CAB. XXVIII

1As hig eh gy-kione, my nee oo geaishtagh dy imneagh rish coraa’n Chiarn dty Yee, dy reayll as dy chooilleeney ooilley e oardaghyn, ta mee dy harey dhyt jiu, dy jean y Chiarn dty Yee oo y hoiaghey seose erskyn ooilley ashoonyn y theihll. 2As hig ooilley ny bannaghtyn shoh ort, as berree ad ort, my eaishtys oo rish coraa’n Chiarn dty Yee. 3Bannit vees oo ’syn ard-valley, as bannit vees oo ’sy vagher. 4Bannit vees sluight dty chorp, as mess dty hallooin, as ingan dty vaase, as dty ollagh, as dty hioltaneyn keyrragh. 5Bannit vees dty vaskad, as dty stoyr. 6Bannit vees oo, tra hig oo stiagh, as bannit vees oo, tra hed oo magh. 7Ver y Chiarn er dty noidyn, ta troggal seose dt’oï, dy ve bwoailt kiongoyrt rish dt’eddin: hig ad magh dt’oï un raad, as nee ad chea royd shiaght raaidyn. 8Nee’n Chiarn sarey bannaght ort, ayns dty hoaltyn, as ayns ooilley ny t’ou coyrt dty laue huggey: as nee eh dty vannaghey ’sy cheer, ta’n Chiarn dty Yee dy choyrt dhyt. 9Nee’n Chiarn dty niartaghey son pobble casherick da hene, myr t’eh er vreearrey, my reayllys oo annaghyn y Chiarn dty Yee, as gimmeeaght ayns e raaidyn. 10As nee ooilley ashoonyn y theihll fakin, dy vel oo er dty enmys er y Chiarn, as bee aggle orroo royd. 11As nee’n Chiarn uss y vishaghey ayns cooid, ayns sluight dty chorp, as ayns ingan dty vaase, as ayns mess dty hallooin, ayns y cheer vreear y Chiarn da dty ayraghyn dy choyrt dhyt. 12Nee’n Chiarn fosley dhyt e hashtaghyn mie; yn aer, dy choyrt fliaghey er dty halloo ayns e imbagh, as dy vannaghey ooilley obbraghyn dty laue: as nee oo geeasagh da ymmodee ashoonyn, as cha jean oo goaill er eeasaght. 13Nee’n Chiarn uss y toshiaght, as cha nee’n jerrey; as bee oo er yn eaghtyr, as cha nee fo: my eaishtys oo rish oardaghyn y Chiarn dty Yee, ta mee dy harey dhyt’s jiu, dy reayll as dy yannoo ad: 14As cha jyndaa oo dy lhiattee, veih veg jeh ny goan ta mee dy harey dhyt jiu, gys y laue yesh, ny gys y laue chiare, dy gholl geiyrt er jeeghyn elley dy hirveish ad.

15Agh hig eh gy-kione, mannagh n’eaisht oo rish coraa’n Chiarn dty Yee, dy reayll dy tastagh ooilley e oardaghyn, as e lattyssyn ta mish dy harey dhyt jiu; dy jig ooilley ny mollaghtyn shoh ort, as berree ad ort. 16Bee mollaght ort ’syn ard-valley, as bee mollaght ort ’sy vagher. 17Bee mollaght er dty vaskad, as dty stoyr. 18Bee mollaght er sluight dty chorp, as messyn dty hallooin, ingan dty ollagh, as dty hioltaneyn keyrragh. 19Bee mollaght ort, tra t’ou cheet stiagh, as bee mollaght ort, tra t’ou goll magh. 20Ver y Chiarn ort kerraghey trome, sproght, as toyrt-mow, ayns dy chooilley nhee t’ou goaill ayns laue; derrey vees oo er dty stroie, as derrey nee oo dy leah cherraghtyn; kyndagh rish olkys dt’obbraghyn, lioroo t’ou er m’y hreigeil. 21Ver y Chiarn er y chramp dy lhiantyn dhyt, derrey t’eh er dty choyrt mow ass y cheer, raad t’ou goll dy chummal. 22Nee’n Chiarn uss y woalley lesh doghan gyn-lheihys, as lesh y chiassaghey, as lesh att, as lesh chiass loshtee, as lesh y chliwe, as lesh blest, as lesh mergey: as lhiannee ad dhyt, derrey hed oo naardey. 23As bee’n aer, ta erskyn dty chione, myr prash, as y thalloo, ta fo dty chassyn, myr yiarn. 24Nee’n Chiarn jannoo fliaghey dty halloo poodyr as joan: veih niau hig eh neose ort, derrey vees oo er dty stroie. 25Ver y Chiarn ort dy ve er dty imman roish dty noidyn: hed oo magh un raad nyn ’oï, as chea ersooyl rhymboo shiaght raaidyn, as bee shiu skeaylt fud ooilley reeriaghtyn y thallooin. 