CAB. XXXII

1Eaisht-jee, O shiuish niaughyn, as neem’s loayrt; as clasht, O halloo, rish goan my veeal. 2Nee my ynsaghey shilley myr y fliaghey: nee my ghlare tuittym myr y druight as myr y fliaghey meein er lossreeyn oor; as myr ny frassyn er y faiyr: 3Choud’s ta mee fockley magh ennym y Chiarn: Cur-jee ooashley ard da’n Jee ain. 4Eshyn y Chreg, ta e obbraghyn jeant ayns creenaght erskyn earroo: son ta ooilley e raaidyn briwnys: Jee dy ynrickys, as fegooish mee-chairys; kiart as jeeragh t’eh. 5T’ad er n’yannoo ad hene neu-ghlen, ta’n vroïd oc neu-ghooghyssagh da’n chloan echeysyn: sheeloghe roonagh as camlaagagh ad. 6Nee shoh myr ta shiu dy chooilleeney’n Chiarn, O phobble ommijagh, as mee-cheeayllagh? nagh nee eshyn dty ayr ren dty chionnaghey? nagh nee eshyn ren dty chroo, as dty niartaghey?

7Cooinee er ny shenn earishyn, smooinee er bleeantyn ymmodee sheelogheyn: fênee jeh dty ayr, as inshee eh dhyt; jeh dty henn-ayryn, as soilshee ad dhyt. 8Tra ren yn er smoo syrjey rheynn er ny ashoonyn nyn eiraght, tra skeayl eh mec Adam, hoie eh cagleeyn y pobble, cordail rish earroo cloan Israel. 9Son lesh y Chiarn e phobble; ta Jacob cronney e eiraght. 10Hooar eh eh ayns thalloo gennish, as ayns yn aasagh fadane atchimagh: ren eh leeideil eh mygeayrt, dynsee eh da yn raad, choad eh eh, myr clagh e hooilley. 11Myr ta’n urley gynsaghey yn aalagh eck dy etlagh, clussaghey harrishdoo, skeayley e skianyn er-nyn-skyn, goaill ad, as gymmyrkey ad er e skianyn; 12Myr shen va’n Chiarn ny-lomarcan e leeideilagh; as mârish cha row jee erbee joarree. 13Hug eh da dy varkiagh ayns ardjyn s’ooasle y thallooin, dy voddagh eh gee mess ny magheryn, as hug eh da dy hoo mill ass y chreg, as ooil ass y chreg flint. 14Eeym ny baa, as bainney keyrragh, lesh meeaylys eayin, as reaghyn jeh dooghys Vashan, as goair, lesh flooyr y churnaght s’glenney, as ren oo giu fuill glen y smeyr-feeyney.

