CAB. III

1Son dy chooilley nhee ta imbagh cooie, as traa cour dy chooilley chiarail fo niau. 2Traa dy ve ruggit, as traa dy gheddyn baase: traa dy hoiaghey, as traa dy astyrt shen ny va soit: 3Traa dy varroo, as traa dy lheihys: traa dy vrishey sheese, as traa dy hroggal seose: 4Traa son keayney, as traa son garaghtee: traa son dobberan, as traa son daunsin: 5Traa dy arraghey claghyn, as traa son chymsaghey claghyn dy cheilley: traa dy ve graihagh, as traa dy haghney graih: 6Traa dy chosney, as traa dy choayl: traa dy hashtey, as traa dy chur magh: 7Traa dy rassey, as traa dy whaaley: traa dy ve tostagh, as traa dy loayrt: 8Traa dy chur graih, as traa dy chur dwoaie: traa dy chaggey, as traa dy hee. 9Cre’n vondeish eisht ta echeysyn ta gobbraghey, ayns ooilley’n deinys t’eh dy ghoaill er hene? 10Ta mee er vakin y tooilleil ta Jee er choyrt er cloan gheiney, dy gholl ny hrooid. 11T’eh er n’yannoo dy chooilley nhee aalin ayns e imbagh hene: t’eh myrgeddin er choyrt daue cree tastagh ’sy theihll, ga nagh vod dooinney erbee roshtyn gys slane toiggal ny obbraghyn ta Jee dy yannoo veih’n toshiaght gys y jerrey. 12Ta fys aym nagh vel foays erbee ayndoo, agh son dooinney dy ghoaill gerjagh, as dy yannoo mie, ayns laghyn e vea. 13As myrgeddin, dy jinnagh dy chooilley ghooinney gee as giu, as soylley ’ghoaill jeh foays ooilley e laboraght: ta shoh gioot Yee. 14Ta fys aym, cre-erbee ta Jee dy yannoo, dy bee eh er son dy bragh: cha vod nhee erbee ve currit huggey, ny nhee erbee er ny ghoaill voish: as shoh ta Jee dy yannoo, dy voddagh sheelnaue aggle y ghoaill roish. 15Shen ny ta er ve, ta nish; as shen ta ry-heet, te hannah er ve; as ta Jee cur lesh mygeayrt shen ny t’er n’gholl shaghey.

16As ny-sodjey na shoh, honnick mee fo’n ghrian ynnyd y vriwnys, dy row mee-chairys ayns shen, as ayns ynnyd yn ynrickys, dy row aggair ayns shen. 17Dooyrt mee ayns my chree, Nee Jee briwnys chammah yn dooinney cairal as y neu-chairal: son ta traa mârishyn cour dy chooilley nhee, as cour dy chooilley obbyr. 18Dooyrt mee ayns my chree, mychione stayd cloan gheiney, Dy jean Jee ad y vriwnys, dy chur daue toiggal nagh vel ad-hene ny share na’n maase. 19Son shen ny ta taghyrt da cloan gheiney, ta taghyrt da’n maase, dy jarroo ta’n un red taghyrt daue: myr ta’n derrey yeh geddyn baase, myr shen ta’n jeh elley geddyn baase: dy jarroo t’ad ooilley tayrn yn ennal cheddin, myr shen nagh vel veg yn ooashley ec y dooinney erskyn y baagh: son ta dy chooilley nhee fardail. 20T’ad ooilley goll yn un raad, t’ad ooilley veih’n joan, as gys joan t’ad ooilley reesht chyndaa. 21Quoi ec ta toiggal mychione spyrryd y dooinney, dy vel eh goll seose, ny mychione spyrryd y vaagh, dy vel eh goll sheese fo halloo? 22Shen-y-fa ta mee cur tastey nagh vel nhee erbee share, na son dooinney dy ghoaill gerjagh ayns e obbraghyn hene; son shen e chronney: son quoi ver lesh eh dy akin shen ny vees ny yeï?