26As bee dty challin son beaghey, da ooilley eeanlee’n aer, as da beishtyn ny hooirey, as cha jean dooinney erbee nyn agglaghey ersooyl. 27Nee’n Chiarn oo y woalley lesh askaidyn Egypt, lesh ny pileyn, as lesh y screb, as lesh y taghys, nagh vod v’er ny lheihys. 28Nee’n Chiarn oo y woalley lesh mee-cheïlid, as dellid, as lesh angaish cree. 29Nee oo loagan ec y vun-laa, myr ta’n doal ’sy dorraghys, as ny t’ou goaill ayns laue, cha jig eh lhiat: as bee uss dy kinjagh tranlaasit, as spooillit, as cha bee fer-coonee ayd. 30Nee oo ben y phoosey, as nee dooinney elley ’ghoaill ee; nee oo thie y hroggal, as cha jean oo cummal ayn: nee oo garey-feeyney y hoiaghey, as cha deiy oo yn mess echey. 31Bee dty ghow er ny varroo roish dty hooillyn, as cha n’ee oo veg jeh: bee dty assyl er ny ghoaill ersooyl er niart, kiongoyrt rish dty eddin, as cha vow arragh eh: bee ny kirree ayd er nyn goyrt da dty noidyn, as cha bee fer ayd dy chosney roue ad. 32Bee dty vec, as dt’inneenyn er nyn goyrt da pobble joarree, as faillee dty hooillyn, lesh jeeaghyn, as lesh goaill foddeeaght nyn yeï fey-ny-laa: as cha bee niart erbee ayns dty laue. 33Mess dty halloo, as ooilley dty laboragh, nee ashoon, nagh nhione dhyt, gee seose; as bee oo tranlaasit, as freilt fo-chosh dy kinjagh: 34Myr shen dy bee oo ass dty cheeayll, lesh ny shillaghyn vees roish dty hooillyn. 35Nee’n Chiarn oo y woalley ayns dty ghlioonyn, as ayns dty lurgaghyn, lesh chingyn gonnagh, nagh vod v’er nyn lheihys, veih boyn dty choshey gys mullagh dty ching. 36Nee’n Chiarn oo hene, as y ree ver oo harryd, y livrey gys ashoon, vees joarree dhyt’s, as da dty ayraghyn: as ayns shen nee shiu shirveish jeeghyn elley, fuygh as clagh. 37As hig oo dy ve son atchim, as son an-ghoo, as son oltooan, mastey ooilley ny ashoonyn, huc nee’n Chiarn oo y eebyrt. 38Ver oo lhiat mooarane rass magh gys y vagher, agh s’beg ver oo stiagh: son ver y locust eh naardey. 39Nee oo garaghyn-feeyney y hoiaghey as lhiasaghey, agh cha jean oo edyr giu jeh’n feeyn, ny’n mess y haglym: son ver ny praddagyn mow ad. 40Bee biljyn-olive ayd ayns ooilley dty ardjyn, agh cha jean oo oo-hene y ooilaghey: son nee dty villey-olive skah e vess. 41Nee oo mec as inneenyn y gheddyn, agh cha bee boggey ayd jeu, son hed ad gys cappeeys. 42Ooilley dty viljyn as dty vess hallooin ver yn locust naardey. 43Yiow’n joarree, ta cummal mayrt, seose foddey er-dty-skyn: as hig uss sheese feer injil. 44Ver eshyn er eeasaght dhyt’s, agh cha bee uss son geeasagh dasyn: eshyn vees y chione, as uss yn arbyl. 45As hig ooilley ny mollaghtyn shoh ort, as eiyree ad, as berree ad ort, derrey hed oo naardey: son nagh deaisht oo rish coraa’n Chiarn dty Yee, dy reayll ny annaghyn as ny slattyssyn ren eh dty harey. 46As bee ad ort, son cowrey, as son yindys, as er dty luight son dy bragh. 47Er-yn-oyr nagh ren oo yn Chiarn dty Yee y hirveish, lesh boggey, as lesh gennallys cree, son palchey jeh dy chooilley nhee: 48Shen-y-fa, nee oo shirveish dty noidyn, ver y Chiarn dt’oï, ayns genney arran, as ushtey, rooisht, as ayns feme jeh dy chooilley nhee: as ver eh yn whing yiarn er dty wannal, derrey t’eh er dty choyrt mow. 49Ver y Chiarn lesh ashoon dt’oï veih foddey, veih ardjyn sodjey magh y theihll, cha bieau as ta’n urley getlagh, ashoon, nagh doig oo yn ghlare oc: 50Ashoon lesh eddin ghewil, nagh der geill da persoon y chenndeeaght, ny jeeaghyn foayr da’n aegid. 