CAB. XXVI

1As shoh myr vees eh, erreish dhyt v’er jeet gys y cheer, ta’n Chiarn dty Yee dy choyrt dhyt son eiraght, as possession ’ve ayd jeh, as cummal ayn: 2Dy gow oo toshiaght ny chied-vessyn jeh dty halloo, ta’n Chiarn dty Yee dy choyrt dhyt, as ver oo eh ayns baskad, as hed oo gys yn ynnyd, nee’n Chiarn dty Yee y reih, dy chur e ennym ayn. 3As hed oo gys y taggyrt vees ayns ny laghyn shen, as jir oo rish, Ta mee goaill-rish jiu gys y Chiarn my Yee, dy vel mee er roshtyn gys y cheer, ren y Chiarn breearrey da nyn ayraghyn, dy choyrt dooinyn. 4As gowee’n saggyrt yn vaskad ass dty laue, as soiaghey eh kiongoyrt rish altar y Chiarn dty Yee. 5As nee oo loayrt, as gra fenish y Chiarn dty Yee, Syrian, ayns gaue baaish, va m’ ayr, as hie eh sheese gys Egypt, as chum eh er e yoarreeaght ayns shen, lesh beggan ayns earroo, as haink eh dy ve ashoon mooar, niartal, as ymmodee. 6As hug ny Egyptianee drogh ghellal dooin, as ren ad tranlaase orrin, as hug ad shin fo bondiaght dewil. 7As tra ren shin gaccan gys y Chiarn Jee nyn ayraghyn, cheayll y Chiarn nyn goraa, as yeeagh eh er nyn seaghyn, y deinys, as y tranlaase ain. 8As hug y Chiarn lesh shin magh ass Egypt, lesh laue niartal, as lesh roih sheeynt magh, lesh atchim mooar, as lesh cowraghyn as lesh mirrilyn. 9As t’eh er choyrt lesh shin gys yn ynnyd shoh, as er choyrt dooin yn cheer shoh, dy jarroo cheer ta palchey ayns bainney as mill. 10As cur-my-ner nish, ta mee er chur lhiam ny chied-vessyn y thallooin, t’ou uss, O Hiarn, er choyrt dou: as nee oo soiaghey eh kiongoyrt y Chiarn dty Yee, as ver oo ooashley kiongoyrt rish y Chiarn dty Yee. 11As nee oo boggey ’ghoaill ayns dy chooilley nhee mie, ta’n Chiarn dty Yee er choyrt dhyt, as da dty hie, oo hene, as y Levite, as y joarree ta ny mast’ eu.

12Tra t’ou erreish geeck jaghee jeh ooilley dty hroar, ’sy trass vleïn; ver oo jaghee elley da’n Levite, da’n joarree, da’n chloan gyn ayr, as y ven-treoghe, dy vod beaghey ’ve oc cheu-sthie jeh dty yiattyn, as ad ve jeant magh: 13Eisht nee oo gra rish y Chiarn dty Yee, Ta mee er choyrt lhiam gys shoh ny reddyn casherick [ny jagheenyn] ass my hie, as ta mee er choyrt ad da’n Levite, as da’n joarree, da’n chloan gyn ayr, as da’n ven-treoghe, cordail rish ooilley dty haraghyn; cha vel mee er vrishey dty oardaghyn, chamoo ta mee er yarrood ad. 14Cha vel mee er n’ee jeu ayns my ghobberan, chamoo ta mee er ghoaill veg jeu ersooyl son ymmyd erbee neu-ghlen; chamoo ta mee er vaarail veg jeu son ny merriu: agh ta mee er n’eaishtagh rish coraa’n Chiarn my Yee, as ta mee er n’yannoo cordail rish ooilley ny t’ou er harey dou. 15Jeeagh neose veih dty chummal casherick, veih niau, as bannee dty phobble Israel, as y cheer t’ou er choyrt dooin, myr t’ou er vreearrey da nyn ayraghyn: cheer ayn ta palchey bainney as mill.

16Er y laa jiu ta’n Chiarn dty Yee er harey oo dy chooilleeney ny slattyssyn as ny briwnyssyn shoh: nee oo er-y-fa shen freayll, as cooilleeney ad, lesh ooilley dty chree, as lesh ooilley dt’annym. 17T’ou er ghoaill rish dy foshlit yn laa t’ayn jiu, dy nee’n Chiarn dty Yee, dy immeeaght ayns e raaidyn, as dy reayll e lattyssyn, as e oardaghyn, as e vriwnyssyn, as dy ve biallagh da e choraa. 18As ta’n Chiarn er ghoaill rhyt’s jiu, dy ve yn pobble reiht echey hene, myr yiall eh dhyt, as dy vreillagh oo ooilley e oardaghyn: 19As dy hoiaghey oo seose, erskyn ooilley ny ashoonyn t’eh er chroo, ayns moylley, as ayns ennym, as ayns ooashley, dy vod oo ve ny phobble casherick da’n Chiarn dty Yee, myr t’eh er loayrt.