CAB. VI

1Nish shoh ny annaghyn, ny slattyssyn, as ny briwnyssyn, doardee yn Chiarn nyn Yee dy ynsaghey diu, dy reayll ad ’sy cheer ta shiu goll dy chummal ayn: 2Dy voddagh oo goaill aggle roish y Chiarn dty Yee, dy reayll ooilley e lattyssyn, as e oardaghyn ta mee dy harey dhyt; oo hene, as dty vac, as cloan dty chlienney, ooilley laghyn dty vea, as dy vod dty laghyn ve beayn.

3Eaisht er-y-fa shen, O Israel, as gow tastey dy yannoo eh, dy vod oo ve maynrey, as dy vod shiu bishaghey dy mooar, myr ta’n Chiarn Jee dty ayraghyn er yialdyn dhyt, ’sy cheer ta palchey ayns bainney as mill. 4Eaisht, O Israel, Ta’n Chiarn nyn Yee un Chiarn. 5As ver oo graih da’n Chiarn dty Yee, lesh ooilley dty chree, as lesh ooilley dty annym, as lesh ooilley dty niart. 6As bee ny goan shoh ta mee dy harey dhyt jiu, ayns dty chree; 7As ynsee oo ad dy kiaralagh da dty chloan, as nee oo taggloo jeu, tra t’ou soie ayns dty hie, as tra t’ou shooyl er y raad, as tra t’ou goll dy lhie, as tra t’ou girree. 8As nee oo kiangley ad son cowrey er dty laue, as bee ad myr imraa eddyr dty hooillyn. 9As nee oo scrieu ad er essynyn dty ghorrys, as er dty yiattyn. 10As erreish da’n Chiarn dty Yee v’er choyrt lesh oo stiagh, gys y cheer vreear eh da dty ayraghyn, da Abraham, Isaac, as Jacob, dy chur dhyt ard-valjyn mooar as aalin, nagh ren uss troggal, 11As thieyn lane jeh dy chooilley stoo mie nagh ren uss ’choamrey, as chibbraghyn cleiyht nagh ren uss y chleiy, garaghyn-feeyney as biljyn-olive nagh ren uss y hoiaghey, erreish dhyt ve er n’ee, as ve jeant magh; 12Bee eisht er dty hwoaie nagh jarrood oo yn Chiarn, hug lesh magh oo ass cheer Egypt, veih thie ny bondiaght. 13Nee oo aggle y ghoaill roish y Chiarn dty Yee, as shirveish eh, as nee oo loo liorish e ennym. 14As cha n’eiyr shiu da jeeghyn joarree, lheid as jeeghyn y pobble ta mygeayrt-y-miu: 15(Son ta’n Chiarn dty Yee, ny Yee eadolagh ny mast’ eu) er-aggle dy bee corree yn Chiarn er ny vrasnaghey dt’oï, as dy jean eh dty stroie veih eaghtyr y thallooin.

16Cha jean shiu yn Chiarn nyn Yee y vrasnaghey myr ren shiu ayns Massah. 17Nee shiu dy imneagh freayll annaghyn y Chiarn nyn Yee, as e oardaghyn, as e lattyssyn t’eh er harey dhyt. 18As nee oo shen ta cairagh as mie ayns shilley yn Chiarn; dy vod oo ve maynrey, as dy vod oo goll stiagh, as soylley y ghoaill jeh’n cheer mie shen, vreear y Chiarn da dty ayraghyn; 19Dy eiyrt magh royd ooilley dty noidyn, myr ta’n Chiarn er loayrt. 20As tra nee dty vac ’sy traa ta ry-heet fênaght jeed, gra, Cre ta dy ve toiggit liorish ny oardaghyn, as ny slattyssyn, as ny briwnyssyn ta’n Chiarn y Jee ain er harey diu? 21Dy jir uss eisht rish dty vac, Va shin ayns bondiaght fo Pharaoh ayns Egypt, as hug y Chiarn lesh shin ass Egypt lesh laue niartal: 22As hoilshee yn Chiarn yindyssyn as cowraghyn, mooar as trome, er Egypt, er Pharaoh, as er ooilley lught e hie, kiongoyrt rish nyn sooillyn: 23As hug eh lesh shin magh veih shen, dy leeideil shin stiagh, as dy chur dooin y cheer vreear eh da nyn ayraghyn. 24As hug y Chiarn currym orrin dy chooilleeney ooilley ny slattyssyn shoh, dy ghoaill aggle roish y Chiarn nyn Yee, son y foays brâ ain, dy vod eh tannaghtyn dooin nyn mioys, myr er y laa jiu. 25As bee eh er ny choyrt gys y lieh ain son cairys, my nee mayd dy kiaralagh cooilleeney ooilley ny saraghyn shoh, kiongoyrt rish y Chiarn nyn Yee, myr t’eh er choyrt currym orrin.