CAB. I

1Goan y phreachoor, mac Ghavid, ree Yerusalem.

2Fardail dy ardalys ta’n preachoor dy ghra, fardail dy ardalys, ta ooilley fardail. 3Cre’n vondeish t’ec dooinney jeh ooilley’n deinys t’eh dy ghoaill fo’n ghrian? 4Ta un sheeloghe goll shaghey, as ta sheeloghe elley cheet ny yeï: agh ta’n thalloo tannaghtyn veih sheeloghe gys sheeloghe. 5Ta’n ghrian girree, as ta’n ghrian goll dy lhie, as chyndaa dy kinjagh gys yn ard raad dirree eh. 6Ta’n gheay goll lesh y jiass, as chyndaa mygeayrt gys y twoaie, t’ee kinjagh cassey mygeayrt, as chyndaa reesht rere e combaaseyn. 7Ta ooilley ny awinyn roie gys y vooir, ny-yeih cha vel y mooir lhieeney harrish: gys moir ny awinyn t’ad reesht chyndaa. 8Ta dy chooilley nhee lane dy hooilleil, cha vod dooinney fockley-magh eh: cha vel y sooill er ny yannoo magh lesh fakin, ny’n chleaysh skee lesh clashtyn. 9Shen ta er ve bee eh reesht, as shen ta nish dy yannoo, vees jeant ’sy traa ry-heet: as cha vel nhee erbee noa fo’n ghrian. 10Vel nhee erbee mychione oddys eh ve graït, Jeeagh, ta shoh noa? te er ny ve hannah ’sy chenn earish, roish y lhing ain. 11Cha vel veg y chooinaghtyn jeh ymmodee reddyn foddey er-dy-henney, chamoo vees veg y toiggal ocsyn hig nyn yeï, jeh shen ta ry-heet.

12Va mish yn preachoor my ree harrish Israel, ayns Jerusalem. 13As ren mee my chree y haaghey dy vriaght, as dy ronsaghey magh liorish creenaght dy chooilley nhee t’er ny yannoo fo niau: yn deinys trome shoh ta Jee er choyrt er cloan gheiney dy gholl ny hrooid. 14Ta mee er vakin ooilley ny obbraghyn ta jeant fo’n ghrian, as cur-my-ner, t’ad ooilley fardail as seaghney cree. 15Cha vod shen ta cam v’er ny yannoo jeeragh: as cha vod shen ta laccal ve er ny choontey. 16Loayr mee rish my chree hene, gra, Cur-my-ner, ta mee er jeet gys ard-ooashley, as ta mee er chosney creenaght erskyn ooilley ny va roym ayns Jerusalem: va dy jarroo toiggal dowin ec my chree jeh creenaght as tushtey: 17As ren mee my chree y haaghey dy hoiggal creenaght, as dy chur-my-ner mee-cheeayllid as ommijys: honnick mee dy row shoh myrgeddin seaghney cree. 18Son ayns mooarane creenaght ta mooarane seaghyn: as eshyn ta mooadaghey tushtey, t’eh mooadaghey deinys.