CAB. IV

1Eaisht nish, O Israel, rish ny slattyssyn, as ny briwnyssyn, ta mee gynsaghey diu, dy chooilleeney ad, dy vod shiu ve beayn, as goll stiagh, as cummal ayns y cheer, ta’n Chiarn Jee nyn ayraghyn dy choyrt diu. 2Cha jean shiu nhee erbee y choyrt huggey, ny goaill voish y goo ta mee dy harey diu, dy vod shiu freayll annaghyn y Chiarn nyn Yee, ta mish dy harey diu. 3Ta ny sooillyn eu hene er vakin ny ren y Chiarn ayns cooish Baal-peor: son ooilley ny deiney deiyr er Baal-peor, ta’n Chiarn dty Yee er stroie ad veih ny mast’ eu. 4Agh shiuish ren lhiantyn gys y Chiarn nyn Yee, ta shiu ooilley er-mayrn gys y laa t’ayn jiu. 5Cur-my-ner, ta mee er choyrt reue slattyssyn as briwnyssyn, eer myr ta’n Chiarn my Yee er m’y harey, dy jinnagh shiu nyn lurg ayns y cheer, raad ta shiu goll dy ghoaill possession jeh. 6Freill-jee er-y-fa shen, as jean-jee ad y chooilleeney, son shoh vees y chreenaght, as y tushtey eu ayns shilley ny ashoonyn, nee clashtyn ooilley ny slattyssyn shoh, as gra, Dy feer, ta’n ashoon mooar shoh pobble creeney as tushtagh. 7Son cre’n ashoon ta cha ooasle, ta jee oc cha faggys daue, as ta’n Chiarn y Jee ain dooinyn, ayns dy chooilley nhee, ta shin jannoo aghin er y hon? 8As cre’n ashoon ta ayns lheid yn ard foayr, dy vel oc slattyssyn as briwnyssyn cha cairal, as ooilley’n leigh shoh, ta mish dy hoiaghey kiongoyrt riu yn laa t’ayn jiu? 9Ynrycan, jeeagh royd, as freill dty annym dy imneagh, nagh jarrood oo ny reddyn ta dty hooillyn er vakin; as nagh jed ad ass dty chree, ooilley laghyn dty vea: agh ynsee ad da dty vec, as da cloan dty chlienney: 10Agh erskyn ooilley, yn laa ayn hass oo kiongoyrt rish y Chiarn dty Yee ayns Horeb, tra dooyrt y Chiarn rhym’s, Chaggil yn pobble dy cheilley hym’s, as ver-yms orroo clashtyn my ghoan, dy vod ad gynsaghey dy ghoaill aggle roym’s, ooilley ny laghyn vees ad bio er y thalloo, as dy vod ad gynsaghey nyn gloan. 11As haink shiu er-gerrey, as hass shiu ec cosh y clieau, as va’n slieau lostey lesh aile gys mean yn aer, lesh dorraghys, bodjallyn, as dorraghys dowin. 12As loayr y Chiarn riuish veih mean yn aile: cheayll shiu coraa ny goan, agh cha vaik shiu caslys erbee, cha geayll shiu agh coraa. 13As hoilshee eh diu e chonaant, doardee eh diu dy chooilleeney, dy jarroo, ny jeih annaghyn, as scrieu eh ad er daa voayrd chloaie.

14As hug y Chiarn currym orrym ec y traa shen, dy ynsaghey diu slattyssyn as briwnyssyn, dy voddagh shiu ad y reayll ayns y cheer, raad ta shiu goll harrish dy gheddyn eiraght ayn. 15Jeeagh-jee, er-y-fa shen, dy imneagh diu hene, [son cha vaik shiu monney erbee dy chaslys, er y laa shen loayr y Chiarn riu ayns Horeb, ass mean yn aile] 16Er-aggle dy jed shiu er-shaghryn, as jalloo grainnit ’yannoo diu hene, co-chaslys erbee jeh dooinney ny ben, 17Co-chaslys baagh erbee t’er y thalloo, co-chaslys eean erbee skianagh ta getlagh ’syn aer, 18Co-chaslys jeh nhee erbee ta snaue er y thalloo, co-chaslys eeast erbee t’ayns ny ushtaghyn fo’n thalloo: 19As er-aggle dy drog oo dty hooillyn lesh yn aer, as tra hee oo yn ghrian, yn eayst, as ny rollageyn, dy jarroo slane sheshaght yn aer, dy bee oo cleaynit dy choyrt ooashley daue, as dy hirveish ad shen, ta’n Chiarn dty Yee er rheynn er dy chooilley ashoon fo niau. 20Agh ta’n Chiarn er ghoaill shiu, as er choyrt lesh shiu magh ass y choirrey yiarn, dy jarroo ass Egypt, dy ve son pobble dy eiraght da hene, myr ta shiu yn laa jiu. 21Marish shoh, va’n Chiarn corree rhym’s kyndagh riuish, as vreear eh, nagh raghin harrish Jordan, as nagh row mee dy roshtyn gys y cheer mie shen, ta’n Chiarn dy choyrt dhyt’s son eiraght. 22Agh shegin dooys baase ’gheddyn ’sy cheer shoh, cha negin dou goll harrish Jordan, agh hed shiuish harrish, as possession y ghoaill jeh’n cheer mie shen. 23Bee-jee er nyn dwoaie, er-aggle dy jarrood shiu conaant y Chiarn nyn Yee, ren eh riu, as nagh jean shiu diu hene jalloo grainnit, ny co-chaslys nhee erbee ta’n Chiarn dty Yee er lhiettal dhyt. 24Son ta’n Chiarn dty Yee myr aile stroie ooilley roish, dy jarroo ny Yee eadolagh.

