CAB. XXVII

1As doardee Moses, marish ooilley shanstyr Israel, yn pobble, gra Freill-jee ooilley ny oardaghyn ta mish dy harey diu er y laa shoh. 2As hig eh gy-kione, tra vees shiu er n’gholl harrish Jordan, gys y cheer ta’n Chiarn dty Yee dy choyrt dhyt, dy jean uss soiaghey seose dhyt claghyn mooarey, as ad y phlastrail harrish. 3As nee oo scrieu orroo ooilley goan y leigh shoh, erreish dhyt v’er n’gholl harrish, dy vod oo goll stiagh ’sy cheer, ta’n Chiarn dty Yee dy choyrt dhyt, cheer ayn ta palchey bainney as mill: myr ta’n Chiarn Jee dt’ayraghyn er yialdyn dhyt. 4Nee shiu, er-y-fa shen, tra ta shiu er n’gholl harrish Jordan, soiaghey seose ny claghyn shoh, ta mee jiu er harey, ayns cronk Ebal, as ad y phlastrail harrish. 5As ayns shen nee oo altar y hroggal gys y Chiarn dty Yee, altar cloaie: cha drog oo seose greïe erbee yiarn orroo. 6Nee oo altar y Chiarn dty Yee y hroggal dy chlaghyn slane: as nee oo ourallyn-losht y hebbal eer gys y Chiarn dty Yee. 7As nee oo ourallyn-shee y hebbal, as gee ayns shen, as boggey ’ghoaill kiongoyrt rish y Chiarn dty Yee. 8As nee oo scrieu er ny claghyn ooilley goan y leigh shoh, dy feer chronnal.

9As loayr Moses, as ny saggyrtyn ny Leviteyn rish ooilley Israel, gra, Gow tastey, as eaisht, O Israel; yn laa jiu t’ou er jeet dy ve pobble y Chiarn dty Yee. 10Ver oo, er-y-fa shen, biallys da coraa’n Chiarn dty Yee, as nee oo cooilleeney ooilley e oardaghyn, as e lattyssyn, ta mee dy harey dhyt y laa jiu.

11As hug Moses currym da’n pobble yn laa cheddin, gra, 12Nee ad shoh shassoo, er cronk Gerizim, dy vannaghey yn pobble, tra ta shiu er jeet harrish Jordan; Simeon, as Levi, as Judah, as Issachar, as Joseph, as Benjamin. 13As nee ad shoh shassoo er cronk Ebal, dy ockley mollaght: Reuben, Gad, as Asher, as Zebulun, Dan, as Naphtali.

14As nee ny Leviteyn loayrt, as gra rish ooilley Israel, lesh ard choraa, 15Cursit ta’n dooinney, ta jannoo jalloo erbee grainnit ny roit, ny red feohdoil da’n Chiarn, jeant liorish laueyn yn obbree, dy choyrt eh ayns ynnyd follit: as nee ooilley’n pobble gansoor, as gra, Amen. 16Cursit t’eshyn, ta soiaghey beg jeh e ayr as e voir: as jir ooilley’n pobble, Amen. 17Cursit t’eshyn, ta scughey cagliagh e naboo: as jir ooilley’n pobble, Amen. 18Cursit t’eshyn, ta cur y doal er-shaghryn: as jir ooilley’n pobble, Amen. 19Cursit t’eshyn, ta coyrt briwnys aggairagh ayns cooish y joarree, yn chloan gyn ayr, as y ven-treoghe, as jir ooilley’n pobble, Amen. 20Cursit t’eshyn, ta lhie marish ben e ayrey; son dy vel eh er roostey slheeayst e ayrey: as jir ooilley’n pobble, Amen. 21Cursit t’eshyn, ta lhie marish keint erbee dy vaagh: as jir ooilley’n pobble, Amen. 22Cursit t’eshyn, ta lhie marish e huyr, inneen e ayrey, ny inneen e vayrey: as jir ooilley’n pobble, Amen. 23Cursit t’eshyn, ta lhie marish e voir-’sy-leigh: as jir ooilley’n pobble, Amen. 24Cursit t’eshyn, ta bwoalley e naboo dy follit: as jir ooilley’n pobble, Amen. 25Cursit t’eshyn, ta goaill leagh, dy stroie yn dooinney gyn-loght: as jir ooilley’n pobble, Amen. 26Cursit t’eshyn, nagh vel shassoo gys ooilley goan y leigh shoh, dy chooilleeney ad: as jir ooilley’n pobble, Amen.