CAB. XXXI

1As hie Moses, as loayr eh ny goan shoh rish ooilley Israel. 2As dooyrt eh roo, Ta mee jiu shey-feed bleïn d’eash; cha voddym ny-sodjey goll magh, ny cheet stiagh [nyn leeideilagh]; ta’n Chiarn myrgeddin er ghra rhym, Cha jed oo harrish y Jordan shoh. 3Yn Chiarn dty Yee, eshyn hed harrish royd, as nee eh stroie ny ashoonyn shoh royd, as ver eh uss nyn ynnyd; as bee Joshua dty leeideilagh harrish, myr ta’n Chiarn er ghra. 4As nee’n Chiarn roosyn, myr ren eh rish Sihon, as rish Og, reeaghyn ny Amoriteyn, as rish y cheer ocsyn, ren eh stroie. 5As nee’n Chiarn ad y livrey seose diu, dy vod shiu jannoo roo, cordail rish ooilley ny ta mee er harey diu. 6Bee-jee dunnal as creeoil, ny gow-jee aggle roue: son y Chiarn dty Yee, eshyn ta goll mayrt, cha vaill eh, ny cha treig eh oo.

7As deïe Moses er Joshua, as dooyrt eh rish, ayns clashtyn ooilley Israel, Bee lajer as dunnal; son shegin dhyt’s goll marish y pobble shoh gys y cheer, ta’n Chiarn er vreearrey da nyn ayraghyn dy choyrt daue: as ver uss ad ayns possession. 8As y Chiarn hene ta dty leeideilagh, bee eh mayrt, cha vaill eh, ny cha treig eh oo: ny bee aggle ort, as ny lhig dty chree voïd.

9As scrieu Moses yn leigh shoh, as hug eh eh fo currym ny saggyrtyn, mec Levi, va gymmyrkey arg conaant y Chiarn, as da ooilley shanstyr Israel. 10As hug Moses currym orroo, gra, Ec kione dy chooilley hiaghtoo vleïn, ayns bleïn casherick yn eaysley, ec feailley ny cabbaneyn, 11Tra hig ooilley cloan Israel kionfenish y Chiarn dty Yee, ’syn ynnyd nee eh reih; nee oo yn leigh shoh y lhaih fenish ooilley Israel, ayns nyn glashtyn. 12Chaggil yn pobble cooidjagh, deiney, as mraane, as cloan, as y joarree t’er cheu-sthie jeh dty yiattyn, dy vod ad clashtyn, as dy vod ad gynsaghey, as aggle ghoaill roish y Chiarn nyn Yee, as ve tastagh dy yannoo ooilley goan y leigh shoh: 13As dy vod nyn gloan, ta foast mee-hushtagh, clashtyn, as gynsaghey dy ghoaill aggle roish y Chiarn nyn Yee, choud as s’bio shiu ’sy cheer, ta shiu goll harrish Jordan, dy gheddyn cummal ayn.

14As dooyrt y Chiarn rish Moses, Cur-my-ner, ta laa dty vaaish tayrn er-gerrey: cur fys er Joshua, as tar-jee m’enish ayns y chabbane-agglish, dy voddym livrey e churrym da. As hie Moses as Joshua, as hass ad ny enish ayns y chabbane-agglish. 15As hoilshee yn Chiarn e enish ’sy chabbane-agglish, ayns pillar dy vodjal: as hass y bodjal erskyn dorrys y chabbane-agglish.

16As dooyrt y Chiarn rish Moses, Cur-my-ner, nee uss cadley marish dty ayraghyn, as nee’n pobble shoh girree magh, as geiyrt er maarderys [spyrrydoil] rish jeeghyn joarree y cheer, raad t’ad goll dy vaghey, as nee ad m’y hreigeil, as brishey my chonaant, ta mee er n’yannoo roo. 17Eisht bee my chorree er ny vrasnaghey nyn ’oï ’sy laa shen, as neem’s ad y hreigeil, as my eddin y hyndaa voue, as bee ad er nyn stroie, as nee ymmodee uilk, as dourinyn tuittym orroo, ayns wheesh as dy jir ad ec y traa shen, Nagh vel ny huilk shoh er jeet orrin, er-yn-oyr nagh vel y Chiarn nyn Yee ny mast’ ain? 18As neem’s son shickyrys, m’eddin y ollaghey voue ec y traa cheddin, son ooilley nyn ghrogh-yannoo, ayns chyndaa gys jeeghyn joarree. 19Shen-y-fa nish, scrieu-jee yn arrane-moyllee shoh diu hene, as ynsee-jee eh da cloan Israel: dy vod eh ve oc dy ghoaill, as dy vod yn arrane shoh ve son feanish my lieh noi cloan Israel. 20Son erreish dou v’er choyrt lhiam ad gys y cheer, vreear mee da nyn ayraghyn, ta palchey ayns bainney as mill; as erreish daue v’er n’ee as er n’yannoo ad hene magh, as er n’aase rouanagh; eisht nee ad chyndaa gys jeeghyn elley, as shirveish ad, as brasnaghey mish, as brishey my chonaant. 21As hig eh gy-kione, tra ta ymmodee uilk as seaghyn er duittym orroo, dy jean yn arrane shoh feanish y ymmyrkey nyn ’oï: son cha bee eh er ny yarrood ass beïll y sluight oc: son shione dou cre t’oc ayns nyn smooinaghtyn dy yannoo, eer nish, roish my ta mee er chur lhiam ad gys y cheer yiall mee dy choyrt daue.

22Ren Moses, er-y-fa shen, yn arrane shoh y scrieu, yn laa cheddin, as dynsee eh eh da cloan Israel. 23As hug eh currym da Joshua mac Nun, as dooyrt eh, Prow lajer as dunnal: son ver oo lhiat cloan Israel, gys y cheer yiall mee daue: as beem’s mayrt.

24As haink eh gy-kione, erreish da Moses, v’er scrieu ooilley goan y leigh shoh ayns lioar; 25Dy dug Moses sarey da ny Leviteyn, orroo va currym arg conaant y Chiarn, gra, 26Gow-jee’n lioar shoh jeh’n leigh, as cur-jee eh ayns lhiattee arg conaant y Chiarn nyn Yee, dy vod eh ve ayns shen, son feanish dt’oï. 27Son shione dou dty vee-viallys, as dty chreoi-wannallys: cur-my-ner, eer rish my lhing hene, gys y laa t’ayn jiu, ta shiu er ve mee-viallagh da’n Chiarn; as cre-woad smoo eisht lurg my vaase? 28Chaggil-jee hym’s ooilley shanstyr ny tribeyn, as ny fir-oik eu, dy voddym loayrt ny goan shoh ayns y chlashtyn oc, as geamagh er niau as thalloo son feanish nyn ’oï. 29Son ta fys aym, lurg my vaase, dy der shiu seose shiu hene dy slane dy chur rish olk, as dy jyndaa shiu dy lhiattee veih’n raad, ta mish er harey diu: as dy berree treihys erriu ayns ny laghyn jerrinagh, er-yn-oyr dy n’eiyr shiu er olk ayns shilley’n Chiarn, dy vrasnaghey eh gys corree, lesh obbyr nyn laueyn. 30As loayr Moses ayns slane chaglym cloan Israel goan yn arrane shoh, veih toshiaght gy jerrey.