CAB. XXXIII

1As shoh’n bannaght, lesh ren Moses dooinney Yee, cloan Israel y vannaghey, roish e vaase. 2As dooyrt eh, Haink y Chiarn [mârin] veih Sinai, as veih Seir v’eh nyn leeideilagh: ren eh soilshean magh veih cronk Paran, as haink eh lesh jeih thousaneyn jeh e nooghyn: veih e laue yesh hie magh e leigh, ayns aile as taarnagh. 3V’eh graihagh er e phobble; ta ooilley e nooghyn ayns dty laue: as hoie ad sheese ec dty chassyn; nee ad ooilley goaill-rish dty ghoan. 4Ren Moses leigh y harey dooin; eer eiraght pobble Yacob. 5As v’eh myr ree ayns Jeshurun, tra va leeideilee yn pobble, as tribeyn Israel er nyn jaglym cooidjagh.

6Lhig da Reuben ve bio, as gyn baase y gheddyn; ga dy vel e gheiney beggan ayns earroo.

7As shoh bannaght Yudah: as dooyrt eh, Clasht, Hiarn, rish coraa Yudah, as cur lhiat eh gys e phobble hene; lhig da e laueyn eh y niartaghey, as bee uss e er-coonee, noi e noidyn.

8As mychione Levi dooyrt eh, Lhig da’n Thummim as yn Urim ayd’s [soilshey as slane tushtey] ve er dty er-casherick, ren uss y phrowal ec Massah; rishyn ren oo streeu ec ushtaghyn Meribah; 9Eh dooyrt mychione e ayr, as e voir, Cha ren my hooill cassey ayns briwnys, chamoo ren eh soiagh jeh e vraaraghyn, ny geill y choyrt da e chloan hene: son hug eh tastey da dty ghoo, as dreill eh dty chonaant. 10Ad shoh nee dty vriwnyssyn y ynsaghey da Jacob, as dty leigh da Israel: chebbee ad incense kiongoyrt rhyt, as slane oural-losht er dty altar. 11Bannee, Hiarn, e chooid, jean soiaghey jeh obbyr e laueyn: bwoaill trooid ny meeghyn ocsyn ta girree n’oï, as ta dwoaie oc er, nagh n’irree ad arragh.

12As mychione Benjamin dooyrt eh, Nee eshyn shynney lesh y Chiarn cummal dy sauchey liorish; as nee’n Chiarn eshyn y choodaghey fey-ny-laa, as fendeil eh eddyr e gheayltyn. 13As mychione Joseph dooyrt eh, Bannit jeh’n Chiarn dy row’n cheer echeysyn, son ard vannaghtyn niau, son y druight, as son ny diunidyn heese, 14As son messyn berchagh bree ny greiney, as bannaghtyn yn eayst, 15As son reddyn mie ny shenn sleityn, as son messyn dooie ny croink ard, 16As son giootyn berchagh y thallooin, as e phalchey, as son yn aigney-mie echeysyn hoilshee eh hene ayns y thammag ailagh: lhig da’n bannaght cheet er kione Yoseph, as er mullagh y chione echeysyn, v’er ny scarrey veih e vraaraghyn. 17Ta’n aalid echey myr y reih dow aeg, as ta e eairkyn myr eairkyn ny unicornyn: as lhieusyn nee eh’n pobble y phuttey dy cheilley, gys ny ardjyn sodjey magh; ad shoh ny jeih thousaneyn dy Ephraim, as ad shoh thousaneyn Vanasseh.

18As mychione Zebulun dooyrt eh, Gow boggey, Zebulun, ayns dty gholl magh; as Issachar, ayns dty chabbaneyn. 19Nee ad cuirrey yn pobble gys y clieau, ayns shen nee ad chebbal ny ourallyn dy chairys: son nee ad jiole jeh palchey ny marrey, as jeh tashtaghyn follit y traie. 20As mychione Gad dooyrt eh, Bannit t’eshyn, t’er vishaghey eiraght Ghad: t’eh cummal myr lion, as raipey’n clingan, as mullagh y chione. 21As ghow eh yn chied ayrn myr reih da hene, son shen y raad va e eiraght er ny hickyraghey da [liorish Moses] as haink eh marish leeideilee yn pobble, chooilleen eh cairys y Chiarn, as e vriwnyssyn rish Israel.

22As mychione Dan dooyrt eh, Ta Dan dunnal myr quallian y lion: nee eh lheim veih Bashan.

23As mychione Naphtali dooyrt eh, O Naphtali, jeant magh lesh foayr, as er dty lhieeney lesh bannaght y Chiarn; gow uss possession jeh’n sheear as y jiass.

24As mychione Asher dooyrt eh, Lhig da Asher ve bannit lesh cloan; lhig da ve ayns foayr rish e vraaraghyn, as lhig da e chass y hummey ayns ooil. 25Bee yiarn as prash fo dty chassyn; as myr vees dty laghyn, myr shen bee dty niart.

26Cha vel unnane goll-rish Jee Yeshurun, ta markiagh er niau son dty chooney, as ayns e ard-ooashley er yn aer. 27Ta’n Jee t’er ve er-dy-rieau dty chemmyrk, as ta e roihaghyn dy bragh farraghtyn dy dty ymmyrkey: as eiyree eh magh yn noid kiongoyrt rhyt, as gra, Stroie ad. 28Nee Israel eisht cummal dy sauchey er hene: bee farrane Yacob ayns cheer dy arroo as feeyn, nee e niaughyn myrgeddin shilley neose druight. 29S’maynrey t’ou, O Israel! quoi ta goll rhyt’s, O phobble ta fo coadey’n Chiarn, eilley-caggee dty chooney, as cliwe dty ard-ooashley! as bee dty noidyn er nyn goyrt foyd, as nee oo stampey er ny ynnydyn ardey oc.