CAB. V

1As deïe Moses er ooilley Israel, as dooyrt eh roo, Eaisht, O Israel, rish ny slattyssyn as ny briwnyssyn, ta mee fockley magh diu yn laa jiu, dy vod shiu gynsaghey ad, as freayll, as cooilleeney ad. 2Ren y Chiarn nyn Yee conaant rooinyn ayns Horeb. 3Cha ren y Chiarn yn conaant shoh ynrycan rish nyn ayraghyn, agh rooinyn, dy jarroo rooin hene, ta ooilley bio ’sy laa t’ayn jiu. 4Ren y Chiarn taggloo riu eddin ry eddin er y clieau, veih mean yn aile, 5(Hass mish eddyr y Chiarn as shiuish ec y traa shen, dy hoilshaghey diu goan y Chiarn: son va aggle erriu kyndagh rish yn aile, as cha jagh shiu seose er y clieau) gra,

6Mish y Chiarn dty Yee, hug lhiam magh oo ass cheer Egypt, veih thie ny bondiaght. 7Cha bee Jee erbee elley ayd ayns m’enish. 8Cha jean oo dhyt hene jalloo grainnit erbee, ny co-chaslys jeh nhee erbee t’ayns niau heose, ny t’er y thalloo wass, ny t’ayns ny ushtaghyn fo’n thalloo. 9Cha groym oo sheese oo hene huc, ny ooashley ’choyrt daue, son ta mish, yn Chiarn dty Yee, my Yee eadolagh, ta kerraghey peccaghyn ny ayraghyn er y chloan, gys y trass as y chiarroo heeloghe jeusyn ta dwoaie oc orrym, 10As soilshaghey myghin er thousaneyn, jeusyn ta graihagh orrym, as freaylley m’annaghyn. 11Cha gow ennym yn Chiarn dty Yee ayns fardail: son cha gum y Chiarn eshyn gyn loght, ta goaill e ennym ayns fardail. 12Freill yn doonaght, dy chasherickey eh, myr ta’n Chiarn dty Yee er dty harey. 13Shey laa nee oo laboragh, as jannoo ooilley dty obbyr: 14Agh y chiaghtoo laa doonaght y Chiarn dty Yee: er cha jean obbyr erbee, oo hene, ny dty vac, ny dty inneen, ny dty er-mooinjerey, ny dty inney-veyl, ny dty ghow, ny dt’assyl, ny veg jeh dt’ollagh, ny dty yoarree t’er cheu-sthie jeh dty yiattyn; dy vod dt’er-mooinjerey as dt’inney-veyl nyn aash y ghoaill, chammah rhyt hene. 15As cooinee, dy row hene dty harvaant ayns cheer Egypt, as dy dug y Chiarn dty Yee lesh oo magh veih shen, lesh laue niartal, as lesh roih sheeynt magh: shen-y-fa hug y Chiarn dty Yee sarey dhyt dy reayll y doonaght.

16Cur arrym da dt’ayr, as da dty voir, myr ren y Chiarn dty harey; dy vod dty laghyn ve foddey beayn, as dy vod oo ve maynrey ayns y cheer ta’n Chiarn dty Yee dy chur dhyt. 17Cha jean oo dunverys. 18Chamoo nee oo poosey ’vrishey. 19Chamoo nee oo geid. 20Chamoo nee oo feanish foalsey y ymmyrkey noi dty naboo. 21Chamoo nee oo geearree ben dty naboo, chamoo ver oo saynt da thie dty naboo, ny da e vagher, ny da e er-mooinjerey, ny da e inney-veyl, e ghow, ny e assyl, ny da nhee erbee ta lesh dty naboo.

22Shoh ny goan loayr y Chiarn rish y slane cheshaght eu, er y clieau, ass mean yn aile, y vodjal, as y dorraghys dowin, lesh coraa ard, as cha dug eh veg arragh huc, as scrieu eh ad er daa voayrd chloaie, as livrey eh ad dooys. 23As haink eh gy-kione, tra cheayll shiuish y coraa ass mean y dorraghys, (son va’n slieau lostey lesh aile) dy daink shiu hym’s dy jarroo ooilley ard-gheiney ny tribeyn, as y chanstyr eu. 24As dooyrt shiu, Cur-my-ner, ta’n Chiarn y Jee ain er hoilshaghey dooin e ghloyr, as e phooar, as ta shin er chlashtyn e choraa veih mean yn aile: ta shin er vakin jiu, dy vel y Chiarn loayrt rish dooinney, as y dooinney foast bio. 25Shen-y-fa nish, ny lhig dooin baase y gheddyn; son nee’n aile mooar shoh shin y stroie. My nee mayd clashtyn coraa’n Chiarn y Jee ain arragh, eisht yiow mayd baase. 26Son quoi’n dooinney ’sy theihll t’er chlashtyn coraa’n Jee bio, loayrt ass mean yn aile, (myr ta shinyn) as eh ve bio? 27Immee uss er-gerrey, as eaisht rish ooilley ny jir y Chiarn y Jee ain; as insh uss dooinyn ooilley ny nee’n Chiarn y Jee ain gra rhyt, as nee mayd clashtyn, as cooilleeney eh. 28As cheayll y Chiarn coraa nyn ghoan, tra loayr shiu rhym’s; as dooyrt y Chiarn rhym, Ta mee er chlashtyn coraa goan y pobble shoh, t’ad er loayrt rhyt’s: t’ad er ghra dy mie ayns ooilley ny t’ad er loayrt. 29O dy beagh lheid y cree ayndoo, dy goghe ad aggle roym, as dy vreillagh ad ooilley my annaghyn dy kinjagh, dy voddagh ad hene as nyn gloan ve maynrey son dy bragh! 30Immee, as abbyr roo, Immee-jee reue reesht gys nyn gabbaneyn. 31Agh er dty hon hene, shass uss ayns shoh liorym’s, as ver-ym royd ooilley ny annaghyn, as ny slattyssyn, as ny briwnyssyn nee uss gynsaghey daue, dy vod ad cooilleeney ad, ayns y cheer ta mish dy choyrt daue son eiraght. 32Nee shiuish, er-y-fa shen, kiarail y ghoaill, dy yannoo myr ta’n Chiarn er harey diu: cha jyndaa shiu dy lhiattee gys y laue yesh, ny gys y laue chiare. 33Nee shiu gimmeeaght ayns ooilley ny raaidyn, ta’n Chiarn y Jee eu er harey diu, dy vod shiu ve bio, as maynrey, as dy vod nyn laghyn ve beayn, ayns y cheer ta kiarit diu son eiraght.