25Tra nee oo geddyn cloan, as cloan dty chlienney, as tra vees oo er chummal foddey ’sy cheer, as er n’gholl dowin ayns peccah, as er n’yannoo jalloo grainnit, ny co-chaslys nhee erbee, as dy jean shiu dy olk ayns shilley’n Chiarn dty Yee, dy vrasnaghey eh gys corree: 26Ta mee geamagh er niau as thalloo son feanish nyn ’oï yn laa jiu, dy jed shiu dy leah, as dy bollagh naardey veih’n cheer, raad ta shiu goll harrish Jordan, dy ghoaill possession jeh: cha bee nyn laghyn foddey beayn ayn, agh bee shiu dy bollagh er nyn stroie. 27As nee’n Chiarn shiu y skeayley dy lhean mastey ny ashoonyn, as cha nhimmey jiu vees faagit, mastey ny ashoonyn, raad nee’n Chiarn geiyrt shiu. 28Shen y raad nee shiu shirveish jeeghyn, obbyr laueyn gheiney, fuygh as clagh, nagh vel fakin, ny clashtyn, ny gee, ny soaral. 29Agh veih shen my nee oo shirrey gys y Chiarn dty Yee, nee oo feddyn eh, my hirrys oo er e hon lesh ooilley dty chree, as lesh ooilley dt’annym. 30As tra t’ou ayns seaghyn, as tra hig ooilley ny reddyn shoh ort, ayns ny laghyn jerrinagh, my nee oo chyndaa gys y Chiarn dty Yee, as ve biallagh da e choraa: 31(Son ta’n Chiarn dty Yee ny Yee myghinagh) cha jean eh dty hreigeil, chamoo nee eh dty stroie, ny jarrood conaant dty ayraghyn, vreear eh daue. 32Son jean briaght nish mychione ny laghyn t’er n’gholl shaghey, va roish dty hraa, er-dyn laa chroo Jee dooinney er y thalloo, as veih’n derrey chione jeh’n seihll, gys y chione elley, row rieau lheid y red mooar yindyssagh shoh, ny row clashtyn jeh e lheid? 33Ren rieau ashoon clashtyn coraa Yee, loayrt ass mean yn aile, myr t’ou uss er chlashtyn, as ad ve bio? 34Ny vel Jee erbee elley er ghoaill er, dy reih da hene ashoon ass mean ashoon elley, liorish prowallyn, liorish cowraghyn, as mirrilyn, as liorish caggey, as lesh laue niartal, as lesh roih sheeynt magh, as lesh atchimyn mooarey, cordail rish ooilley ny ren y Chiarn nyn Yee er nyn son ayns Egypt, kiongoyrt rish nyn sooillyn? 35Dhyt’s ve er ny hoilshaghey, dy voddagh tushtey ’ve ayd, dy nee’n Chiarn ta Jee; cheu-mooie jeh hene cha vel Jee erbee. 36Veih niau hug eh ort clashtyn e choraa, dy voddagh eh dty ynsaghey: as er y thalloo hoilshee eh dhyt e aile vooar, as cheayll oo e ghoan ass mean yn aile. 37As son dy bynney lesh dty ayraghyn, er-y-fa shen ren eh reih nyn sluight nyn yeï, as hug eh lesh oo fo e reill hene, lesh pooar niartal, magh ass Egypt: 38Dy imman magh royd ashoonyn, smoo as ny s’niartal na oo hene, dy choyrt lesh uss stiagh, dy choyrt dhyt’s y cheer oc son eiraght, myr te yn laa jiu. 39Toig, er-y-fa shen yn laa shoh, as gow gys dty chree, dy vel yn Chiarn ny Yee ayns niau heose, as er y thalloo wass: cha vel Jee erbee elley. 40Nee oo er-y-fa shen freayll e lattyssyn as e annaghyn ta mish dy harey dhyt’s jiu, dy vod oo hene ve maynrey, as dty chloan dty lurg, as dy vod dty laghyn ve foddey beayn ’sy cheer, ta’n Chiarn dty Yee coyrt dhyt.

41Eisht hug Moses three ard-valjyn er-lheh, cheu shoh dy Yordan, lesh irree ny greïney: 42Dy voddagh yn marrooder chea gys shen, yinnagh taghyrt dy varroo e naboo doaltattym, as nagh row roïe ayns noidys rish; as, liorish chea gys unnane jeh ny ard-valjyn shen, dy voddagh e vioys ve echey: 43Ta shen, Bezer ayns yn aasagh, ayns cheer-rea ny Reubeniteyn: as Ramoth ayns Gilead, jeh ny Gaditeyn: as Golan ayns Bashan, jeh ny Manassiteyn.

44As shoh’n leigh, hug Moses roish cloan Israel: 45Shoh ny recortyssyn, as ny slattyssyn, as ny briwnyssyn, loayr Moses rish cloan Israel, lurg daue v’er jeet magh ass Egypt: 46Er y cheu shoh dy Yordan, ’sy choan liorish Beth-peor, ayns cheer Sihon ree ny Amoriteyn, va cummal ec Heshbon, ren Moses as cloan Israel y stroie, lurg daue v’er jeet magh ass Egypt: 47As ghow ad possession jeh’n cheer echey, as cheer Og ree Vashan, daa ree ny Amoriteyn, v’er cheu shoh dy Yordan, lesh irree ny greïney: 48Veih Aroer, ta rish broogh awin Arnon, eer choud’s cronk Sirion, ta shen Hermon. 49As ooilley’n cheer-rea cheu shoh dy Yordan my-hiar, roshtyn gys faarkey’n strah, fo farraneyn Phisgah.