15Agh daase Jeshurun roauyr, as ren eh brebbal: t’ou uss er n’aase roauyr, as t’ou er n’ghoaill thummyd, t’ou coodit lesh saill; eisht hreig eh Jee ren eh y chroo, as hoie eh beg jeh creg e haualtys. 16Ren ad eh y vrasnaghey gys corree, lesh jeeghyn joarree, lesh nyn obbraghyn eajee vrasnee ad eh. 17Heb ad ourallyn gys jouyil, cha nee gys Jee; gys jeeghyn nagh bione daue, gys jeeghyn noa soit seose, daue nagh dug nyn ayraghyn ooashley. 18Er y Chiarn ren dty gheddyn, cha vel oo er chooinaghtyn, as y Jee ren dty chroo t’ou er yarrood. 19As tra honnick y Chiarn shoh, hug eh dwoaie daue, kyndagh rish peccaghyn brasnee e vec, as e inneenyn. 20As dooyrt eh, M’eddin neem’s y hyndaa voue, as hee-ym cre’n erree hig orroo: son sheeloghe feer frowartagh ad, cloan nagh vel veg y treisht orroo. 21T’ad er my ghreinnaghey gys corree, lesh shen nagh nee jee eh, t’ad er m’ vrasnaghey gys jymmoose, lesh nyn jallooyn: as neem’s adsyn y ghreinnaghey gys eadaghey lioroosyn nagh nee pobble ad, nee’m ad y vrasnaghey gys corree lesh ashoon fardalagh. 22Son ta aile er vrishey magh ayns my yymmoose, nee lostey gys y diunid sodjey sheese, as ver eh mow yn thalloo, lesh e bishagh, as ver eh aile fo undinyn ny sleityn. 23Neem’s kerraghey er kerraghey y lhieeney orroo, nee’m my hideyn y vaarail orroo. 24Bee ad losht lesh gortey, as er nyn stroie lesh smarageyn loshtee, as lesh toyrt-mow atchimagh: lhig-ym feayshlit orroo myrgeddin feeacklyn beishtyn feïe, lesh pyshoon ard-nieughyn ny hooirey. 25Nee’n cliwe cheu-mooie, as atchim cheu-sthie stroie chammah’n dooinney aeg as y moidyn, yn oikan myrgeddin, as y kione lheeah. 26Dooyrt mee, Dy jinnin ad y skeayley dys corneilyn, dy jinnin yn imraa jeu dy ve caillit mastey deiney: 27Agh lhig mee lhieu er coontey’n noid, nagh jinnagh nyn noidyn gymmyrkey ad hene dy mooaralagh, as gra, Niart nyn laue hene, as cha nee’n Chiarn, t’er n’yannoo ooilley shoh. 28Son ashoon ad nagh gow coyrle, chamoo ta veg y tushtey ayndoo. 29O dy beagh ad creeney, dy doiggagh ad shoh, dy goghe ad gys nyn gree nyn laghyn jerrinagh! 30Nagh jinnagh eisht un dooinney gimman ersooyl thousane, as daa ghooinney jeih thousaneyn, agh dy row nyn Greg er chreck ad, as y Chiarn er n’yeigh ad seose? 31Son cha vel y chreg ocsyn myr y Chreg ainyn, eer ayns briwnys nyn noidyn hene. 32Son ta’n billey-feeyney ocsyn ny smessey na billey-feeyney Sodom, as magheryn Ghomorrah: ta ny smeyr-feeyney oc gall, ta ny dossanyn oc sharroo. 33Ta’n feeyn oc pyshoon dragonyn, as gah baasoil ard-nieughyn. 34Nagh vel shoh tashtit seose aym ayns stoyr, as sealit seose mastey my hashtaghyn? 35Dooys ta bentyn kerraghey, as cooilleeney, nee’n chass oc skyrrey ayns traa cooie: son ta laa nyn dreihys er-gerrey, as ta ny reddyn hig orroo cheet dy tappee. 36Son nee’n Chiarn briwnys e phobble, as bee chymmey echey er e harvaantyn; tra hee eh dy vel y phooar oc er n’immeeaght, as nagh vel veg y chooney faagit nyn gour. 37As nee eh gra, Cre vel ny jeeghyn oc, yn chreg er hug ad nyn marrant, 38Ren gee meeaylys nyn ourallyn, as giu feeyn ny chebballyn-jough oc? lhig daue troggal orroo, as cooney lhieu, as ve nyn gemmyrk. 39Jeeagh-jee nish, dy nee mish, eer mish ny-lomarcan eh, as cha vel ayn jee erbee mârym: mish ta coyrt baase, as bioys; mish ta coyrt chingys, as slaynt: chamoo ta fer erbee oddys livrey ass my laue. 40Son ta mee troggal seose my laue gys niau, as gra, Ta mee bio son dy bragh. 41My ver-ym foyr er my chliwe sollys, as my nee my laue goaill greme er briwnys; goym kerraghey er my noidyn, as cooilleeney orroosyn ta dwoaie oc orrym. 42Nee’m my hideyn er-meshtey lesh fuill, (as nee my chliwe feill my noidyn y stroie) as shen, lesh fuill ny merriu, as ny cappeeyn, veih toshiaght gys jerrey kerraghey er y noid. 43Gow-jee boggey, marish e phobble, O shiuish ashoonyn: son nee eh cooilleeney ’ghoaill son fuill e harvaantyn, as kerraghey er e noidyn, as bee eh myghinagh da e heer, as da e phobble. 44As haink Moses, as loayr eh ooilley goan yn arrane shoh, ayns slane clashtyn yn pobble, eshyn as Joshua mac Nun.

45As ren Moses jerrey er loayrt ooilley ny goan shoh rish ooilley Israel. 46As dooyrt eh roo, Soie-jee nyn greeaghyn er ooilley ny goan shoh, ta mee coyrt reue er y laa shoh; ver shiu currym er nyn gloan dy choyrt tastey daue, as dy chooilleeney ooilley goan y leigh shoh. 47Son cha nee red fardalagh eh diu: er-yn-oyr dy vel nyn mioys lhie er; son liorish shoh bee ny laghyn eu beayn ’sy cheer, huggey t’ou goll harrish Jordan, dy gheddyn eiraght ayn. 48As loayr y Chiarn rish Moses er y laa cheddin, gra, 49Fow seose er y slieau Abarim, gys cronk Nebo, t’ayns cheer Voab, ta jeeragh er Jericho; as gow shilley jeh cheer Chanaan, ta mee dy choyrt da cloan Israel son eiraght. 50As yiow baase er y chronk, huggey t’ou goll seose, as bee oo er dty haglym gys dty gheiney; myr hooar Aaron dty vraar baase er cronk Hor, as v’eh oanluckit myr e gheiney: 51Son dy ren shiu peccah m’oï, mastey cloan Israel, ec ushtaghyn Meribah-kadesh, ayns faasagh Zin; son nagh ren shiu m’y chasherickey, fenish cloan Israel. 52Ny-yeih hee oo yn cheer royd, agh cha jed oo stiagh ’sy cheer, ta mish dy choyrt da cloan Israel.