eisht nee ad seyrey’n dooinney cairagh, as deyrey’n vee-chairagh. 2As my vees eh ry-gheddyn, dy vel y fer kyndagh toilchin buillaghyn, dy der y briw er dy lhie sheese, as eh dy ve scuitchit ny enish; cordail rish e oill, whilleen scuitch shen. 3Cha negin erskyn da-eed builley ve er ny choyrt da: er-aggle my hed eh harrish shoh, dy bee dty vraar eisht dwoaiagh ayns dty hilley.

4Cha giangle oo beeal y dow, choud’s t’eh stampey magh yn arroo. 5My ta braaraghyn cummal cooidjagh, as fer jeu dy gheddyn baase gyn cloan, cha jean ben y varroo poosey, ass e kynney, rish joarree: te kianlt er braar y dooinney dy ghoaill ee son ben da hene, as dy chooilleeney r’ee currym y vraar t’er n’immeeaght. 6As nee’n chied lhiannoo ver ee son y theihll, fo ennym yn braar ta marroo, cheet stiagh ’syn eiraght, nagh bee’n ennym echey caillit ayns Israel. 7As mannagh vel e haitnys dy phoosey ben e vraarey, eisht lhig da ben e vraarey goll gys giat y chanstyr, as gra Ta braar my heshey gobbal dy reayll seose ennym e vraar ayns Israel, cha jean eh cooilleeney currym braarey my heshey. 8Eisht nee shanstyr yn ard-valley sumney, eh, as loayrt rish: as my nee eh shassoo magh; as gra, Cha nee m’aigney eh dy ghoaill ee: 9Eisht hig ben e vraarey huggey, ayns fenish y chanstyr, as nee ee e vraag y eaysley jeh e chass, as nee ee shelley y cheau ’sy e eddin, as gansoor, as gra, Shoh myr vees eh jeant rish y dooinney, nagh jean cummal seose thie e vraarey. 10As shoh’n ennym yiow e hie ayns Israel, Thie fer ny coshey-rooisht.

11Tra ta deiney tuittym magh ry-cheilley, as my hig ben-heshey yn derrey yeh jeu eddyr ad, dy livrey e sheshey ass y laue echeysyn ta dy woalley eh, as lesh e laue greimmey eh ’sy ghoall: 12Bee e laue er ny yiarey j’ee, cha bee chymmey ec dty hooill urree. 13Cha bee ayd ayns dty spagey, caghlaa dy chlaghyn-meih, trome as eddrym.

14Cha bee ayd ayns dty hie caghlaa siyn-towse, mooar as beg. 15Agh meih kiart as lowal, as towse kiart as lowal vees ayd: dy vod dty laghyn ve beayn ’sy cheer ta’n Chiarn dty Yee dy choyrt dhyt. 16Son ta ooilley ta coyrt rish lheid ny cliaghtaghyn, as ooilley ta jannoo dy neu-ynrick, feohdoil da’n Chiarn dty Yee.

17Cooinee ny ren Amalek rhyt’s er y raad, tra haink shiu magh ass Egypt: 18Kys huitt eh ort er y raad, as woaill eh adsyn v’er-jerrey, eer adsyn ooilley va moal cheu dty chooylloo, tra v’ou deinagh as tooillit; as cha row aggle Yee roish. 19Shen-y-fa, tra ver y Chiarn dty Yee fea dhyt, veih ooilley dty noidyn er dy chooilley heu, ayns y cheer ta’n Chiarn dty Yee dy choyrt dhyt, son eiraght dy chummal ayn, dy der oo ass cooinaghtyn ennym Amalek dy bollagh fo niau; jeeagh nagh jarrood oo eh.