CAB. IX

1Eaisht, O Israel, t’ou dy gholl harrish Jordan dy gerrit, ry-hoi goaill possession jeh ashoonyn ny smoo as ny s’pooaral na oo hene, ard-valjyn mooar as voallit dy ard, 2Deiney mooar as thollee, cloan ny Anakimee, t’ou er vakin, as my-nyn-gione t’ou er chlashtyn imraa, Quoi oddys shassoo roish cloan Anak? 3Toig er-y-fa shen, yn laa jiu, dy nee yn Chiarn dty Yee eh ta goll royd myr aile ta coyrt mow: nee eh ad y stroie, as nyn lhieggal kiongoyrt rhyt: myr shoh nee oo nyn eebyrt magh, as stroie ad dy bollagh, myr ta’n Chiarn er ghra rhyt. 4Ny smooinee ayns dty chree, erreish da’n Chiarn dty Yee v’er eebyrt ad magh royd, gra, Son my chairys hene ta’n Chiarn er choyrt lesh mee stiagh dy ghoaill possession jeh’n cheer shoh: agh son mee-chraueeaght ny ashoonyn shoh, ta’n Chiarn er nyn imman magh royd. 5Cha nee son y chairys ayd’s, ny son ynrickys dty chree, t’ou goll dy ghoaill possession jeh’n cheer oc: agh son mee-chraueeaght ny ashoonyn shoh, ta’n Chiarn dty Yee dy nyn eebyrt magh royd, as dy chooilleeney yn goo vreear y Chiarn da dty ayraghyn, Abraham, Isaac, as Jacob. 6Toig er-y-fa shen, nagh nee son y chairys ayd hene, ta’n Chiarn dty Yee coyrt eiraght dhyt ’sy cheer mie shoh: son pobble creoi-wannallagh oo.

7Cooinee er, as ny jarrood, kys ren oo yn Chiarn dty Yee y vrasnaghey gys jymmoose ’syn aasagh: er-dyn laa daag oo cheer Egypt, derrey haink shiu gys yn ynnyd shoh, ta shiu er ve ayns irree-magh noi yn Chiarn. 8Ayns Horeb hene ren shiu yn Chiarn y vrasnaghey gys corree, choud shen as dy row eh kiarit dy stroie shiu. 9Tra va mee er n’gholl seose er y chronk, dy gheddyn ny buird chloaie, eer buird y chonaant, ren y Chiarn riu, chum mee ’sy chronk da-eed laa as da-eed oie, cha d’ee mee arran, ny cha diu mee ushtey: 10As ren y Chiarn livrey hym daa voayrd chloaie, scruit lesh mair Yee, as orroo va scruit rere ooilley ny goan loayr y Chiarn riu ’sy chronk, veih mean yn aile, er laa yn slane chaglym-cooidjagh. 11As shen myr ve, ec kione da-eed laa as da-eed oie, dy dug y Chiarn dooys yn daa voayrd chloaie, eer buird y chonaant. 12As dooyrt y Chiarn rhym, Trog ort, cosne royd sheese dy tappee; son ta dty phobble, hug oo lhiat magh ass Egypt, er vrishey magh m’oï: t’ad dy leah er hreigeil y raad, doardee mee daue: t’ad er n’yannoo daue hene jalloo grainnit. 13Ny-sodjey, loayr y Chiarn rhym’s, gra, Ta mee er vakin y pobble shoh, as cur-my-ner, pobble creoi-wannallagh ad. 14Faag mee dou hene, dy voddym ad y stroie, as dy bollagh dolley ass yn ennym oc fo niau; as neem’s uss y hoiaghey seose harrish ashoon ny s’pooaral as ny smoo na ad shoh. 15Er shoh hyndaa mee as haink mee neose jeh’n chronk, as va’n chronk ooilley ayns aile: as va daa voayrd y chonaant ayns my ghaa laue. 16As yeeagh mee, as cur-my-ner, va shiu er vrishey magh ayns peccah noi yn Chiarn nyn Yee, as er n’yannoo diu hene lheiy grainnit: va shiu dy leah er hreigeil y raad va’n Chiarn er harey diu. 17As ghow mee yn daa voayrd, as cheau mee ad ass my ghaa laue, as vrish mee ad kiongoyrt rish ny sooillyn eu. 18As huitt mee sheese kiongoyrt rish y Chiarn, myr ren mee roïe, rish da-eed laa as da-eed oie; cha d’ee mee arran ny cha diu mee ushtey, kyndagh rish ooilley ny peccaghyn ren shiuish dy mee-arrymagh ayns shilley yn Chiarn, dy vrasnaghey e chorree. 19(Son va aggle orrym roish y chorree as eulys y jymmoose shen, lesh va’n Chiarn er ny vrasnaghey nyn ’oï dy stroie shiu) agh hooar mee clashtyn veih’n Chiarn ec y traa shen myrgeddin. 20As va’n Chiarn cha jymmoosagh rish Aaron, dy baillish v’er stroie eh: as ren mee aghin neesht son Aaron ec y traa cheddin. 21As y peccah eu, eer y lheiy va shiu er n’yannoo, ren mee y ghoaill, as losht mee eh lesh aile, as vroo mee eh, as ren mee eh y vlieh feer vyn, derrey ve eer cha meein as joan: as cheau mee yn joan echey ’sy trooan ta roie veih’n chronk. 22As ec Taberah, as ec Massah, as ec Kibroth-hattaavah, ren shiu yn Chiarn y vrasnaghey gys corree. 23Myrgeddin, tra hug y Chiarn shiu veih Kadesh-barnea, gra, Immee-jee seose, as gow-jee possession jeh’n cheer ta mee er choyrt diu; ren shiu eisht girree magh noi sarey yn Chiarn y Jee eu, as cha ren shiu credjal eh, ny geaishtagh rish e choraa. 24Ta shiu er ve mee-viallagh noi yn Chiarn, er-dyn laa va ainjys aym erriu. 25Er shoh ve, dy huitt mee sheese kiongoyrt rish y Chiarn rish da-eed laa as da-eed oie; myr huitt mee sheese yn chied cheayrt: son dy row yn Chiarn er ghra, dy jinnagh eh shiu y stroie. 26Ghuee mee, er-y-fa shen, gys y Chiarn, as dooyrt mee, O Hiarn Yee, ny jean dty phobble y stroie, as dty eiraght, t’ou er livrey trooid dty phooar, ad hug oo lhiat magh ass Egypt, lesh laue niartal: 27Cooinee er dty harvaantyn, Abraham, Isaac, as Jacob; ny jeeagh er roonid y pobble shoh, ny er y vee-chraueeaght oc, ny er nyn beccah: 28Er-aggle dy jir y cheer, voish hug oo lhiat ad magh, Son nagh dod y Chiarn ad y chur lesh gys y cheer yiall eh daue, as son dy row dwoaie echey orroo, t’eh er choyrt lesh ad magh, dy stroie ad ’syn aasagh. 29Ny-yeih dty phobble ad, as dty eiraght hene, hug oo lhiat magh liorish dty phooar niartal, as lesh dty roih sheeynt magh.