CAB. III

1Eisht hyndaa shin, as hie shin seose raad Vashan: as haink Og ree Vashan, as ooilley e gheiney magh nyn ’oï, dy chaggey ec Edrei. 2As dooyrt y Chiarn rhym’s, Ny gow aggle roish: son neem’s eshyn, as ooilley e gheiney, as e heer y livrey gys dty laue, as nee oo rishyn, myr ren oo rish Sihon ree ny Amoriteyn, va cummal ec Heshbon. 3Myr shoh ren y Chiarn nyn Yee rish Og ree Vashan myrgeddin, as ooilley e phobble y livrey gys nyn laue: as woaill shin eh, derrey nagh daag shin veg er-mayrn. 4As ghow shin ooilley e ard-valjyn ec y traa shen, cha row ard-valley nagh ghow shin voue, three-feed ard-valley, ooilley cheer Argob, reeriaght Og ayns Bashan. 5Va ooilley ny ard-valjyn shoh er nyn niartaghey lesh voallaghyn ard, giattyn as barryn, marish ymmodee baljyn foshlit. 6As stroie shin ad dy bollagh, myr ren shin rish Sihon ree Heshbon, dy bollagh stroie deiney, mraane, as cloan dy chooilley ard-valley. 7Agh ooilley’n maase, as cragh ny ard-valjyn, ghow shin son spooilley dooin hene. 8As ghow shin ec y traa shen, ass laue daa ree ny Amoriteyn, yn thalloo va er cheu shoh dy Yordan; veih’n awin Arnon gys cronk Hermon: 9(Yn Hermon cheddin ta ny Sidonianee genmys Sirion: as ta ny Amoriteyn genmys eh Shenir.) 10Ooilley ard-valjyn yn cheer-rea, as ooilley Gilead, as ooilley Bashan, gys Salchah as Edrei, ard-valjyn reeriaght Og ayns Bashan: 11Son cha row agh Og ree Vashan er-mayrn jeh sluight ny foawir; cur-my-ner, va e sthoc-lhiabbagh, sthoc-lhiabbagh yiarn: nagh vel eh ayns Rabbath jeh cloan Ammon? va’n lhiurid echey nuy cubityn, as e lheead kiare cubityn, lurg cubit dooinney. 12As y cheer shoh, v’ayns nyn gummal ec y traa shen, veih Aroer, ta rish awin Arnon, as lieh chronk Ghilead, lesh ny ard-valjyn echey, hug mee da ny Reubeniteyn, as ny Gaditeyn. 13As y chooid elley jeh Gilead, as ooilley Bashan, va reeriaght Og, hug mee da lieh-tribe Vanasseh; ooilley cheer Argob, lesh slane Bashan, va enmyssit cheer ny foawir. 14Ghow Jair mac Vanasseh ooilley cheer Argob, choud’s ardjyn Geshuri, as Maachathi, as denmys eh ad lurg e ennym hene, Bashan-havoth-jair, gys y laa jiu. 15As hug mee Gilead da Machir. 16As da ny Reubeniteyn, as da ny Gaditeyn, hug mee veih Gilead eer choud’s awin Arnon, lieh’n choan, as y slyst, eer choud’s yn awin Jabbok, ta cagliagh cloan Ammon: 17Yn thalloo-rea myrgeddin, as Jordan, as ny ardjyn echey, eer veih Chinnereth choud’s faarkey’n strah, eer yn Faarkey Sailley, fo Ashdoth-pisgah, my-hiar.

18As hug mee currym erriu ec y traa shen, gra, Ta’n Chiarn nyn Yee er choyrt diu yn cheer shoh, dy chummal ayn: hed shiu ooilley ny ta cooie son caggey magh armit, roish nyn mraaraghyn cloan Israel. 19Agh faagee shiu nyn mraane, as nyn gloan veggey, as nyn maase (son ta fys aym dy vel ymmodee maase eu) ayns ny ard-valjyn, ta mee er choyrt diu; 20Derrey ver y Chiarn shee da nyn mraaraghyn, chammah as diuish, as derrey yiow adsyn myrgeddin cummallyn ayns y cheer, ta’n Chiarn nyn Yee er choyrt daue cheu elley dy Yordan: as eisht nee dy chooilley ghooinney jiu chyndaa gys e eiraght, ta mee er choyrt diu. 21As doardee mee Joshua ec y traa shen, gra, Ta dty hooillyn er vakin ooilley ny ta’n Chiarn y Jee eu er n’yannoo rish y daa ree shoh: lheid cheddin nee’n Chiarn rish ooilley ny reeriaghtyn, raad t’ou goll. 22Ny gow-jee aggle roue: son nee’n Chiarn y Jee eu caggey er nyn son. 23As ghuee mee gys y Chiarn ec y traa shen, gra, 24O Hiarn Yee, t’ou er n’yannoo toshiaght dy hoilshaghey da dty harvaant dty phooar, as dty laue niartal: son quoi’n Jee, edyr ayns niau ny er y thalloo, oddys jannoo cordail rish dty obbraghyn, as cordail rish dty niart? 25Ta mee guee ort, lhig dou goll harrish, as shilley ’gheddyn jeh’n cheer mie shen ta cheu elley dy Yordan, yn slieau aalin shen, Lebanon. 26Agh va’n Chiarn jymmoosagh rhym’s kyndagh riuish, as cha n’eaishtagh eh rhym: as dooyrt y Chiarn rhym, S’lioar dhyt; ny loayr rhym arragh jeh’n chooish shoh, 27Fow seose gys mullagh Phisgah, as trog seose dty hooillyn lesh y sheear, as lesh y twoaie, as lesh y jiass, as lesh y shiar, as cronnee eh lesh dty hooillyn: son cha jed oo harrish yn Jordan shoh. 28Agh cur currym da Joshua, as cur cree ayn, as niartee eh; son nee eshyn leeideil y pobble shoh harrish, as ver eh eiraght daue ’sy cheer, yiow shilley jeh. 29Er shoh chum shin ’sy choan, ta liorish Beth-peor.