CAB. XI

1Ceau dty arran er ny ushtaghyn: son lurg ymmodee laghyn yiow soylley jeh. 2Cur cooid-ronney da shiaght, as myrgeddin da hoght; son cha vel fys ayd, cre’n lhag-haghyrt hig er yn ooir. 3My ta ny bodjallyn lane fliaghey, t’ad folmagh ad-hene er y thalloo, as my huittys yn billey lesh y jiass, ny lesh y twoaie, ’sy voayl huittys eh, shen y raad nee eh lhie. 4Eshyn ver geill da’n gheay, cha jean eh cuirr: as eshyn ta goaill baght jeh ny bodjallyn cha jean eh buinn. 5Myr nagh vel toiggal ayd jeh raad ny geayee, ny kys ta ny craueyn er ny chiaddey ayns breïn y ven chorrey: eer myr shen cha vel toiggal ayd jeh obbraghyn Yee, cre’n aght t’eh jannoo dy chooilley nhee jeu shoh. 6’Sy voghrey cuirr dty rass, as ec yn astyr ny lhaggee dty laue: son cha vel fys ayd quoi jeu nee bishaghey, edyr shoh ny shen; er-nonney bee ad ny-neesht co-laik mie.

7Dy jarroo ta’n soilshey aalin, as red eunyssagh te da ny sooillyn, dy chur-my-ner yn ghrian. 8Agh ga dy vel dooinney er cheau ymmodee bleeantyn, as er ghoaill boggey ayndoo ooilley: ny-yeih, lhig da smooinaghtyn er laghyn y dorraghys, son bee ad ymmodee. Son ooilley ta ry-heet, cha vel eh agh fardail.

9Gow boggey, O ghooinney aeg ayns dty aegid, as lhig da dty chree oo y gherjaghey ayns laghyn dty aegid, as jean gimmeeaght ayns raaidyn dty chree, as lurg shilley dty hooillyn hene: agh toig uss son ooilley ny reddyn shoh, dy der Jee lesh oo gys briwnys. 10Shen-y-fa scugh trimshey veih dty chree, as freill dty challin veih skielley: son cha vel lambaanid as aegid agh shallid.