51As nee eh gee ingan dty vaase, as mess dty halloo, derrey vees oo stroit: cha vaag eh dhyt arroo, feeyn, ny ooil, ny bishagh dty ollagh, ny dty hioltaneyn keyrragh, derrey t’eh er dty stroie. 52As nee eh oo y hionney stiagh lesh caggey ayns ooilley dty yiattyn, derrey t’eh er lhieggal ooilley dty voallaghyn ard as lajer, huc v’ou coyrt dty varrant, trooid ooilley dty heer; as nee eh uss y chruinnaghey stiagh ayns ooilley dty yiattyn, trooid ooilley’n cheer, ta’n Chiarn dty Yee er choyrt dhyt. 53As nee oo gee sluight dty chorp hene, feill dty vec as dty inneenyn (ta’n Chiarn dty Yee er choyrt dhyt) ayns y chaggey, as ayns y chennid, lesh nee dty noidyn dty heaghney: 54Myr shen, y dooinney ta feer seyr as jesheenagh ny-vud eu, bee drogh hooill echey gys e vraar, as da ben e oghrish, as da e chloan vees er-mayrn: 55Ayns wheesh, as dy jean eh mooaraghey, dy choyrt daue ayrn jeh feill e chloan, nee eh hene gee: er-yn-oyr nagh vel arragh echey dy ghoaill ayns y chaggey, as ayns y chennid, lesh nee dty noidyn oo y hionney stiagh ayns ooilley dty ard-valjyn. 56Yn ven seyr as mettey ny mast’ eu nagh jinnagh e cass y choyrt er y laare son moyrn as mettey-ys, bee drogh hooill eck gys sheshey e oghrish, gys e mac, as gys e inneen, 57As gys yn oikan noa-ruggit, as e cloan ver ee son y theihll: son nee ee gee ad dy follit, son feme jeh dy chooilley veaghey, ayns y chruinnid chione-caggee, lesh nee dty noidyn oo y heaghney ayns dty ard-valjyn. 58Mannagh bee oo imneagh dy chooilleeney ooilley goan y leigh shoh, ta scruit ’sy lioar shoh, dy vod aggle ’ve ort roish yn ennym gloyroil as agglagh shoh, YN CHIARN DTY YEE; 59Nee’n Chiarn jannoo dty phlagueyn yindyssagh, as plagueyn dty luight, dy jarroo plagueyn mooarey, as foddey farraghtyn, as doghanyn trome, as foddey farraghtyn. 60As ver eh lesh ort ooilley plagueyn Egypt, v’ou ayns aggle roue; as lhiannee ad dhyt. 61Myrgeddin dy chooilley hingys, as dy chooilley phlague, nagh vel scruit ayns lioar y leigh shoh, ad shoh ver y Chiarn lesh ort, derrey vees oo er dty stroie. 62As bee shiu faagit beggan ayns earroo, ga dy row shiu myr rollageyn yn aer ayns earroo: er-yn-oyr nagh r’ou biallagh da coraa yn Chiarn dty Yee. 63As hig eh gy-kione, myr ghow yn Chiarn boggey jiu, dy yannoo mie diu, as dy vishaghey shiu: myr shen bee eh aigney yn Chiarn, dy stroie shiu, as dy choyrt shiu gys veg; as bee shiu astyrit ass y cheer, raad ta shiu goll dy chummal ayn. 64As nee’n Chiarn oo y skeayley mastey dy chooilley ashoon, veih’n derrey chione jeh’n theihll gys y chione elley; as ayns shen nee oo jeeghyn elley ’hirveish, nagh vel enney er ve ayd’s, ny ec dty ayraghyn orroo, eer fuygh as clagh. 65As mastey ny ashoonyn shoh, cha vow veg yn aash, chamoo vees aash ec boyn dty choshey: agh ver y Chiarn dhyt ayns shen cree er-creau, as sooillyn moaldey, as sou-aigney. 66As bee gaue dty vioys kinjagh kiongoyrt rhyt, as bee oo fo aggle oie as laa, as cha bee shickyrys erbee ayd jeh dty vioys. 67’Sy voghrey, nee oo gra, Dy baillish Jee, dy beagh y fastyr ayn: as ’syn astyr, nee oo gra, Dy baillish Jee, dy beagh y moghrey ayn, son aggle dty chree, vees ort, as son shilley dty hooillyn, ver oo my-ner. 68As ver y Chiarn lesh oo reesht gys Egypt, lesh lhuingys, rish y raad my-e-chione loayr mee rhyt, gra, Cha vaik oo eh arragh: as shen y raad vees shiu chebbit dy ve er nyn greck rish nyn noidyn, son fir-vooinjerey, as inneenyn-veyl, as cha jean ad shiu y chionnaghey.